प्रेरितां दे कम्म 9 - काँगड़ी

शाऊले दा मन बदलणा

¹ शाऊल जेह्ड़ा अह्ल्ली तिकर प्रभु यीशुये दे चेलेयां जो धमकाणे कने मारने दी धुना च था, महायाजके अल्ल गेआ।

² कने तिसते दमिश्क सैहरे दे आराधनालयां दे नांऐ पर इस मतलब जो लेई करी चिठ्ठी मंगी कि क्या मरद क्या जणासां जेह्ड़े यीशु मसीह दियां सिक्षां पर चलदे हन, तिन्हां जो सैह़ बन्नी करी यरूशलेम सैहरे जो लेई आये।

³ अपर शाऊल कने जिस सौगी कुच्छ लोक चलदे-चलदे जाह़लू सैह़ दमिश्क सैहरे अल्ल पुज्जे, तां चाणचक अम्बरे ते शाऊल दे चौंन्नी पास्से ते बिजल़ी चमकी,

⁴ कने सैह़ धरतिया पर पेई गेआ, कने प्रभु दी एह़ उआज़ सुणी, “हे शाऊल, हे शाऊल, तू मिन्जो क्जो सतांदा ऐ?”

⁵ तिन्हीं पुछया, “हे प्रभु, तू कुण ऐ?” तिन्हीं ग्लाया, “मैं यीशु ऐ, जिसियो तू सतांदा ऐ।

⁶ अपर हुण उठी करी सैहरे जो जा, कने जेह्ड़ा मैं चांह़दा ऐ तू करैं, सैह़ तिज्जो नैं दस्सेया जांगा।”

⁷ जेह्ड़े माणु तिस सौगी थे, सैह़ भोचके रेई गै; क्जोकि उआज़ा तां सुणांदे थे अपर तिन्हां जो कोई नीं दुस्सा करदा था।

⁸ ताह़लू शाऊल धरतिया पर पेआ था उठेया, अपर जाह़लू अखीं खोलियां तां तिसियो कुच्छ नीं दुस्सा करदा था, कने सैह़ तिसदा हत्थ पकड़ी नैं दमिश्क सैहरे च लेई गै।

⁹ सैह़ तीन दिन तिकर नीं दिक्खी सकेया, कने ना खादा ना पीता।

शाऊले दा बपतिस्मा

¹⁰ दमिश्क सैहरे च हनन्याह नांऐ दा इक्क चेला था, तिस नैं प्रभु यीशुयैं दर्शन देई करी ग्लाया, “हे हनन्याह।” तिन्हीं ग्लाया, “हाँ प्रभु।”

¹¹ ताह़लू प्रभुयैं तिस नैं ग्लाया, “उठी करी तिसा गलिया च जा जिसा दा नां ‘सिध्धी’ ऐ, कने यहूदा दे घरैं शाऊल नांऐ दा इक्क तरसुसवासी जो पुछ; क्जोकि दिक्ख, सैह़ प्रार्थना करा दा ऐ,

¹² तिन्हीं दर्शने च दिख्या कि हनन्याह नांऐ दे इक्की माणुयैं आई नैं तिस पर हत्थ रखेया कि सैह़ दुवारी दिक्खणा लग्गी पोयैं।”

¹³ हनन्याह जवाब दित्ता, “हे प्रभु मैं इस माणुये दे बारे च मतेआं ते सुणेया ऐ कि इन्हीं यरूशलेम सैहरे च तेरे पवित्र लोकां सौगी बड़ा बुरा कित्या ऐ।

¹⁴ कने इसियो प्रधान याजकां ते एह़ हक्क दित्या ऐ, कि जेह्ड़े लोक तिज्जो पर बसुआस करदे हन, तिन्हां सारेयां जो बन्दी बणाई करी यरूशलेम सैहरे जो लेई जा।”

¹⁵ अपर प्रभु यीशुयैं तिस नैं ग्लाया, “तू चली जा; क्जोकि सैह़ तां होरनी जातिआं कने राजेयां, कने इस्राएली लोकां दे सामणै मेरे बारे च दस्सणे तांई मेरा चुणेया जण ऐ।

