गलातियों 1 - काँगड़ी

नमस्कार

¹ मैं पौलुस जेह्ड़ा इक्क प्रेरित ऐ एह़ चिठ्ठी तुहां जो लिखदा ऐ, जेह्ड़ा कि ना तां माणुआं दे पास्से ते कने ना माणुये दे जरिये चुणेया था, अपर यीशु मसीह कने पिता परमात्मे दे जरिये जिन्हीं तिसियो मरेयां ते जिन्दा कित्ता।

² कने सारे भाऊआं दे पास्से ते जेह्ड़े मिन्जो सौगी हन, मैं एह़ चिठ्ठी गलातिया सैहरे दियां कलीसियां जो लिखदा ऐ।

³ मैं प्रार्थना करदा ऐ, कि पिता परमात्मे कने अहां दे प्रभु यीशु मसीह दे पास्से तुहां जो अनुग्रह कने सांति मिलदी रैंह्।

⁴ यीशु मसीयैं अपणी ज़िन्दगी अहां दे पापां तांई देई दित्ती, तांजे अहां दे परमात्मे दी कने पिता दिया इच्छा मताबक अहां जो इस बग्ते दे बुरे संसारे ते छड्डां।

⁵ तिसदी स्तुति कने बड़ेयाई जुगा-जुग हुंदी रैंह्। आमीन।

कोई दूआ सुसमाचार नीं

⁶ मिन्जो हरानी हुंदी कि जिन्हीं तुहां जो मसीह दे अनुग्रह च सद्देया तिसते तुहां इतणी तौल़ी फिरी करी दूईआं सिक्षां दे पास्से मुड़ी गै।

⁷ अपर सैह़ दूआ सुसमाचार ऐ ई नीं। अपर गल्ल एह़ ऐ कि कितणे ऐदेय हन जेह्ड़े तुहां जो डराई दिंदे हन, कने मसीह दे सुसमाचारे जो बिगाड़णा चांह़दे हन।

⁸ अपर जे अहां, या सुअर्ग ते कोई सुअर्गदूत भी तिस सुसमाचारे जो छड्डी करी जेह्ड़ा अहां जो सणाया ऐ, कोई होर सिक्षा तुहां जो दैं, तां परमात्मा तिन्हां जो सज़ा दैं।

⁹ जिंआं अहां पैहल्ले ग्लाई बैठेयो हन, तिंआं ई मैं हुण भिरी ग्लांदा ऐ, कि तिस सुसमाचारे जो छड्डी करी जिसियो तुहां मन्नेया ऐ, जे कोई दूई सिक्षा दिंदा ऐ, तां परमात्मा तिन्हां जो सज़ा दैं।

¹⁰ हुण मैं माणुआं जो नीं अपर परमात्मे जो खुस करणे दी कोसस करदा ऐ, मैं माणुआं जो खुस करणे दी कोसस नीं करदा ऐ। जे मैं हुण तिकर माणुआं जो खुस करा दा हुंदा, तां मसीह दा दास नीं हुंदा।

पौलुस किंआं चेला बणेया

¹¹ हे प्यारे साथी बसुआसियो, मैं तुहां जो दस्सी दिंदा ऐ, कि जेह्ड़ा सुसमाचार मैं सणाया ऐ, सैह़ लोकां दे पास्से ते नीं ऐ।

¹² क्जोकि सैह़ मिन्जो लोकां दे पास्से ते नीं पुज्जया, कने ना मिन्जो सखाया, अपर यीशु मसीह दे तेजे ते मिल्लेया।

¹³ तुहां एह़ सुणेया ऐ कि मैं पैहल्ले यहूदी व्यबस्था जो मनदा था, कने मैं परमात्मे दी कलीसिया दे लोकां जो बड़ा सतांदा कने नास करदा था।

¹⁴ कने अपणे मते सारे जाति भाऊआं ते जेह्ड़े मेरिया उम्रा दे थे, यहूदी व्यबस्था जो बड़ा मनदा था कने अपणे पूर्वजां दे रीति रिवाजां च बड़ा जोसीला था।

^15-16 अपर परमात्मे दी जाह़लू इच्छा होई कि मिन्जो च अपणे पुत्तरे जो प्रगट करैं, तिसा इच्छा जो पूरा करणे तांई तिन्हीं मिन्जो मेरे पैदा होणे ते पैहल्ले ई चुणी लेआ, कने अनुग्रह दे जरिये अपणे कम्मां तांई सद्दी लेआ। तांजे मैं होरनी जातिआं च तिसदा सुसमाचार सणा। इन्हां कम्मां दे बारे च मैं कुसी भी माणुये ते सलाह नीं लेई।

¹⁷ कने जेह्ड़े मिन्जो ते पैहल्ले दे प्रेरित चुणेयो थे, तिन्हां नैं मिलणे तांई मैं यरूशलेम सैहरे जो नीं गेआ। अपर जितणी तौल़ी होई सकेया अरब देसे जो चली गेआ कने तित्थु ते दुवारी दमिश्क सैहरे जो बापस आई गेआ।

¹⁸ भिरी त्रीं साल्लां बाद मैं पतरसे नैं मिलणे तांई यरूशलेम सैहरे जो गेआ, कने तिस अल्ल पन्दरां दिन रेह्आ।

¹⁹ अपर प्रभुये दे भाऊ याकूबे जो छड्डी करी मैं होर कुसी प्रेरित नैं नीं मिल्लेया।

²⁰ दिक्खा, जेह्ड़ियां गल्लां मैं तुहां जो लिखदा ऐ, परमात्मा जाणदा ऐ कि सैह़ सारियां सच्चियां हन।

²¹ यरूशलेम सैहरे जो छड्डणे दे बाद मैं सीरिया कने किलिकिया दे प्रदेसां च आया।

²² अपर यहूदिया प्रदेसे दियां कलीसियां जेह्ड़ियां मसीह च थियां, तिन्हां कलीसियां दे लोकां मिन्जो कदी नीं दिख्या था।

²³ अपर तिन्हां लोकां बार-बार ऐई सुणेया कि जेह्ड़ा अहां जो पैहल्लैं सतांदा था, सैह़ हुण तिसी बसुआसे दा सुसमाचार सणांदा ऐ जिसदे बारे च सैह़ पैहल्ले लोकां जो मसीह पर बसुआस करणे ते रोकदा था।

²⁴ परमात्मैं जेह्ड़ा बदलाव मेरिया ज़िन्दगिया च कित्ता, तिसियो दिक्खी करी सैह़ परमात्मे दी महिमा करदे थे।