गलातियों 2 - काँगड़ी

होरनी चेलेयां दिया बज़ाह ते पौलुसे दा आदर

¹ चौदा साल्लां बाद मैं बरनबासे सौगी भिरी यरूशलेम सैहरे जो गेआ, कने तीतुसे जो भी सौगी लेई गेआ।

² मैं तित्थु तां गेआ क्जोकि परमात्मैं मिन्जो जाणे तांई ग्लाया; कने जाह़लू मैं तित्थु था तां मैं पड़दे नैं अगुआं नैं मिल्ली करी तिन्हां जो सैह़ सुसमाचार सणाया जेह्ड़ा मैं होरनी जातिआं दे लोकां जो सणांदा था, तांजे इआं ना होयैं कि जेह्ड़ा मैं करा दा था या जेह्ड़ा हुण करदा ऐ सैह़ बेकार होई जां।

³ अपर मेरा साथी तीतुस जेह्ड़ा इक्क यूनानी ऐ कने जिसदा खतणा नीं होएया था। अपर यरूशलेम सैहरे दिया कलीसिया दे अगुआं तिसियो अपनाया। तिन्हां तिसियो खतणा करणे तांई मजबूर नीं कित्ता।

⁴ एह़ तिन्हां झूठे भाऊआं दिया बज़ाह ते होएया, जेह्ड़े चोरी छिपे अहां दिया मंडल़िया च आईयो थे, कि तिसा अजादिया दा जेह्ड़ी यीशु मसीह च अहां जो मिलियो ऐ, भेत लेई करी अहां जो दास बणान।

⁵ इक्क बग्त भी तिन्हां नैं सेहमत होणा अहां नीं मन्नेया, इसतांई कि सुसमाचार जेह्ड़ा सच्च ऐ, तुहां च बणी रैंह्।

⁶ यरूशलेम सैहरे च कलीसिया दे अगुआं जेह्ड़ी सिक्षा मैं दिंदा ऐ, तिसा जो बदलणे तांई मिन्जो मजबूर नीं कित्ता, इसते मिन्जो कोई फर्क नीं पोंदा कि सैह़ अगुऐ कदेय हन; क्जोकि परमात्मा बाहरी दखावे जो दिक्खी नैं न्याय नीं करदा।

⁷ अपर इसदिया जगाह जाह़लू तिन्हां अगुआं दिख्या कि जिंआं यहूदी लोकां तांई परमात्मैं सुसमाचारे दा कम्म पतरसे जो दित्ता, तिंआं ई होरनी जातिआं जो सुसमाचार सणाणे दा कम्म मिन्जो दित्ता।

⁸ क्जोकि परमात्मैं पतरसे जो प्रेरित होणे तांई चुणेया कने यहूदी लोकां बिच्च बड़े सामर्थी दे कम्म करवाये, तिंआं ई तिन्हीं मिन्जो ते भी होरनी जातिआं दे लोकां बिच्च सैदेय सामर्थी दे कम्म करवाये,

⁹ कने जाह़लू तिन्हां तिस अनुग्रह जो जेह्ड़ा मिन्जो मिल्लेया था जाणी लेआ, तां याकूब, कने कैफा, कने यूहन्ना जेह्ड़े कलीसिया दे खम्भेयां साइआं समझे जांदे थे, मिन्जो कने बरनबासे जो संगतिया दा सज्जा हत्थ दित्ता कि अहां होरनी जातिआं दे लोकां अल्ल जान कने सैह़ यहूदी लोकां अल्ल जान।

¹⁰ तिन्हां अहां नैं सिर्फ एह़ विणती कित्ती कि अहां यरूशलेम सैहरे च गरीब बसुआसियां दी मदत करन, कने इस कम्मे जो करणे दी मैं अप्पु भी कोसस करदा था।

पौलुसे दिया बज़ाह ते पतरसे दा बरोध

¹¹ इक्की दिने बाद पतरस अन्ताकिया सैहरे च आया, तां मैं तिसदे मुँऐ पर तिसदा बरोध कित्ता, क्जोकि सैह़ ठीक कम्म नीं करा दा था।

¹² इसतांई कि याकूब दे पास्से ते कुच्छ लोकां दे ओणे ते पैहल्ले पतरस तिन्हां बसुआसियां सौगी खांदा था जेह्ड़े यहूदी लोक नीं थे, अपर यरूशलेम सैहरे ते ऐत्थु आएयो कुच्छ बसुआसियां दे डरे दे मारे जेह्ड़े याकूबें घल्लेयो थे, तिन्हां ते सैह़ दूर-दूर रैहणा लग्गा।

¹³ तिस सौगी कुच्छ यहूदी बसुआसियां भी ढोंग कित्ता, ऐत्थु तिकर कि बरनबास भी तिन्हां ते डरणा लग्गा, कने होरनी जातिआं ते दूर-दूर रैहणा लग्गा।

¹⁴ अपर जाह़लू मैं दिख्या कि सैह़ सुसमाचारे दी सच्चाईया पर सिध्धी चाल नीं चलदे, तां मैं सारेयां दे सामणै पतरसे नैं ग्लाया, “जाह़लू तू यहूदी होई नैं होरनी जातिआं साइआं चलदा ऐ कने यहूदियां साइआं नीं, तां तू होरनी जातिआं जो यहूदियां साइआं चलणे जो क्जो ग्लांदा ऐ?”

बसुआसे दे जरिये धर्मी बणना

¹⁵ अहां तां जन्म ते ई यहूदी हन, कने होरनी जातिआं साइआं पापी नीं हन।

¹⁶ तमी सैह़ जाणी करी कि माणु व्यबस्था दे कम्मां ते नीं, अपर सिर्फ यीशु मसीह पर बसुआस करणे दे जरिये धर्मी बणदा ऐ, अहां अप्पु भी यीशु मसीह पर बसुआस कित्ता कि अहां मूसा दिया व्यबस्था जो मन्नणे ते नीं, अपर मसीह पर बसुआस करणे ते धर्मी बणे; क्जोकि मूसा दिया व्यबस्था जो मन्नणे ते कोई माणु धर्मी नीं बणगा।

¹⁷ अहां जेह्ड़े मसीह च धर्मी बणना चांह़दे हन, जे अप्पु ई पापी बणन, तां क्या तिसदा मतलब एह़ ऐ कि मसीह अहां जो पापी बणांदा ऐ? नीं कदी भी नीं।

¹⁸ अपर जे मैं कुच्छ ढाई दैं, कने तिसियो भिरी बणाई दैं, तां मैं एह़ साबित करदा ऐ कि पैहल्ले मैं गलत था।

¹⁹ क्जोकि मैं मूसा दिया व्यबस्था दे जरिये व्यबस्था तांई मरी गेआ कि परमात्मे तांई जीयें।

²⁰ जाह़लू मसीह सूल़िया पर मरेया, तां मैं भी मरी गेआ, कने हुण जेह्ड़ा मिन्जो च जिन्दा ऐ, सैह़ मैं नीं अपर मसीह ऐ; कने हुण जिंआं मैं जीआ दा ऐ तां सिर्फ तिस बसुआसे दे जरिये जेह्ड़ा परमात्मे दे पुत्तरे पर ऐ, जिन्हीं मिन्जो नैं प्यार कित्ता कने मिन्जो तांई अपणे आप्पे जो देई दित्ता।

²¹ मैं परमात्मे दे अनुग्रह जो नीं टाल़दा, क्जोकि जे व्यबस्था दे जरिये माणु धर्मी बणदा ऐ, तां मसीह दा मरना बेकार हुंदा।