¹⁶ कने मैं तिसियो दस्सगा, कि लोकां जो मेरे बारे च दस्सणे तांई तिसियो कदेया-कदेया दुख झेलणा पोंगा।”

¹⁷ ताह़लू हनन्याह उठी करी तिस घरे च गेआ, जित्थु शाऊल रैंह्दा था, कने तिस पर अपणा हत्थ रखी करी ग्लाणा लग्गा, “हे भाऊ शाऊल, प्रभु यीशु, जेह्ड़ा तिस रस्ते च, जिसते तू आया तिज्जो दुस्सेया था, तिन्हीं मिन्जो घल्लेया ऐ, कि तू दिक्खणा लग्गी पोयैं कने पवित्र आत्मा नैं भरोई जां।”

¹⁸ कने इकदम तिसदियां अखीं च छिलके साइआं कोई चीज्ज पेई कने सैह़ दिक्खणा लग्गी पेआ, कने उठी करी बपतिस्मा लेआ,

¹⁹ कने भिरी खाणा खाई करी ताकत पाई, सैह़ कुच्छ दिन तिकर दमिश्क सैहरे च तिन्हां चेलेयां सौगी रेह्आ।

दमिश्क सैहरे च शाऊल दे जरिये प्रचार

²⁰ कने सैह़ तिसी बग्त दमिश्क सैहरे दे आराधनालयां च यीशुये दा प्रचार करणा लग्गा, कि यीशु ई परमात्मे दा पुत्तर ऐ।

²¹ सारे सुणने आल़े हरान होई करी ग्लाणा लग्गे, “क्या एह़ सैई माणु नीं ऐ जेह्ड़ा यरूशलेम सैहरे च जेह्ड़े यीशु मसीह दे बसुआसी थे, तिन्हां जो मारदा था; कने ऐत्थु भी इसतांई आया ऐ, कि तिन्हां जो पकड़ी करी प्रधान याजकां अल्ल लेई जां।”

²² अपर शाऊल होर भी जादा यीशु मसीह दे बारे च दस्सदा गेआ, कने इसा गल्ला दा सबूत देई करी कि मसीह ऐत्थु ई ऐ, दमिश्क सैहरे दे रैहणे आल़े यहूदी अगुआं दा मुँ बंद करदा रेह्आ।

²³ जाह़लू मते दिन होई गै, तां यहूदी अगुआं तिसियो मारने दी योजना बणाई।

²⁴ अपर तिन्हां दी योजना शाऊले जो पता लग्गी गेई। सैह़ तां तिसियो मारने तांई रात दिन फाटकां पर ताक्का च लगेयो रैंह्दे थे।

²⁵ अपर रातियो तिसदेयां चेलेयां तिसियो टोकरे च बठाया, कने सैहर दी चार दीवारी ते लटकाई करी लौआई दित्ता।

यरूशलेम सैहरे च शाऊल

²⁶ शाऊल यरूशलेम सैहरे जो गेआ, कने तिन्हीं चेलेयां सौगी मिल्ली जाणे दी कोसस कित्ती; अपर सारे तिसते डरदे थे, क्जोकि तिन्हां जो बसुआस नीं हुंदा था, कि सैह़ भी चेला ऐ।

²⁷ अपर बरनबास तिसियो अपणे सौगी प्रेरितां अल्ल लेई गेआ कने तिन्हां नैं ग्लाया, कि इन्हीं कुस तरीके नैं दमिश्क सैहरेयो जाणे दे रस्ते च प्रभु यीशुये जो दिख्या, कने तिन्हीं इस नैं गल्लां कित्तियां; भिरी दमिश्क सैहरे च इन्हीं बड़िया हिम्मता नैं यीशुये दे नांऐ दा प्रचार कित्ता।

