प्रेरितां दे कम्म 8 - काँगड़ी

शाऊल दा कलीसिया पर जुल्म

¹ शाऊल स्तिफनुसे दिया मौत्ती ते पूरे तरीके नैं सेहमत था। तिस दिन यरूशलेम सैहरे दी कलीसिया पर बड़ा हंगामा सुरू होई गेआ कने प्रेरितां जो छड्डी करी सारे दे सारे यहूदिया कने सामरिया प्रदेसां जो तितर-बितर होई गै।

² कने कुच्छ भक्तां स्तिफनुसे दिया लाह्सा जो कब्रा च रखेया कने तिस तांई बड़े रोये।

³ शाऊल कलीसिया जो सता दा था; कने घर-घर जाई करी बसुआसी मर्दां कने जणासां जो घसीटी-घसीटी करी जेला च पांदा था।

सामरिया सैहरे च फिलिप्पुसे दा प्रचार

⁴ जेह्ड़े बसुआसी तितर-बितर होई गियो थे, सैह़ सुसमाचार सणांदे बापस औणां लग्गे;

⁵ कने फिलिप्पुस सामरिया प्रदेसे दे इक्की सैहरे च जाई करी लोकां जो मसीह दा प्रचार करणा लग्गा।

⁶ जेह्ड़ियां गल्लां फिलिप्पुसे ग्लाईयां थियां, तिन्हां लोकां सुणी करी कने जेह्ड़े चमत्कार सैह़ दस्सदा था तिन्हां जो दिक्ख -दिक्खी करी, इक्क चित होई करी मन लगाया।

⁷ क्जोकि जाह़लू फिलिप्पुसे हुक्म दित्ता, तां मतेआं ते दुष्टआत्मां बड़े जोरे नैं डड्डी करी ग्लांदियां होईयां निकल़ी गियां, कने मते भारी अधरंगे दे रोगी कने लंगड़े भी खरे होई गै;

⁸ कने तिस सैहरे दे मते लोकां च बड़ी खुसी छाई गेई।

जादूगर शमौन

⁹ तिसी सैहरे च शमौन नांऐ दा इक्क माणु था, जेह्ड़ा जादू -टूणा करी नैं सामरिया प्रदेसे दे लोकां जो हरान करदा था कने अपणे आप्पे जो इक्क म्हान माणु ग्लांदा था।

¹⁰ कने सारे लोक्के ते लेई करी बड्डे तिकर सारे तिसदी इज्जत करी नैं ग्लांदे थे, “एह़ माणु परमात्मे दी सैह़ शक्ति ऐ, जेह्ड़ी म्हान कैहलांदी ऐ।”

¹¹ तिन्हीं मतेआं दिनां ते तिन्हां जो अपणे जादू दे कम्मां नैं हरान करी रखेया था, इसतांई सैह़ तिसियो बड़े मनदे थे।

¹² अपर जाह़लू लोकां फिलिप्पुसे दे जरिये परमात्मे राज्जे कने यीशु मसीह दे नांऐ दा सुसमाचार सुणी करी बसुआस कित्ता, तां लोक, क्या मरद, क्या जणासां बपतिस्मा लैणां लग्गे।

¹³ ताह़लू शमौने अप्पु भी बसुआस कित्ता कने बपतिस्मा लेई करी फिलिप्पुसे सौगी रैहणा लग्गा। सैह़ चमत्कार कने बड़े-बड़े सामर्थी दे कम्मां हुंदेया दिक्खी करी हरान हुंदा था।

सामरिया सैहरे च पतरस कने यूहन्ना

¹⁴ जाह़लू प्रेरितां जेह्ड़े यरूशलेम सैहरे च थे, सुणेया कि सामरिया दे लोकां परमात्मे दा वचन मन्नी लेआ ऐ तां पतरस कने यूहन्ना तिन्हां अल्ल घल्ले।

¹⁵ तिन्हां तित्थु पुज्जी करी तिन्हां लोकां तांई प्रार्थना कित्ती तांजे सैह़ पवित्र आत्मा पान।

¹⁶ क्जोकि पवित्र आत्मा अह्ल्ली तिकर तिन्हां च कुसी पर भी नीं घल्लेया था; तिन्हां तां सिर्फ प्रभु यीशुये दे नांऐ दा बपतिस्मा लेआ था।

¹⁷ ताह़लू पतरस कने यूहन्ने तिन्हां पर हत्थ रखे कने तिन्हां पवित्र आत्मा पाई लेआ।

शमौने दा पाप

¹⁸ जाह़लू शमौने दिख्या कि प्रेरितां दे हत्थ रखणे ते पवित्र आत्मा दित्ता जांदा ऐ, तां तिन्हां अल्ल पैसे अंणी करी ग्लाणा लग्गा,

¹⁹ “एह़ हक्क मिन्जो भी देआ, कि जिस कुसी पर भी हत्थ रखैं सैह़ पवित्र आत्मा पान।”

²⁰ पतरस तिस नैं ग्लाणा लग्गा, “तू कने तेरे पैसे नास होन, क्जोकि तैं परमात्मे दा दान पैसेयां नैं खरीदणे दा बचार कित्ता।

²¹ इसा सेवा च ना तेरा हिस्सा ऐ, ना योगदान; क्जोकि तेरा मन परमात्मे सामणै सच्चा नीं ऐ।

²² इसतांई अपणी इसा बुराईया ते मन बदली करी प्रभु नैं प्रार्थना कर, होई सकदा ऐ तेरे मने दे बुरे बचार माफ कित्ते जान।

²³ अपणे बुरे कम्मां ते मने बदली लै, क्जोकि मैं दिक्खदा ऐ, कि तेरे मने च बड़ी भारी जल़ण ऐ, कने तू बुरे कम्मां दे बन्धनां च पेआ ऐ।”

