प्रेरितां दे कम्म 25 - काँगड़ी

पौलुसे दा सम्राट दी दुहाई दैणा

¹ फेस्तुस तिस यहूदिया प्रदेसे च हाकमे दी पदवी लेई करी त्रीं दिनां बाद कैसरिया सैहरे ते यरूशलेम सैहरे जो गेआ।

² ताह़लू प्रधान याजकां कने यहूदी लोकां देयां खास अगुआं तिसदे सामणै पौलुसे पर दोस लगाये;

³ कने तिस नैं विणती कित्ती कि सैह़ पौलुसे जो यरूशलेम सैहरे जो घल्ली करी तिन्हां दा पक्ष लैं, क्जोकि सैह़ रस्ते च ई तिसियो मारने दे चक्करे च थे।

⁴ फेस्तुस हाकमें जवाब दित्ता, “पौलुस कैसरिया सैहरे च पैहरे च ऐ, कने मैं अप्पु तित्थु तौल़ी जाणे आल़ा ऐ।”

⁵ भिरी ग्लाया, “तुहां च जेह्ड़े हक्क रखदे हन सैह़ सौगी चलण, कने जे इन्हीं माणुये कुच्छ बुरा कम्म कित्या ऐ तां तिस पर दोस लगान।”

⁶ फेस्तुस हाकम यरूशलेम सैहरे कोई अठ दस दिन रेई करी कैसरिया सैहरे जो चली गेआ; कने दूये दिने न्याय आसणे पर बेई करी पौलुसे जो अणने दा हुक्म दित्ता।

⁷ जाह़लू सैह़ आया तां जेह्ड़े यहूदी अगुऐ यरूशलेम सैहरे ते आएयो थे, तिन्हां अक्खे बक्खे खड़ोई करी तिस बड़े गम्भीर दोस लगाये, जिन्हां दा सबूत सैह़ नीं देई सकदे थे।

⁸ अपर पौलुसैं जवाब दित्ता, “मैं ना तां यहूदियां दी व्यबस्था दे कने ना मंदरे दे, कने ना ई कैसर राजे दे खलाफ कोई अपराध कित्ता ऐ।”

⁹ ताह़लू फेस्तुसें यहूदी अगुआं जो खुस करणे दिया इच्छा ते पौलुसे ते पुछया, “क्या तू चांह़दा ऐ कि यरूशलेम सैहरे जो जान; कने तित्थु मेरे सामणै तेरा एह़ मकदमा तय कित्ता जां।”

¹⁰ पौलुस ग्लाणा लग्गा, “मैं कैसरे राजे दिया कचेहरिया दे सामणै खड़ोत्या ऐ। ठीक ऐई ऐ कि मेरे मकदमे दा फैसला ऐत्थु ई होणा चाइदा। जिंआं तिज्जो भी भला चंगा पता ऐ, कि मैं यहूदी अगुआं दे खलाफ कोई अपराध नीं कित्ता।

¹¹ जे मैं अपराधी ऐ कने मारने आल़ा कोई कम्म कित्या ऐ, तां मरने ते नीं मुकरदा। अपर जिन्हां गल्लां दा यहूदी अगुऐ मिन्जो पर दोस लगांदे हन, जे तिन्हां च कोई भी गल्ल सच्च नीं होयैं, तां कुसी जो एह़ हक्क नीं ऐ कि सैह़ मिन्जो इन्हां दे हुआलैं करैं। मैं कैसर राजे नैं विणती करदा ऐ, सैई मेरा न्याय करगा।”

¹² ताह़लू फेस्तुस हाकमे मंत्रियां दी सभा सौगी गल्लां करी नैं जवाब दित्ता, “तैं कैसर राजे दी दुहाई दित्ती ऐ, तां तेरा मुकदमा कैसर राजे अल्ल ई जांगा।”

राजा अग्रिप्पा दे सामणै पौलुस

¹³ कुच्छ दिनां बाद राजा अग्रिप्पा कने तिसदी लोक्की बैहण बिरनीके फेस्तुस नैं मुलाकात करणा कैसरिया सैहरे च आये।

¹⁴ तिन्हां तित्थु बड़े दिन रैहणे दे बाद फेस्तुसें पौलुसे दे बारे च राजे जो दस्सेया, “इक्क माणु ऐ, जिसियो फेलिक्स कैदी बणाई करी छड्डी गेआ ऐ।

