इब्रानियों 9 - काँगड़ी

संसारिक तम्बू च सेवा किंआं

¹ तिस पैहल्ले वादे च भी परमात्मे दी अराधना करणे दे पूरे नियम थे, कने इसा धरतिया पर परमात्मे दी अराधना करणे तांई इक्क पवित्र जगाह बणाईयो थी।

² इस्राएली लोकां इक्क तम्बू बणाया, कने तिसदे दो हिस्से थे। तम्बुये दे पैहल्ले आल़े हिस्से च दीय्या, इक्क मेज, कने तिस मेज्जे पर भेंट दी पवित्र रोटियां रखियां जादियां थियां। कने तम्बुये दे इस हिस्से जो पवित्र जगाह ग्लांदे थे।

³ कने तम्बुये दा दूआ हिस्सा जेह्ड़ा पड़दे दे अंदर था, तिस हिस्से जो बड़ी पवित्र जगाह ग्लांदे थे।

⁴ तिस अंदरे आल़े हिस्से च सोन्ने दी धूपदानी कने चौंन्नी पास्सेयां ते सोन्ने दा मढ़ेया वादे दा सन्दूक था। तिस सन्दूके अंदर मन्ने नैं भरोया सोन्ने दा मर्तबान कने हारूने दी सोठी जिस च कुल़े पत्तर आई गियो थे, कने वादे दी पत्थरे दिया पट्टियां रखियां थियां।

⁵ इसदे अलावा तिन्हां सन्दूके ऊपर तेजस्वी करूब बणायो थे, जिन्हां दे पंख तिस सन्दूके ऊपर फैलेयो थे, जेह्ड़ी पापां दी माफी दी जगाह ऐ। अपर अहां हुण इन्हां गल्लां दा इक्क-इक्क करी नैं बखान नीं करी सकदे।

⁶ एह़ सारियां चीज्जां त्यार करणे ते बाद याजक तम्बुये दे पैहल्ले हिस्से च हर बग्त सेवा दे कम्म पूरे नभांदे थे।

⁷ अपर तम्बुये दे दूये हिस्से च सिर्फ महायाजक ई साल्ले च इक्क बरी जानवरां दा खून लेई नैं जांदा था। जिसियो सैह़ अपणे तांई कने लोकां दे पापां तांई जेह्ड़े तिन्हां अणजाणे च कित्यो थे, चढ़ांदा था।

⁸ पवित्र आत्मा इसा गल्ला जो साफ करदा ऐ, कि जाह़लू तिकर तम्बुये दा पैहल्ला हिस्सा ऐ, ताह़लू तिकर बड़ी पवित्र जगाह च जाणे दा रस्ता बंद ऐ।

⁹ कने एह़ तम्बुये दा पैहल्ला हिस्सा इक्क उदारण ऐ; जेह्ड़ा अज्जे दे बग्ते दे पास्से इसारा करदा ऐ, कने एह़ इसा गल्ला जो दस्सदा ऐ, कि भेंट कने बलिदान चढ़ाई करी अहां अपणे जमीरे जो साफ नीं करी सकदे।

¹⁰ क्जोकि एह़ गल्लां तां सिर्फ खाणे पीणे दियां चीज्जां कने लग्ग-लग्ग न्हौणे दियां रस्मां हन, एह़ सरीरी रस्मां सिर्फ सुधारे दे बग्ते तिकर लागू हन।

मसीह दे खून दी सामर्थ

¹¹ अपर जाह़लू मसीह ओणे आल़ी खरियां-खरियां चीज्जां दा महायाजक होई नैं आया, तां तिन्हीं होर भी म्हान कने सिद्ध तम्बू ते होई नैं जेह्ड़ा सुअर्गे च ऐ, ग्लाणे दा मतलब जेह्ड़ा इसा सृष्टिया दा हिस्सा नीं ऐ।

¹² यीशु मसीह जानवरां दा खून नीं, अपर अपणा ई खून लेई करी सदा तांई इक्की बरी बड़ी पवित्र जगाह च गेआ, कने इस तरीके नैं लोकां तांई हमेसा बणी रैहणे आल़े उद्धारे जो हासल कित्ता।

¹³ याजक जानवरां दा खून कने बल़िया दी धूड़ अपवित्र लोकां पर छिड़कदा ऐ, तिसते तिन्हां दा सरीर भिरी ते सुद्ध होई जांदा ऐ, जे इस च पवित्र करणे दी सामर्थ ऐ,

¹⁴ तां मसीह दा खून, जिन्हीं अपणे आप्पे जो सदा जिन्दा रैहणे आल़ी आत्मा दे जरिये परमात्मे सामणै बेकसूर बल़िया दे रूपे च चढ़ाई दित्ता, जिन्दे परमात्मे दी सेवा करणे तांई अहां दे जमीरे जो पापी कम्मां ते क्जो नीं सुद्ध करगा?

