इफिसियों 5 - काँगड़ी

जोत्ती दी औलाद बणा

¹ तुहां परमात्मे दे बच्चे हन, जिन्हां नैं सैह़ प्यार करदा ऐ, इसतांई तिस साइआं बणने दी कोसस करा,

² कने तुहां इक्की दूये नैं प्यार करा, जिंआं मसीयैं भी तुहां नैं कित्या ऐ, कने अहां दे पापां जो दूर करणे तांई अप्पु जो बलिदान करी दित्ता, कने परमात्मा खुस होएया, क्जोकि एह़ बलिदान तिस तांई मिठ्ठी खुसबुया साइआं होएया।

³ तुहां परमात्मे दे लोक हन, इसतांई ऐत्थु तिकर कि तुहां बिच्च ब्यभिचार कने कुसी भी किस्मा दियां गंदियां चीज्जां या लालचे दी झलक भी नीं होणी चाइदी;

⁴ कने ना ई गंदियां, ना ई मूर्खता दियां कने ना ई मजाके दियां घटिया गल्लां होणा चाइदियां; क्जोकि एह़ गल्लां तुहां जो सोभा नीं दिंदियां, अपर इसदिया जगाह तुहां जो परमात्मे दा धन्यावाद करणा चाइदा।

⁵ क्जोकि तुहां एह़ खरे कित्ते जाणदे हन कि कोई भी ब्यभिचारी, या गंदे कम्म करणे आल़ा, या लालची माणु, जेह्ड़ा मूर्तिपूजा दे बराबर ऐ, मसीह कने परमात्मे दे राज्जे च कदी भी हिस्सेदार नीं हुंगा।

⁶ कोई तुहां जो एह़ ग्लाई नैं धोखा नीं दैं, कि जेह्ड़े लोक ऐदेय पाप करदे हन, परमात्मा तिन्हां लोकां जो सज़ा नीं दिंगा।

⁷ इसतांई तुहां इन्हां बुरेयां कम्मां जो करी नैं तिन्हां दे साझीदार मत बणा।

जोतिया च चला

⁸ क्जोकि तुहां तिन्हां लोकां साइआं थे, जेह्ड़े नेहरे च रैंह्दे हन, अपर हुण प्रभु च जोतिया दे लोक हन, क्जोकि तुहां प्रभु दे लोक हन, इसतांई जोतिया दे लोकां साइआं ज़िन्दगी जीआ।

⁹ क्जोकि जे इक्क माणुये जोतिया च ऐ, तां तिसदा बर्ताब कने चाल-चलण खरा धर्मी कने भरोसे जोग्गा ऐ।

¹⁰ कने एह़ समझणे दी कोसस करा कि प्रभु जो क्या खरा लगदा ऐ।

¹¹ जेह्ड़े गंदे कम्म नेहरे च हुंदे हन, तिन्हां च साझी मत बणा, अपर लोकां जो दस्सा, कि एह़ कम्म गलत हन।

¹² क्जोकि तिन्हां लोकां दे बुरे कम्मां दी चर्चा करणा भी सर्मा दी गल्ल ऐ।

¹³ अपर जाह़लू कोई चीज्ज जोतिया दे जरिये सामणै ओंदी ऐ तां सैह़ सबना जो साफ-साफ दुस्सदी ऐ, क्जोकि जेह्ड़ी सब कुच्छ साफ-साफ दस्सदी ऐ सैह़ जोत्ती ऐ।

¹⁴ इसतांई इक्क काहवत ऐ, जेह्ड़ी एह़ दस्सदी ऐ, “हे सोणे आल़े, जाग! कने मुड़देयां ते जिन्दा होई जा; तां मसीह अपणिया जोतिया जो तिज्जो पर चमकांगा।”

¹⁵ इसतांई ध्याने नैं दिक्खा, कि तुहां अपणिया ज़िन्दगिया जो किंआं जीआ दे हन, वेअक्लेयां साइआं नीं अपर अक्लमंदा साइआं ज़िन्दगी जीआ।

