इब्रानियों 3 - काँगड़ी

यीशु मूसा ते म्हान

¹ इसतांई हे प्यारे साथी बसुआसियो, तुहां परमात्मे नैं मिलणे तांई सद्देयो गै हन, यीशु पर ध्यान देआ, जेह्ड़ा अहां तांई परमात्मे दा संदेस लेई करी ओणे आल़ा दूत कने महायाजक ऐ।

² जिंआं मूसा परमात्मे दे घराने दे सारे कम्मां च बसुआसे जोग्गा बणेया था, तिंआं ई यीशु मसीह भी अपणे नियुक्त करणे आल़े परमात्मे दे सारे कम्मां च बसुआसे जोग्गा बणेया।

³ अपर यीशु मूसा ते इतणा बधी करी महिमा जोग्गा समझेया था, जितणा कि घरे दा बणाणे आल़ा घरे ते बधी करी आदर रखदा ऐ।

⁴ क्जोकि हर इक्की घरे दा कोई ना कोई बणाणे आल़ा हुंदा ऐ, अपर जिन्हीं सब कुच्छ बणाया सैह़ परमात्मा ऐ।

⁵ मूसा तां परमात्मे दे घरे च दासे साइआं बसुआसे जोग्गा रेह्आ, कि जिन्हां गल्लां दी चर्चा होणे आल़ी थी, तिन्हां गल्लां दी गवाही दैं।

⁶ अपर मसीह इक्क पुत्तरे साइआं परमात्मे दे घरे दा हक्कदार ऐ; कने तिसदा घर अहां हन। जे अहां अपणे मजबूत बसुआसे कने आसा जो आखरी तिकर हिम्मता नैं थमी रखदे हन।

बेबसुआसे दे खलाफ चतौणी

⁷ जिंआं पवित्र आत्मा पवित्रशास्त्रे च ग्लांदा ऐ, “जे अज्ज तुहां परमात्मे दी उआज़ सुणन,

⁸ तां अपणे मने जो कठोर मत करा, जिंआं कि तुहां दे पूर्वजां तिस सुनसाण जगाह च परीक्षा दे बग्त परमात्मे नैं बगावत कित्ती।

⁹ तित्थु तुहां देयां पूर्वजां चाल़ी साल तिकर, मेरे म्हान कम्मां जो दिक्खणे ते बाद भी धमकी देई नैं मिन्जो परखेया था।

¹⁰ इसा बज़ाह ते मैं तिस बग्त दे लोकां ते नराज रेह्आ, कने ग्लाया, ‘सैह़ मिन्जो मन्नणे ते इन्कार करदे हन, कने जेह्ड़ा कम्म करणे दा हुक्म मैं तिन्हां जो दित्या ऐ, तिसियो नीं मनदे।’

¹¹ तां मैं गुस्से च आई करी कसम खादी, ‘सैह़ मेरे अरामे दिया जगाह च दाखल नीं होई सकगे।’ ”

¹² हे प्यारे साथी बसुआसियो, चौकन्ने रेह्आ, कि तुहां लोकां च इतणे बुरे कने बेबसुआसी नीं होन, कि परमात्मा जेह्ड़ा ज़िन्दगी दिंदा ऐ, तिसते दूर होई जान।

¹³ हर दिन इक्की दूये जो हौंसला दिंदे रेह्आ, जाह़लू तिकर तुहां अल्ल मौका ऐ, इआं ना होयैं कि तुहां च कोई माणु पाप दे छले च आई करी कठोर बणी जां।

¹⁴ जे अहां अपणे पैहल्ले भरोसे जो अन्त तिकर मजबूत बणाई रखदे हन, तां अहां मसीह दे हिस्सेदार बणी जांदे हन।

¹⁵ जिंआं पवित्रशास्त्रे च लिख्या ऐ, “जे अज्ज तुहां परमात्मे दी उआज़ सुणन, तां अपणे मने जो कठोर मत करा। जिंआं कि गुस्सा दिलाणे दे बग्त कित्या था।”

¹⁶ कुण थे सैह़ लोक, जिन्हां परमात्मे दी उआज़ सुणी करी भी तिस नैं बगावत कित्ती? क्या सैह़ इस्राएली लोक नीं थे, जेह्ड़े मूसा दे जरिये मिस्र देसे दिया गुलामिया ते अजाद होएयो थे?

¹⁷ कने सैह़ चाल़ी साल तिकर कुणा लोकां ते गुस्सा रेह्आ? क्या तिन्हां ते नीं जिन्हां पाप कित्ता, कने तिन्हां दी लाह्स सुनसाण जगाह च पेई रेई?

¹⁸ कने तिन्हीं कुणा सौगी कसम खादी, कि तुहां मेरे अरामे च दाखल नीं होई सकगे? क्या सिर्फ तिन्हां नैं नीं जिन्हां हुक्म नीं मन्नेया?

¹⁹ इसतांई अहां दिक्खदे हन, कि बेबसुआसे दिया बज़ाह ते सैह़ अरामे दिया जगाह च दाखल नीं होई सके।