इब्रानियों 5 - काँगड़ी

¹ हर इक्क महायाजक माणुआं ते चुणेया जांदा ऐ, कने माणुआं तांई तिन्हां गल्लां दे बारे च जेह्ड़ियां परमात्मे नैं रिस्ता रखदियां हन, चुणेया जांदा ऐ कि भेंट कने पाप बल़ि चढ़ाया करन।

² क्जोकि सैह़ अप्पु भी कमजोरियां दे बसे च ऐ। इसतांई सैह़ नासमझां कने भुले भटकेयां सौगी नरमिया नैं बर्ताब करी सकदा ऐ।

³ महायाजक होणे दे नाते तिसियो एह़ जरूरी ऐ, कि जिंआं लोकां तांई तिंआं ई अपणे तांई भी पाप बल़ि चढ़ां।

⁴ एह़ पदवी कोई भी अपणे आप्पे ते नीं लेई सकदा ऐ, जाह़लू तिकर कि हारूने साइआं परमात्मे दे पास्से ते चुणेया नीं जां।

⁵ तिंआं ई मसीयैं भी महायाजक बणने दी पदवी अप्पु ते नीं लेई, अपर तिस जो परमात्मैं दित्ती, जिन्हीं तिस नैं ग्लाया था, “तू मेरा पुत्तर ऐ, अज्ज मैं एह़ घोसणा करदा ऐ, कि मैं तेरा पिता ऐ।”

⁶ इसी तरीके नैं सैह़ दूईआ जगाह च भी ग्लांदा ऐ, “तू मलिकिसिदके दिया रीतिया पर सदा तांई याजक ऐ।”

⁷ यीशु मसीह संसारे च रैंह्दे बग्त जोरे-जोरे नैं डड्डी करी कने रोई-रोई नैं परमात्मे सामणै प्रार्थनां कने विणती कित्ती, जेह्ड़ा तिसियो मौत्ती ते बचाई सकदा था। तिसदिया भक्तिया दिया बज़ाह ते तिसदी प्रार्थना सुणी गेई।

⁸ हलांकि यीशु परमात्मे दा पुत्तर होणे पर भी तिन्हीं दुख झेली-झेली नैं हुक्म मन्नणा सिखया,

⁹ कने सिद्ध बणी करी, अपणे सारे हुक्म मन्नणे आल़ेआं तांई सदा काल दे उद्धारे दी बज़ाह होई गेआ,

¹⁰ कने तिसियो परमात्मे दे पास्से ते मलिकिसिदके दिया रीतिया पर महायाजके दी पदवी मिल्ली।

बसुआसे ते भटकी जाणे दा नतीजा

¹¹ इसदे बारे च अहां जो मतिआं सारियां गल्लां ग्लाणियां हन, अपर इन्हां दा समझाणा भी औखा ऐ, क्जोकि तुहां ऊचा सुणना लग्गी पैयो हन।

¹² सच्ची तां एह़ ऐ कि इस बग्ते तिकर तां तुहां जो सिक्षा दैणे आल़ा बणी जाणा चाइदा था, अपर तुहां जो हुण भी कुसी ऐदेय माणुये दी जरूरत ऐ, जेह्ड़ा तुहां जो दुवारी परमात्मे दी सिक्षा दियां गल्लां सुरू ते सखां। तुहां तां ऐदेय बणी गै हन कि तुहां जो अनाजे दे बदले अह्ल्ली तिकर दुद ई चाइदा।

¹³ दुद पीणे आल़े बच्चे जो तां परमात्मे दी धार्मिकता दी सिक्षा दी पणछैण नीं हुंदी, क्जोकि सैह़ बच्चा ऐ।

¹⁴ अपर अनाज बड्डेयां तांई ऐ, जिन्हां दी समझ तजरबा करदे-करदे, खरे बुरे दे बारे दा भेत करणे तांई पक्की होई गेई ऐ।