²⁴ शमौने जवाब दित्ता, “तुहां मेरे तांई प्रभु नैं प्रार्थना करा कि जेह्ड़ियां गल्लां तुहां ग्लाईयां हन, तिन्हां च कोई भी गल्ल भी मिन्जो पर नीं आई पोयैं।”

²⁵ कने एह़ गवाही देई करी कने प्रभु यीशुये दे वचन सणाई करी यरूशलेम सैहरे जो बापस चली आये कने ओंदे-ओंदे सामरिया सैहरां दे ग्रांऐ च सुसमाचार सणांदे गै।

फिलिप्पुस कने कूश देसे दा अधिकारी

²⁶ भिरी परमात्मे दे इक्की सुअर्गदूतैं फिलिप्पुसे नैं ग्लाया, “उठ कने दक्षिण दे बक्खे तिस रस्ते पर जा, जेह्ड़ा यरूशलेम सैहरे ते गाजा सैहरे जो जांदा ऐ। एह़ रेगिस्तानी रस्ता ऐ।”

²⁷ फिलिप्पुस उठी करी चली पेआ, कने दिक्खा, ताह़लू कूश देसे दा इक्क माणु ओआ दा था, जेह्ड़ा खोजा कने कूशियो दी राणी कन्दाके दा मंत्री कने खजांची था। सैह़ अराधना करणे तांई यरूशलेम सैहरे जो गेआ था।

²⁸ तिस बग्त सैह़ अपणे रथे च बेई करी अपणे देसे जो बापस जा था, कने यशायाह भविष्यवक्ता दिया कताब जोरे नैं पढ़ा दा था।

²⁹ ताह़लू पवित्र आत्मा फिलिप्पुसे नैं ग्लाया, “बक्खे जाई करी इस रथे सौगी होई जा।”

³⁰ फिलिप्पुस तिसदे पास्से दौड़ेया कने तिसियो यशायाह भविष्यवक्ता दिया कताबा पढ़दे सुणेया कने पुछया, “तू जेह्ड़ा पढ़ा दा ऐ क्या तिसियो समझदा भी ऐ।”

³¹ तिन्हीं ग्लाया, “जाह़लू तिकर कोई मिन्जो नीं समझां तां मैं किंआं समझगा?” कने तिन्हीं फिलिप्पुसे नैं विणती कित्ती, कि मिन्जो सौगी रथे पर चढ़ी करी बेई जा। कने फिलिप्पुस रथे पर चढ़ेया, कने तिस सौगी बेई गेआ।

³² पवित्रशास्त्रे दा जेह्ड़ा सैह़ पाठ पढ़ा दा था, सैह़ एह़ था: “सैह़ भेड्डां साइआं बल़ि होणे तांई पज्जाया गेआ, कने जिंआं मेम्ना ऊना कतरणे आल़ेआं सामणै चुपचाप रैंह्दा ऐ, तिंआं ई जाह़लू लोकां तिसियो बड़ा दुख दित्ता, तिन्हीं भी अपणा मुँ नीं खोलेया।

³³ तिसदी दीनता च तिसदा न्याय नीं होई सकेया। कने तिस बग्ते दे लोकां दे बारे च कुण दस्सगा, क्जोकि धरतिया ते तिसदे प्राण चुक्की लियो हन।”

³⁴ इस गल्ला पर खोजें फिलिप्पुसे ते पुछया, “मैं तिज्जो नैं प्रार्थना करदा ऐ, एह़ दस्स कि भविष्यवक्ता एह़ कुसदे बारे च ग्लांदा ऐ, अपणे या कुसी दूये दे बारे च।”

³⁵ ताह़लू इसा गल्ला सुणी करी फिलिप्पुसैं ग्लाणा सुरू कित्ता, कने इसी पवित्रशास्त्रे दा सुरू ते तिसियो यीशुये दा सुसमाचार सणाया। ताह़लू खोजा इसा गल्ला जो समझेया, कने तिन्हीं यीशु मसीह पर बसुआस कित्ता।

³⁶ रस्ते च चलदे-चलदे सैह़ इक्क पांणिये दे तल़ाऐ अल्ल पुज्जे। ताह़लू खोजा ग्लाणा लग्गा, “दिक्ख ऐत्थु पाणी भी ऐ, हुण मिन्जो बपतिस्मा लैणे ते कुण रोकी सकदा ऐ?”

³⁷ फिलिप्पुसैं ग्लाया, “जे तू सारे मने नैं बसुआस करदा ऐ तां तू लेई सकदा ऐ।” तिन्हीं जवाब दित्ता, “मैं बसुआस करदा ऐ कि यीशु मसीह परमात्मे दा पुत्तर ऐ।”

³⁸ ताह़लू तिन्हीं रथ खड़ा करणे दा हुक्म दित्ता, कने फिलिप्पुस कने खोजा दोयो पांणिये दे तल़ाऐ च चली गै, कने फिलिप्पुसे खोजे जो बपतिस्मा दित्ता।

³⁹ जाह़लू सैह़ पांणिये ते निकल़ी करी बाहरेयो आये, तां प्रभु दा पवित्र आत्मा फिलिप्पुसे जो चुक्की लेई गेआ, कने खोजें तिसियो भिरी नीं दिख्या, कने सैह़ खुस हुंदा होएया, “कि परमात्मे मिन्जो बचाई लेआ,” अपणे देसे जो बापस चली गेआ।

⁴⁰ फिलिप्पुस अशदोद सैहरे च आई रेह्आ, कने जाह़लू तिकर सैह़ कैसरिया सैहरे च नीं पुज्जा, ताह़लू तिकर सैहरे-सैहरे च सुसमाचार सणांदा गेआ।