¹⁵ जाह़लू मैं यरूशलेम सैहरे च था, तां प्रधान याजक कने यहूदियां दे स्याणेयां तिसदी कारवाई कित्ती, कने सोचेया कि तिसियो सज़ा दा हुक्म दित्ता जां।

¹⁶ “अपर मैं तिन्हां जो जवाब दित्ता कि रोमी माणुआं दी एह़ रीति नीं ऐ कि कुसी माणुये जो सज़ा तांई हुआलैं करी दैन, जाह़लू तिकर दोसी जो अपणे दोस लगाणे आल़ेआं दे सामणै खड़ोई करी दोस दे जवाब दैणे दा मौका ना मिल्लैं।

¹⁷ इसतांई जाह़लू यहूदी अगुऐ कैसरिया सैहरे ते मिन्जो सौगी ऐत्थु किठ्ठे होये, तां मैं कुच्छ देर नीं कित्ती, अपर दूये ई दिने न्याय आसणे पर बेई करी पौलुसे जो कचेहरिया च अणने दा हुक्म दित्ता।

¹⁸ जाह़लू तिस पर दोस लगाणे आल़े खड़ोई गै, तां तिन्हां दियां अनुचित गल्लां दा दोस नीं लगाया, जिंआं मैं समझदा था।

¹⁹ तिन्हां जो सिर्फ अपणी धार्मिकता दे बारे च कुच्छ गल्लां च तिस नैं मतभेद था, कने यीशु नांऐ दे माणुये दे बारे च भी जेह्ड़ा मरी चुकेया ऐ, अपर पौलुस तिसदे जिन्दा होणे दा दावा करदा ऐ।

²⁰ कने मैं नीं जाणदा था कि इन्हां गल्लां दी छाणबीण किंआं करैं। इसतांई मैं पौलुसे ते पुछया, ‘क्या तू यरूशलेम सैहरे जो जांगा, कि तित्थु इन्हां गल्लां दा मुकदमा होयैं?’

²¹ अपर जाह़लू पौलुसैं कैसरे राजे दी दुहाई दित्ती कि तिसदे मुकदमे दा फैसला महाराजे अल्ल होयैं, तां मैंई हुक्म दित्ता कि जाह़लू तिकर तिसियो कैसर राजे अल्ल ना घल्लैं, तिसियो हिरासत च रखेया जां।”

²² ताह़लू राजा अग्रिप्पा फेस्तुसे नैं ग्लाणा लग्गा, “मैं भी तिस माणुये दी सुणना चांह़दा ऐ।” तिन्हीं ग्लाया, “तैं कल सुणी लैणां।”

²³ अपर दूँये दिने जाह़लू राजा अग्रिप्पा कने बिरनीके बड़ा डोल डमाका करी नैं आये कने सपाईयां दे सरदारां कने सैहरे देयां खास लोकां सौगी दरबारे पर पुज्जे। ताह़लू फेस्तुसें हुक्म दित्ता, कने पौलुसे जो लेई ओन।

²⁴ फेस्तुस हाकम ग्लाणा लग्गा, “हे राजा अग्रिप्पा, कने हे ऐत्थु आएयो सज्जणो, तुहां इस माणुये जो दिक्खा दे हन, जिसदे बारे च सारेयां यहूदियां यरूशलेम सैहरे च भी कने ऐत्थु भी जोरे-जोरे नैं डड्डी करी मिन्जो नैं विणती कित्ती कि इसदा जिन्दा रैहणा ठीक नीं।

²⁵ अपर मैं जाणी लेआ कि तिन्हीं ऐदेया कुच्छ नीं कित्या कि मारी दित्ता जां; कने जाह़लू तिन्हीं अप्पु ई महाराजे दी दुहाई दित्ती तां मैं तिसियो रोम सैहरे जो घल्लणे दा बचार कित्ता।

²⁶ मैं तिसदे बारे च कोई पक्की गल्ल नीं पाई कि अपणे महाराजे जो लिखी घल्लैं। इसतांई मैं तिसियो तुहां सामणै कने खास करी नैं हे राजा अग्रिप्पा, तेरे सामणै लंदेया ऐ कि परखणे ते बाद मिन्जो कुच्छ लिखणे जो मिल्ले।

²⁷ क्जोकि कैदिये जो घल्लणा कने जेह्ड़े दोस तिस पर लगायो हन, तिन्हां जो नीं दस्सणा, मिन्जो ठीक नीं लग्गा दा ऐ।”