इफिसियों 3 - काँगड़ी

होरनी जातिआं च पौलुसे दी सेवा

¹ इसा बज़ाह ते मैं पौलुस तुहां तांई प्रार्थना करदा ऐ। मैं जेला च ऐ क्जोकि मैं तुहां होरनी जातिआं जो सुसमाचार सणाई नैं प्रभु यीशु मसीह तांई सेवा करदा ऐ —

² तुहां जेह्ड़ा सुणेया सैह़ सच्च ऐ, कि मिन्जो परमात्मे अपणे अनुग्रह दे जरिये तुहां जो सुसमाचार सणाणे दी जिम्मेवारी दित्तियो ऐ,

³ जिंआं मैं पैहल्ले ई थोड़े सब्दां च लिखी चुकेया, कि परमात्मे अप्पु ई सैह़ गुप्त योजनां मिन्जो पर प्रगट कित्तियां हन।

⁴ जाह़लू तुहां तिसा चिठ्ठिया जो जेह्ड़ी मैं तुहां जो लिखियो ऐ पढ़दे हन, तुहां समझी सकदे हन कि मैं मसीह दे तिन्हां भेतां जो कितणा खरी कित्ते समझदा।

⁵ पराणे जमाने च परमात्मे एह़ भेत लोकां पर प्रगट नीं कित्ता, जिंआं कि आत्मा दिया बज़ाह ते हुण तिसदे पवित्र प्रेरितां कने भविष्यवक्तां पर प्रगट कित्या ऐ।

⁶ मतलब एह़ कि यीशु मसीह च सुसमाचारे दे जरिये होरनी जातिआं दे लोक सैई आसीषां हासल करदे हन, कने तिसी सरीरे दे हिस्से कने तिस वादे दे जेह्ड़ा परमात्मे यहूदी लोकां सौगी कित्या था साझी हन।

⁷ परमात्मे दे अनुग्रह कने सामर्थी दे जरिये सुसमाचार सणाणे तांई तिसदा सेवक बणेया ऐ।

⁸ मिन्जो पर जेह्ड़ा सारे परमात्मे दे लोकां च लोक्के ते भी लोक्का ऐ, परमात्मे दा एह़ अनुग्रह मिन्जो पर होएया, मैं होरनी जातिआं जो सैह़ सुसमाचार सणा, कि यीशु मसीह ऐदिआं आसीषां दा जरिया ऐ, जिन्हां दी कोई सीमा नीं ऐ,

⁹ क्जोकि परमात्मे एह़ सारियां चीज्जां सृष्टिया ते सुरू ते ई गुप्त रखियां थियां, तांजे तिन्हां जो हुण मैं तुहां सारेयां जो दस्सी सकैं।

¹⁰ तांजे हुण कलीसिया दे जरिये परमात्मे दा पूरा ज्ञान तिन्हां प्रधानां कने अधिकारियां पर जेह्ड़े आत्मिक जगांह च हन, तिन्हां पर प्रगट कित्ता जां।

¹¹ परमात्मे इसदी योजना सृष्टिया जो बणाणे ते पैहल्ले कित्तियो थी, जिसा जो तिन्हीं प्रभु यीशु मसीह दे जरिये पूरा कित्ता।

¹² अहां मसीह च बसुआस करदे हन, इसा बज़ाह ते अहां निडर होई नैं परमात्मे दिया हजुरिया च आई सकदे हन।

¹³ मतलब एह़ कि अहां जो दुखां दिया बज़ाह ते हौंसला नीं छड्डणा चाइदा, क्जोकि एह़ सारे तुहां दे फायदे तांई हन।

मसीह दा प्यार

¹⁴ मैं इसा बज़ाह ते तिस पिता परमात्मे दे सामणै गोड्डे टेकदा कने प्रार्थना करदा ऐ,

¹⁵ सैह़ इक्क ई ऐ, जेह्ड़ा बसुआसियां दे पूरे परवारे दा पिता ऐ, जेह्ड़ा सुअर्गे कने धरतिया पर ऐ,

¹⁶ मैं प्रार्थना करदा ऐ, कि सैह़ अपणिया महिमा दे तिन्हां खजानेयां ते तुहां जो एह़ दान दैं जिसदी कोई सीमा नीं ऐ। तिसदी आत्मा तुहां जो सामर्थ दैं कने तुहां दा अंदरूनी माणु ताकतवर हुंदा जा।

¹⁷ इसतांई बसुआसे दे जरिये मसीह तुहां दे मनां च बसें कि तुहां प्यारे च जड़ पकड़ी नैं कने नींई भरी नैं,

¹⁸ तुहां सारे परमात्मे दे लोक खरे कित्ते जाणी लैंगे, कि मसीह अहां नैं बगैर कुसी सर्ता ते कितणा प्यार करदा ऐ,

¹⁹ कने मैं प्रार्थना करदा ऐ, कि तुहां मसीह दे तिस प्यारे जो जाणी सकन, जिसते तुहां दा सभाव परमात्मे दे सभावे साइआं बणी जां।

^20-21 जितणा अहां परमात्मे ते मंगदे कने सोचदे हन, तिसते भी जादा करी सकदा ऐ, क्जोकि तिसदी सामर्थ अहां च कम्म करदी ऐ। कलीसिया च कने यीशु मसीह च तिसदी महिमा पीढ़ी ते पीढ़ी तिकर जुगा-जुग हुंदी रैंह्। आमीन।