²⁸ सैह़ तिन्हां सौगी यरूशलेम सैहरे च ओंदा जांदा रेह्आ।

²⁹ कने बेझिझक होई करी प्रभु यीशुये दे नांऐ दा प्रचार करदा; कने यूनानी भासा ग्लाणे आल़े यहूदियां सौगी गल्लबात कने बैंह्सबाजी करदा था; अपर सैह़ तिसियो मारने दी कोसस करणा लग्गे।

³⁰ एह़ जाणी करी भाऊ तिसियो कैसरिया सैहरे च लेई आये, कने तरसुस सैहरे जो घल्ली दित्ता।

³¹ इस तरांह सारे यहूदिया, गलील प्रदेस, सामरिया प्रदेसे च कलीसिया जो चैन मिल्ला, कने सैह़ बसुआसे च बधदी गेई। कने सैह़ प्रभु दे डरे कने पवित्र आत्मा दी सांति कने गिणतिया च बधदी गेई।

लुद्दा कने याफा सैहरे च पतरस

³² भिरी इआं होएया कि पतरस तिन्हां सारे प्रदेसां च फिरदा-फिरदा तिन्हां पवित्र लोकां अल्ल भी गेआ, जेह्ड़े लुद्दा सैहरे च रैंह्दे थे।

³³ तित्थु तिसियो एनियास नांऐ दा इक्क अधरंगे दा इक्क रोगी माणु मिल्ला, जेह्ड़ा अठां साल्लां ते मंजोल़ूये पर पेआ था।

³⁴ पतरसैं तिस नैं ग्लाया, “हे एनियास। यीशु मसीह तिज्जो खरा करदा ऐ उठ अपणे बछाणे चुक।” ताह़लू सैह़ झट उठी खड़ोता।

³⁵ ताह़लू लुद्दा सैहरे दे कने शारोन सैहरे दे सारे रैहणे आल़े तिसियो दिक्खी करी बसुआस करी नैं प्रभु यीशुये दे पास्से फिरे।

दोरकासा जो ज़िन्दगी दान

³⁶ याफा सैहरे च तबीता मतलब दोरकास नांऐ दी इक्क बसुआसणी रैंह्दी थी। सैह़ मते खरे-खरे कम्म कने गरीबां जो दान दिंदी थी।

³⁷ जाह़लू पतरस लुद्दा सैहरे च था, तिन्हां दिनां च सैह़ बमार होई करी मरी गेई; कने तिन्हां तिसायो नौआई करी बोड़ी रखी दित्ता।

³⁸ लुद्दा सैहर याफा सैहरे दे नेड़े था, चेलेयां एह़ सुणी करी कि पतरस तित्थु ऐ, दो माणु घल्ली करी तिस नैं विणती कित्ती, “अहां अल्ल ओणे च देर मत कर।”

³⁹ ताह़लू पतरस उठी करी तिन्हां सौगी चली पेआ, कने जाह़लू सैह़ पुज्जा तां सैह़ तिसियो बोड़ी लेई गै। सारियां बिधवां रोंदियां-रोंदियां तिसदे बक्खे आई खड़ोतियां, कने जेह्ड़े कुरते कने कपड़े दोरकासा तिन्हां सौगी रैंह्दे बणायो थे, दस्सणा लगियां।

⁴⁰ ताह़लू पतरसैं सबना जो बाहर करी दित्ता, कने गोड्डेयां भार बेई करी प्रार्थना कित्ती कने लाह्सा बक्खी दिख्या कने ग्लाया, “हे तबीता दिक्ख, उठ, ताह़लू तिन्नै अपणिया अखीं खोली दित्तियां; कने पतरसे दिक्खी करी उठी बैठी।”

⁴¹ तिन्हीं वाल देई करी तिसायो ठुआल़ेया, कने पवित्र लोकां कने बिधवां जो सद्दी करी तिसायो जिन्दा दस्सी दित्ता।

⁴² एह़ गल्ल सारे याफा सैहरे च फैली गेई, कने मतेआं प्रभु यीशु पर बसुआस कित्ता।

⁴³ कने पतरस याफा सैहरे च शमौन नांऐ दे कुसी चमड़े दा धंधा करणे आल़े दे सौगी बड़े दिन रेह्आ।