याकूब 5 - काँगड़ीअमीर लोकां जो चतौणी 1 हे बेबसुआसी अमीर लोको, सुणी तां लेआ। तुहां अपणिया ओणे आल़िआं मुसीबतां पर डड्डी-डड्डी करी रोआ। 2 तुहां दी धन-दौलत नास होई गेई ऐ, कने तुहां दे कपड़ेयां जो कीड़े खराब करी दिंदे हन। 3 तुहां दे सोन्ने चाँदी च जंग लग्गी गेआ ऐ; कने तिन्हां पर लगेया जंग तुहां दे खलाफ गवाही दिंगा, कने तुहां दे सरीरे जो अग्गी साइआं खाई जांगा। कने एह़ संसारे दा आखरी बग्त ऐ, तुहां धने पर धन किठ्ठा करा दे हन। 4 दिक्खा, जिन्हां मजदूरां तुहां दे खेतां दी फसल बड्डी, तिन्हां दी सैह़ मजदूरी जेह्ड़ी तुहां धोखा देई करी रखी लेई ऐ; बड्डणे आल़ेआं दी विणती कने दोहाई सेनां दे परमात्मे सुणी लेई ऐ। 5 तुहां धरतिया पर सोक पूरे करणे च लग्गी रैह्, कने तुहां बड़ा ई सुख पाया; कने तुहां अपणे पापे दा घड़ा भरी लेआ, कने इसतांई तुहां अपणे आप्पे जो पाल़ी पोसी परमात्मे दे न्याय तांई त्यार करी लेआ ऐ। 6 तुहां बेकसूर लोकां जो दोसी ठैहराई नैं मारी दित्ता, सैह़ तुहां दा सामणा नीं करदे हन। दुखे च सबर रखणा 7 इसतांई हे प्यारे साथी बसुआसियो, प्रभु दे ओणे तिकर सबर रखा। दिक्खा, किसान धरतिया दी कीमती फसला दी आस रखदा होएया पैहल्ली कने आखरी बरखा होणे तिकर सबर रखदा ऐ। 8 तुहां भी इस तरीके नैं सबर रखा; कने अपणे मने जो पक्का करा, क्जोकि प्रभु दा औणां नेड़े ऐ। 9 हे प्यारे साथी बसुआसियो, इक्की दूये पर दोस मत लग्गा, तांजे तुहां दोसी नीं बणन; दिक्खा, न्याय करणे आल़ा ओणे तांई त्यार ऐ। 10 हे प्यारे साथी बसुआसियो, जिन्हां भविष्यवक्तां प्रभु दे नांऐ ते गल्लां कित्तियां, तिन्हां जो दुख झेलणे कने सबर रखणे दा अपणे तांई इक्क उदारण समझा। 11 दिक्खा, अहां सबर रखणे आल़ेआं जो धन ग्लांदे हन। तुहां अय्यूब दे सबर दे बारे च तां सुणेया ई ऐ, कने प्रभु दे पास्से ते जेह्ड़ा तिसदा प्रतिफल़ होएया तिसियो भी जाणी लेआ ऐ, जिसते प्रभु दी बड़ी जादा करूणा कने दया प्रगट हुंदी ऐ। 12 अपर हे प्यारे साथी बसुआसियो, सारेयां ते बड्डी गल्ल एह़ ऐ कि कसम मत खांदे, ना सुअर्गे दी, ना धरतिया दी, ना कुसा होर चीज्जा दी, अपर तुहां दी गल्लबात हाँ दी हाँ कने ना दी ना होयैं, कि तुहां पर परमात्मे दी सज़ा नीं औयें। प्रार्थना दी ताकत 13 जे तुहां च कोई दुखी हन, तां सैह़ प्रार्थना करन। जे खुस हन, तां सैह़ स्तुति दे भजन गान। 14 जे तुहां च कोई बमार ऐ, तां कलीसिया दे स्याणेयां जो सद्दा, कने सैह़ प्रभु दे नांऐ ते तिस पर तेल मल़ी करी तिस तांई प्रार्थना करन, 15 कने बसुआसे च कित्तियो प्रार्थना दिया बज़ाह ते बमार बची जांगा, कने प्रभु तिसियो खरा करगा; कने जे तिन्हीं पाप भी कित्ते हन, तां तिन्हां पापां दी भी माफी होई जांगी। 16 इसतांई तुहां अप्पु च इक्की दूये दे सामणै अपणे-अपणे पापां जो मन्नी लेआ, कने इक्की दूये तांई प्रार्थना करा, जिसते तुहां खरे होई जान, धर्मी जण दी प्रार्थना दे असर ते बड़ा कुच्छ होई सकदा ऐ। 17 एलिय्याह भविष्यवक्ता भी तां अहां साइआं दुख-सुख भोगणे आल़ा माणु था; कने तिन्हीं गिड़गिड़ाई नैं प्रार्थना कित्ती कि बरखा ना होयैं, कने साढे तीन साल तिकर बरखा नीं होई। 18 भिरी तिन्हीं प्रार्थना कित्ती, तां अम्बरे ते बरखा होई, कने धरतिया च पैदावार होई। 19 हे प्यारे साथी बसुआसियो, जे तुहां च कोई सच्चाईया दे रस्ते ते भटकी जां, कने कोई तिसियो सच्चाईया दे रस्ते भिरी बापस लेई औयें। 20 तां सैह़ एह़ जाणी लैं कि जेह्ड़ा कोई कुसी भटकेयो पापी जो सच्चाईया दे रस्ते ते बापस लेई ओंगा, तां सैह़ इक्क आत्मा जो नरके दिया मौत्ती ते बचांदा ऐ, कने परमात्मा तिसदे मते पापां जो माफ करदा ऐ। |
This work is licensed under Creative Commons Attribution-ShareAlike 4.0 License.