¹⁵ कने इसा बज़ाह ते मसीह नौये वादे दा बचौला ऐ, तांजे जेह्ड़े लोक सद्देयो हन, सैह़ वादे दिया जायदाता दे हक्कदार बणी जान। हुण मसीह तिन्हां लोकां जो बचाणे तांई मरेया ऐ, जिन्हां पाप कित्या था, कने पराणे वादे जो तोड़ी दित्ता।

¹⁶ वादा इक्क बसियता साइआं ऐ, बसियता दे मामले च एह़ साबित करणा जरूरी ऐ, जिन्हीं वादा कित्या तिसदी मौत्त होई चुकियो ऐ।

¹⁷ क्जोकि ऐदेया वादा मरने पर पक्का हुंदा ऐ, कने जाह़लू तिकर वादा करणे आल़ा जिन्दा रैंह्दा ऐ, ताह़लू तिकर वादा कुसी कम्मे दा नीं हुंदा।

¹⁸ ऐई बज़ाह ऐ, कि पैहल्ला वादा भी परमात्मैं जानवरां दे खूने दे जरिये कित्ता।

¹⁹ क्जोकि जाह़लू मूसा सारेयां लोकां जो व्यबस्था दा हर इक्क हुक्म सणाई बैठा, तां तिन्हीं जानवरां दा खून पांणिये च मिल्लाई करी जूफे दिया डाल़िया च लाल ऊन लपेटी करी व्यबस्था दिया कताबा पर कने सारेयां लोकां पर छिड़की दित्ता।

²⁰ कने मूसे ग्लाया, “एह़ तिस वादे दा खून ऐ, जिसदा हुक्म परमात्मैं तुहां तांई दित्ता ऐ।”

²¹ कने इस तरीके नैं तिन्हीं तम्बू कने अराधना दी सारियां चीज्जां पर भी खून छिड़केया।

²² सच्च तां एह़ ऐ, कि व्यबस्था मताबक सारियां चीज्जां खूने दे जरिये सुद्ध कित्ती जांदियां हन, कने बगैर खून बहाये पापां दी माफी नीं हुंदी।

मसीह दे बलिदाने दे जरिये पाप - माफ

²³ याजके तांई एह़ जरूरी ऐ, कि तम्बू कने तिसदियां सारियां चीज्जां जेह्ड़ियां सुअर्गे दियां चीज्जां दी नकल हन, इसतांई इन्हां जो जानवरां दे बलिदानां दे जरिये सुद्ध कित्ती जान। अपर सुअर्गे दियां चीज्जां जो सुद्ध करणे तांई जानवरां दे खूने ते बधी करी म्हान बलिदाने दी जरूरत ऐ।

²⁴ क्जोकि यीशु मसीह जिसा पवित्र जगाह च गेआ, सैह़ माणुये दे हत्थां नैं नीं बणाईयो थी, जेह्ड़ा सच्ची पवित्र जगाह दा नक्सा ऐ। अपर सुअर्गे च गेआ तांजे अहां तांई हुण परमात्मे दिया हजुरिया च दुस्सें।

²⁵ एह़ नीं कि मसीह अपणे आप्पे जो बार-बार बलिदान करैं, जिंआं कि महायाजक हर साल जानवरां दा खून लेई करी बड़ी पवित्र जगाह च जांदा ऐ,

²⁶ नीं तां संसारे दी सुरूआती ते लेई नैं मसीह जो बार-बार दुख झेलणा पोंदा। अपर हुण इस जुगे दे अन्त च सैह़ इक्क ई बरी प्रगट होएया ऐ, तांजे अपणे ई बलिदाने दे जरिये पापां जो दूर करी दैं।

²⁷ जिंआं लोकां तांई मसीह दा इक्क बरी मरना कने तिसते बाद न्याय दा होणा पक्का ऐ,

²⁸ तिंआं ई मसीह भी मतेआं लोकां दे पापां जो अपणे ऊपर लेई नैं इक्क बरी बलिदान होएया। कने जेह्ड़े लोक तिसदा इन्तजार करदे हन, तिन्हां दे पापां तांई सैह़ दूई बरी मरने तांई नीं आया, अपर तिन्हां दे उद्धारे तांई प्रगट होई जांगा।