¹⁶ अपणे हर इक्क मौके जो अक्ला नैं इस्तेमाल कर, क्जोकि दिन बुरे हन।

¹⁷ इसतांई बेअक्ले मत बणा, अपर ध्याने नैं समझा कि प्रभु तुहां ते क्या चांह़दा ऐ।

¹⁸ नशे च मतवाल़े होई नैं अपणे आप्पे जो नास मत करा, क्जोकि इसते लोक अपणे आप्पे ते बाहर होई जांदे हन, अपर इसदिया जगाह पवित्र आत्मा जो मौका देआ कि सैह़ तुहां जो काबू करैं,

¹⁹ कने अप्पु च भजन कने स्तुति गीत कने आत्मिक गीत गा करा, कने अपणे-अपणे मने च प्रभु दे सामणै गांदे कने स्तुति करदे रेह्आ।

²⁰ कने सदा सारियां गल्लां तांई अहां दे प्रभु यीशु मसीह दे नांऐ ते परमात्मे पिता दा धन्यावाद करदे रेह्आ।

²¹ मसीह च आदर रखणे दिया बज़ाह ते इक्की दूये दे अधीन रेह्आ।

लाड़ा कने लाड़ी

²² हे लाड़ियो, अपणे-अपणे लाड़े दे इआं अधीन रेह्आ जिंआं तुहां प्रभु दे अधीन हन।

²³ क्जोकि लाड़ा तां लाड़िया दा सिर ऐ जिंआं मसीह कलीसिया दा उद्धारकर्ता ऐ जेह्ड़ा तिसदा सरीरे ऐ।

²⁴ जिंआं कलीसिया मसीह दे अधीन हन, तिंआं ई लाड़ियां भी हर गल्ला च अपणे-अपणे लाड़े दे अधीन रैह़न।

²⁵ हे लाड़ेयो, अपणिया-अपणिया लाड़िया नैं प्यार रखा जिंआं मसीयैं भी कलीसिया नैं प्यार करी नैं अपणे आप्पे जो तिसा तांई बलिदान करी दित्ता।

²⁶ तांजे तिसदे वचने जो कलीसिया पर प्रगट करी नैं तिसियो तिसदे पापां ते सुद्ध करी सकैं, ठीक तिंआं ई जिंआं लोक कुसी चीज्जा जो धोई करी साफ करदे हन।

²⁷ कने तिसियो इक्क ऐदई तेजस्वी कलीसिया बणाई नैं अप्पु अल्ल लेई औयें, जिसा च ना कलंक, ना झुर्री, ना कोई ऐदई चीज्ज होयैं, अपर सैह़ पवित्र कने बेकसूर होयैं।

²⁸ इसी तरीके नैं ठीक ऐ, कि लाड़े अपणियां-अपणियां लाड़ियां नैं अपणे सरीरे साइआं प्यार रखन। जेह्ड़ा अपणिया लाड़िया नैं प्यार रखदा ऐ, सैह़ अपणे आप्पे नैं प्यार रखदा ऐ।

²⁹ क्जोकि कुणी भी कदी अपणे सरीरे नैं बैर नीं रखेया अपर तिसदी देखभाल करदा ऐ, जिंआं मसीह भी कलीसिया दी देखभाल करदा ऐ।

³⁰ इसतांई कि अहां तिसदे सरीरे दे अंगा साइआं हन।

³¹ जिंआं पवित्रशास्त्रे च लिख्या ऐ, “माणु अपणे माँऊ-बुढ़े जो छड्डी नैं अपणिया लाड़िया सौगी रैंह्गा कने सैह़ दोयो इक्की सरीरे साइआं हुंगे।”

³² एह़ इक्क बड्डा भेत ऐ, अपर मैं एह़ समझदा ऐ कि एह़ मसीह कने कलीसिया दे पास्से इसारा करदा ऐ।

³³ अपर तुहां च हर इक्क अपणिया लाड़िया नैं अप्पु साइआं प्यार रखैं, कने लाड़ी भी अपणे लाड़े दा इज्जत करैं।