कुलुस्सियों 3 - काँगड़ी

¹ इसतांई जाह़लू तुहां मसीह सौगी मरेयां ते जिन्दे कित्ते गै, तां तिन्हां चीज्जां दी इच्छा करदे रेह्आ, जेह्ड़ियां परमात्मे तुहां तांई सुअर्गे च रखियां हन, जित्थु मसीह अज्ज भी ऐ, कने परमात्मे दे सज्जे बक्खे बैठेया ऐ।

² धरती दियां चीज्जां पर नीं, अपर तिन्हां चीज्जां दी इच्छा करदे रेह्आ, जेह्ड़ियां परमात्मे तुहां तांई सुअर्गे च रखियां हन।

³ क्जोकि तुहां तां अपणे पापी सभावे च मरी गियो थे, कने तुहां दी ज़िन्दगी मसीह सौगी परमात्मे च छुपियो ऐ।

⁴ जाह़लू मसीह, जेह्ड़ा तुहां जो नौई ज़िन्दगी दिंदा ऐ, जाह़लू इस संसारे च दुवारी बापस ओंगा, ताह़लू तुहां भी ओंगे, कने तिसदी महिमा च हिस्सेदार बणगे।

पराणी ज़िन्दगी कने नौई ज़िन्दगी

⁵ इसतांई बुरे कम्मां करणा छड्डी देआ, जेह्ड़े तुहां दे पापी सभावे सौगी जुड़ेयो हन, जेह्ड़े धरतिया पर हन, मतलब ब्यभिचार, मने च गंदगी, वासना, बुरी सोच। कने लालची मत बणा जेह्ड़ा मूर्तिपूजा दे साइआं ऐ।

⁶ क्जोकि लोक इन्हां बुरे कम्मां करदे हन, परमात्मा जरूर इन्हां लोकां जो कड़ी सज़ा दिंगा।

⁷ कने तुहां भी, जाह़लू इन्हां बुरे कम्मां च ज़िन्दगी बितांदे थे, तां तुहां भी ऐदई बुरे कम्मां जो करदे थे।

⁸ अपर हुण तुहां भी इन्हां सारेयां जो, मतलब गुस्सा, रोष, बैरभाव, निंदा कने मुँऐ ते गालियां बकणा, इन्हां सारियां गल्लां जो करणा छड्डी देआ।

⁹ इक्की दूये नैं झूठ मत ग्ला, क्जोकि तुहां अपणे पराणे पापी सभावे जो कने बुरे कम्मां जो छड्डी दित्या ऐ।

¹⁰ कने हुण तुहां नौये सभावे जो अपनाई लेआ ऐ, एह़ नौआं सभाव जादा ते जादा अपणे बणाणे आल़े साइआं बणदा जांदा ऐ, कने तिसियो खरे कित्ते समझगा।

¹¹ इसा बज़ाह ते तिस च ना तां यूनानी रेह्आ ना यहूदी, ना खतणा ना बगैर खतणा ते, ना परदेसी ना स्कूती, ना दास कने ना अजाद माणु सिर्फ मसीह ई सबना ते म्हान ऐ, कने अहां सबना च जींदा ऐ।

¹² इसतांई परमात्मे तुहां जो तिसदे पवित्र लोक होणे तांई चुणेयां, कने तुहां नैं प्यार करदा ऐ, बड़ी दया, कने बड़ी भलाई, बड़ी दीनता, कने बड़ा नरम सभाव, कने अपणे आप्पे च सेहनसक्ति रखा।

¹³ कने जे कुसी जो कुसी पर दोस लगाणे दी कोई बज़ाह होयैं, तां इक्की दूये दी झेली लेआ कने इक्की दूये दे अपराधां जो माफ करा; जिंआं प्रभुयैं तुहां दे अपराध माफ कित्ते, तिंआं ई तुहां भी करा।

¹⁴ अपर सबना ते बड्डी गल्ल एह़ ऐ, कि इक्की दूये नैं प्यार भाव बणाई रखा। इआं करणे नैं तुहां इक्क जुट होई जांगे।

¹⁵ जेह्ड़ा सांति मसीह दिंदा ऐ, तिसा जो अपणे मने च राज्ज करणा देआ। क्जोकि तुहां सारे इक्की सरीरे दे अंग हन, कने तुहां सबना जो इक्की दूये सौगी सांति च रैहणे तांई सद्देया ऐ, कने तुहां हमेसा धन्यावादी बणी रेह्आ।

¹⁶ हर बग्त तुहां मसीह दे वचने दे बारे च सोचदे रेह्आ, तांजे जेह्ड़ा कुच्छ करदे कने सोचदे हन, तिसियो काबू च रखा। कने बड़ी समझदारिया नैं इक्की दूये जो सखा कने सलाह देआ, कने अपणे-अपणे मने च धन्यावाद करी नैं परमात्मे तांई भजन कने स्तुति गीत कने आत्मिक गीत गा।

¹⁷ वचने च या कम्मे च जेह्ड़ा कुच्छ भी करा सब प्रभु यीशुये दे नांऐ नैं करा, कने प्रभु यीशुये दे जरिये पिता परमात्मा दा धन्यावाद करा।

नौईआ ज़िन्दगिया दे परिवारिक नियम

¹⁸ हे लाड़ियो, तुहां जो अपणे लाड़े दे अधीन रैहणा चाइदा, क्जोकि प्रभु दे पचांह़ चलणे तांई ऐई ठीक ऐ।

¹⁹ हे लाड़ेयो, अपणिया-अपणिया लाड़िया नैं प्यार रखा, कने तिन्हां सौगी खरा बर्ताब करा।

²⁰ हे जागतो, सारियां गल्लां च जेह्ड़ियां तुहां करदे हन, अपणे-अपणे माँऊ-बुढ़े दे हुक्मे दा पालण करा, क्जोकि प्रभु इसते खुस हुंदा ऐ।

²¹ हे बच्चे आल़ेयो, अपणे जागतां जो बार-बार झिड़की नैं तंग मत करा, इआं ना होयैं कि तिन्हां दी हिम्मत टूटी जां।

²² हे दासो, मेरी सलाह एह़ ऐ कि तुहां सारियां गल्लां च तिन्हां लोकां दा हुक्म मना, जेह्ड़े इसा धरतिया पर तुहां दे मालक हन। तिन्हां साइआं नीं, जेह्ड़े माणुआं जो खुस करणे तांई इआं करदे हन, अपर परमात्मे दे डरे च कने सच्चाईया च ।

²³ जेह्ड़ा कुच्छ तुहां करदे हन, तिसियो पूरे मने नैं करा, एह़ समझी नैं कि माणुआं तांई नीं अपर प्रभु तांई करदे हन।

²⁴ क्जोकि तुहां जाणदे हन, कि तुहां जो इसदे बदले प्रभुये ते इनाम मिलगा। तुहां प्रभु यीशु मसीह दी सेवा करदे हन।

²⁵ क्जोकि जेह्ड़ा बुरा करदा ऐ, परमात्मा तिन्हां जो सज़ा दिंगा, परमात्मा तित्थु कुसी नैं पक्षपात नीं करगा।