याकूब 4 - काँगड़ी

संसारे नैं दोस्ती

¹ तुहां लोकां च लड़ाई कने झगड़े कतांह ते ओंदे हन? क्या इन्हां दे पचांह़ तुहां दी बुरी इच्छा नीं ऐ, जेह्ड़ी तुहां दे अंदर लड़दी-झगड़दी रैंह्दी ऐ?

² तुहां इच्छा रखदे हन, अपर तुहां जो मिलदा नीं; इसतांई तुहां खून करणे तांई त्यार रैंह्दे हन। कने दूयेयां दी चीज्जां दा बड़ा लालच करदे हन, अपर इआं करणे ते तुहां जो कुच्छ नीं मिलदा इसतांई तुहां झगड़दे कने लड़दे हन। तुहां जो इसतांई नीं मिलदा कि परमात्मे ते नीं मंगदे।

³ तुहां मंगदे तां हन, भिरी भी तुहां जो नीं मिलदा क्जोकि बुरिआ नित्ती नैं मंगदे हन, तांजे तुहां तिसियो अपणे सोक पूरे करणे तांई बरबाद करी दैन।

⁴ हे बेबसुआसी लोको, तुहां नीं जाणदे कि संसारे नैं मित्र चारा रखणे ते परमात्मे नैं बैर रखणा ऐ? इसतांई जे कोई संसारे दा मित्र बणना चांह़दा ऐ, तां सैह़ अपणे आप्पे जो परमात्मे दा बैरी बणांदा ऐ।

⁵ क्या तुहां एह़ समझदे हन कि पवित्रशास्त्र बेकार च ग्लांदा ऐ? “कि जिसा अपणिया आत्मा जो तिन्हीं अहां दे अंदर बसाया ऐ, कने परमात्मा बड़ी इच्छा रखदा ऐ कि अहां सिर्फ तिसदी ई अराधना करन। ”

⁶ सैह़ तां होर भी अनुग्रह दिंदा ऐ, इसतांई एह़ पवित्रशास्त्रे च लिख्या ऐ, “परमात्मा घमंडियां नैं बरोध करदा ऐ, अपर दीन माणुआं पर अनुग्रह करदा ऐ।”

⁷ इसतांई परमात्मे दे अधीन होई जा, कने सैताने दा सामणा करा, तां सैह़ तुहां दे बक्खे ते नठ्ठी जांगा।

⁸ परमात्मे नेड़े ओआ तां सैह़ भी तुहां दे नेड़े ओंगा। हे पापियो, अपणिया ज़िन्दगिया ते पाप दूर करा। कने हे दोगले लोको अपणे मनां जो पवित्र करा।

⁹ कने अपणे पापां दिया बज़ाह ते दुखी होआ, कने सोक करा, कने रोआ। तुहां दा हसी दुखे च कने तुहां दी खुसी उदासी च बदली जां।

¹⁰ प्रभु दे सामणै दीन बणा, तां सैह़ तुहां दा आदर करगा।

भाऊआं पर दोस लगाणा

¹¹ हे प्यारे साथी बसुआसियो, इक्की दूये दी निंदा मत करा। जेह्ड़ा अपणे भाऊये दी निंदा करदा ऐ, या भाऊये पर दोस लगांदा ऐ, सैह़ व्यबस्था दी निंदा करदा ऐ, कने व्यबस्था पर दोस लगांदा ऐ; कने जे तू व्यबस्था पर दोस लगांदा ऐ, तां तू व्यबस्था पर चलणे आल़ा नीं, अपर तिस पर न्याय करणे आल़ा बणया।

¹² व्यबस्था दैणे आल़ा कने न्याय करणे आल़ा तां इक्को ई ऐ, मतलब परमात्मा जेह्ड़ा बचाणे कने नास करणे च सामर्थी ऐ। अपर तू कुण ऐ, जेह्ड़ा अपणे प्ड़ेसिये पर दोस लगांदा ऐ?

घमंड दे खलाफ चतौणी

¹³ तुहां जेह्ड़ा एह़ ग्लांदे हन, “अज्ज या कल अहां कुसी होर सैहरे च जाई नैं औत्थू इक्क साल रैहणा, कने बपार करी नैं फायदा कम्माणा।”

¹⁴ अपर तुहां एह़ नीं जाणदे कि कल क्या हुंगा। सुणी तां लेआ, तुहां दी ज़िन्दगी ऐ ई क्या? तुहां तां भाफे साइआं हन, जेह्ड़ा थोड़ी देर दुस्सदा ऐ भिरी गायब होई जांदा ऐ।

¹⁵ इसतांई तुहां जो एह़ ग्लाणा चाइदा, “जे प्रभु चां तां अहां जिन्दे रैंह्गे, कने एह़ या सैह़ कम्म भी करगे।”

¹⁶ अपर हुण तुहां अपणियां बणाईयां योजनां पर घमंड करदे हन; ऐदेया सारा घमंड बुरा हुंदा ऐ।

¹⁷ इसतांई जेह्ड़ा कोई भलाई करणा जाणदा ऐ कने नीं करदा, तिस तांई एह़ पाप ऐ।