इफिसियों 1 - काँगड़ी

¹ मैं पौलुस जेह्ड़ा परमात्मे दिया इच्छा ते यीशु मसीह दा इक्क प्रेरित ऐ, मैं एह़ चिठ्ठी इफिसुस सैहरे च रैहणे आल़े पवित्र कने यीशु च बसुआस करणे आल़े लोकां दे नांऐ पर लिखदा ऐ।

² मैं प्रार्थना करदा ऐ कि अहां दे पिता परमात्मे कने प्रभु यीशु मसीह दिया तरफा ते तुहां जो अनुग्रह कने सांति मिलदी रैंह्।

मसीह च आत्मिक आसीषां

³ अहां दे प्रभु यीशु मसीह दे पिता परमात्मे दी स्तुति होयैं, क्जोकि तिन्हीं अहां जो सुअर्गे ते मसीह सौगी अहां दे रिस्ते दिया बज़ाह ते हर किस्मां दियां आत्मिक आसीषां दित्तियां हन।

⁴ खास करी नैं मसीह सौगी अहां दे रिस्ते दिया बज़ाह ते परमात्मे अहां जो इस संसारे जो बणाणे ते पैहल्ले चुणी लेआ। तांजे सैह़ अहां जो पवित्र कने बेकसूर समझैं।

⁵ क्जोकि परमात्मे अहां नैं प्यार कित्ता, कने एह़ फैसला कित्ता, कि सैह़ अहां जो यीशु मसीह दे जरिये अपणे बच्चेयां साइआं गोद लैं।

⁶ तांजे अहां तिसदे अनुग्रह तांई जेह्ड़ा तिन्हीं अहां जो मुफ्ते च देई दित्या ऐ, कने जेह्ड़ा बड़ा भरी ऐ कने तिसदी महिमा तांई स्तुति दी बज़ाह होन। क्जोकि अहां तिसदे पुत्तरे सौगी जिस नैं सैह़ प्यार करदा इक्क होई गियो हन।

⁷ मसीयैं अहां दे छुटकारे तांई अपणा खून बहाई नैं अपणी ज़िन्दगी बलिदान करी दित्ती, जिसदा मतलब एह़ ऐ, कि हुण अहां दे पाप ते माफ होई गियो हन। कने परमात्मे दा अनुग्रह कितणा म्हान ऐ, जेह्ड़ा तिन्हीं अहां जो बड़ा भरी दित्या ऐ।

⁸ जिसियो तिन्हीं सारिया समझा कने ज्ञाने सौगी अहां पर मता सारा कित्ता।

⁹ क्जोकि तिन्हीं अपणिया इच्छा दा भेत अहां पर अपणे खरे मकसदे मताबक प्रगट कित्ता, जिसदी नीई तिन्हीं अप्पु ई मसीह च रखी।

¹⁰ जाह़लू इस मकसदे जो पूरा करणे दा बग्त ओंगा, तां परमात्मा सारियां चीज्जां जेह्ड़ियां सुअर्गे च कने धरतिया पर हन, मसीह दे बसे च करगा, तांजे मसीह तिन्हां ऊपर राज्ज करैं।

¹¹ इसते अलावा क्जोकि अहां मसीह सौगी इक्क हन, अहां जो परमात्मे दे पास्से ते विरासत मिलियो ऐ। क्जोकि तिन्हीं अहां जो पैहल्ले ते चुणी लेआ ऐ, कने तिसदिया मर्जिया मताबक ई सारियां चीज्जां कम्म करदियां हन।

¹² अहां यहूदी लोकां जिन्हां सबते पैहल्लैं मसीह च आस रखी, कने चुणे गै, तांजे अहां परमात्मे दी महिमा तांई स्तुति दी बज़ाह होन।

¹³ कने तिस च तुहां पर भी, जाह़लू तुहां सच्च दा वचन सुणेया जेह्ड़ा तुहां दे उद्धारे दा सुसमाचार ऐ कने जिस पर तुहां बसुआस कित्ता, परमात्मे तुहां जो वादे दी पवित्र आत्मा एह़ दस्सणे तांई दित्ता, कि तुहां तिसदे हन।

¹⁴ जेह्ड़ा इक्क बयाना ऐ, कने सैह़ जमानत दिंदा ऐ कि परमात्मा अहां जो सैह़ विरासत दिंगा, जिसा जो दैणे दा तिन्हीं अहां नैं वादा कित्या ऐ, कने तिन्हीं अहां जो अपणे लोक होणे तांई खरीदी लेआ, कि तिसदी महिमा तांई स्तुति दी बज़ाह होन।

पौलुसे दी प्रार्थना

¹⁵ इसा बज़ाह ते, जाह़लू ते मैं प्रभु यीशु पर तुहां दे बसुआसे कने परमात्मे दे सारे लोकां तांई तुहां दे प्यारे दे बारे च समाचार सुणी नैं,

¹⁶ मैं हमेसा तुहां तांई परमात्मे दा धन्यावाद कने अपणिया प्रार्थना च तुहां जो याद करदा ऐ।

¹⁷ कि अहां दे प्रभु यीशु मसीह दा परमात्मा जेह्ड़ा महिमा दा पिता ऐ, तुहां जो अपणा आत्मिक ज्ञान कने समझ दैं,

¹⁸ मैं प्रार्थना करदा ऐ, कि परमात्मा तुहां दे मनां जो खोलें, तांजे तुहां तिसदी सदणे दिया आसा जो समझी सकन। जिसते तुहां जाणगे, कि सैह़ आसीषां कितणियां म्हान कने महिमा आल़िआं हन, जिन्हां दा परमात्मे अपणे लोकां सौगी वादा कित्या ऐ,

¹⁹ कने तिसदी सामर्थ अहां च जेह्ड़े मसीह च बसुआस करदे हन कितणी म्हान ऐ, एह़ सैई अनोखी सामर्थ ऐ,

²⁰ जेह्ड़ी तिन्हीं मसीह जो मरेयां ते जिन्दा करणे तांई इस्तेमाल कित्ती, कने तिसियो सुअर्गीय जगाह च अपणे सज्जे पास्से बठाल़ेया,

²¹ तिसा जगाह च परमात्मे तिसियो सारियां हकुमता, हक्क, सामर्थ, प्रभुता, कने हर इक्की नांऐ ऊपर बड़ी ऊची पदवी दित्ती, जेह्ड़ी ना सिर्फ इस जुगे च, अपर हमेसा तिकर रैंह्गी,

²² कने सब कुच्छ तिसदे बसे च करी दित्ता; कने तिसियो सारियां चीज्जां पर मुखिया बणाई नैं कलीसिया दिया भलाईया तांई देई दित्ता,

²³ इसतांई मसीह सिरे साइआं ऐ, कने कलीसिया तिसदे सरीरे साइआं ऐ, कने कलीसिया मसीह नैं भरोईयो ऐ, जेह्ड़ा तिसदिया मौजूदगिया सौगी सारियां चीज्जां हर जगाह भरदा ऐ।