याकूब 3 - काँगड़ी

जीभा जो बसे च करणा

¹ हे मेरे प्यारे साथी बसुआसियो, कलीसिया च मतेआं जो गुरू नीं बणना चाइदा, क्जोकि तुहां जाणदे हन, कि परमात्मा अहां सखाणे आल़ेआं दा सक्तिया नैं न्याय करगा।

² अहां सारे ग्लाणे च मती बरी गलती करी जांदे हन; अपर जेह्ड़ा कोई ग्लाणे च गलती नीं करदा सैई तां सिद्ध माणु ऐ, कने सैह़ सारे सरीरे जो अपणे बसे च करी सकदा ऐ।

³ जाह़लू अहां घोड़ेयां जो अपणे बसे च करणे तांई तिन्हां दे मुँऐ च लगाम लगांदे हन, तां अहां तिन्हां दे सारे सरीरे जो अपणे बसे च भी करी सकदे हन।

⁴ दिक्खा, समुंदरी जाह्ज भी, हलांकि बड़े बड्डे हुंदे हन, कने तेज हौआ नैं चलाये जांदे हन, तमी इक्क छोटी देहई पतवारा दे जरिये चलाणे आल़ा माँझी अपणिया इच्छा मताबक तिसियो घुमाई दिंदा ऐ।

⁵ तिंआं ई जीभ भी सरीरे दा इक्क छोटा देहया अंग ऐ कने सैह़ बड्डी-बड्डी डींगा मारदी ऐ। दिक्खा किंआं, थोड़ी देहई अग्गी नैं कितणे बड्डे बणे च अग्ग लग्गी जांदी ऐ।

⁶ जीभ भी इक्क अग्गी साइआं ऐ; जीभ अहां दे सरीरे दा इक्क अंग ऐ, जेह्ड़ा बड़ा बुरा होई सकदा ऐ, कने पूरे सरीरे पर कलंक लगाई सकदी ऐ, कने पूरिया ज़िन्दगिया च भी अग्ग लगाई सकदी ऐ, कने जीभ नरके दिया अग्गी च अप्पु जल़दी रैंह्दी ऐ।

⁷ हर किस्मां दे जंगली जानवर, उडणे आल़े पंछी, कने पेटे दे भार चलणे आल़े जानवर, कने पाणी आल़े जानवर माणु जाति दे बसे च होई सकदे हन कने होई भी गियो हन,

⁸ अपर जीभा जो कोई भी माणु बसे च नीं करी सकदा; सैह़ इक्क ऐदई बल़ा ऐ जेह्ड़ी कदी रुकदी ई नीं, सैह़ सर्पे दे जैहरे साइआं नकसान दैणे आल़ी ऐ।

⁹ इसा जीभा नैं अहां प्रभु कने पिता दी स्तुति करदे हन, कने इसा ते माणुआं जो जेह्ड़े परमात्मे दे रूपे साइआं बणायो हन तिन्हां जो श्राप दिंदे हन।

¹⁰ इक्की मुँऐ ते धन्यावाद कने श्राप दोयो निकल़दे हन। हे प्यारे साथी बसुआसियो, ऐदेया नीं होणा चाइदा।

¹¹ क्या छरुड़ूये दे इक्की मुँऐ ते मिठ्ठा कने खारा पाणी निकल़ी सकदा ऐ?

¹² हे प्यारे साथी बसुआसियो, क्या धूड़े दे रूखे च जैतून या अंगूरा दिया बेला च धूड़े लग्गी सकदे हन? तिंआं ई खारे छरुड़ूये ते मिठ्ठा पाणी नीं निकल़ी सकदा।

सुअर्गीय ज्ञान

¹³ तुहां च अक्लमंद कने समझदार कुण ऐ? जेह्ड़ा ऐदेया ऐ, सैह़ अपणे कम्मां कने खरे सभावे दे जरिये ज्ञान पैदा करणे आल़ी नम्रता दे जरिये इसा गल्ला दा सबूत दैं।

¹⁴ अपर जे तुहां अपणे-अपणे मने च बड़ी नफरत कने सवार्थ रखदे हन, तां डींगा नीं मारणा कने ना ई सच्चाईया दे खलाफ झूठ ग्लाणा।

¹⁵ इस तरीके दा ज्ञान सैह़ नीं, जेह्ड़ा सुअर्गे ते मिल्लेया ऐ, अपर संसारिक, कने सारीरिक, कने सैतानी ऐ।

¹⁶ क्जोकि जित्थु नफरत कने सवार्थ हुंदा ऐ, औत्थू बखेड़ा कने हर किस्मां दे बुरे कम्म हुंदे हन।

¹⁷ अपर जेह्ड़ा ज्ञान सुअर्गे ते मिलदा ऐ सैह़ पैहल्लैं तां पवित्र हुंदा ऐ, भिरी मिलणसार, नरम, खरा लगणे आल़ा, दया, कने खरे-खरे फल़ां नैं भरोया, बगैर भेदभाव, कने बगैर कपटा ते हुंदा ऐ।

¹⁸ कने जेह्ड़े लोक मेल-जोल करवाणे आल़े हन, सैह़ सांति दा बीई बांगे, कने धार्मिकता दी फसल बडगे।