प्रेरितां दे कम्म 24 - काँगड़ी

फेलिक्स हाकमे दे सामणै पौलुस

¹ पंजा दिनां बाद हनन्याह महायाजक कई स्याणे कने तिरतुल्लुस नांऐ दे इक्की बकीले जो सौगी लेई करी कैसरिया सैहरे जो आई रैह्; तिन्हां हाकमे दे सामणै पौलुसे पर दोस लगाई नैं ग्लाया।

² जाह़लू पौलुसे जो सद्देया तां तिरतुल्लुस तिस पर दोस लगाई करी ग्लाणा लग्गा, “हे महामहिम फेलिक्स, तेरिया बज़ाह ते अहां बड़ी खुसिया नैं रैंह्दे हन, कने तेरे प्रबन्धे नैं इसा जातिया तांई कई बुराईआं खत्म हुंदियां जांदियां हन।

³ इसियो अहां हर जगाह कने हर किस्मां दे धन्यावादे सौगी मनदे हन।

⁴ अपर इसतांई कि मैं तिज्जो होर दुख नीं दैणा चांह़दा, मैं तिज्जो नैं विणती करदा ऐ कि मेह़रवानी करी नैं मेरियां इक्क दो गल्लां सुणी लै।

⁵ क्जोकि एह़ पूरे संसारे दे सारे यहूदी लोकां च अंदोलण करदा-फिरदा ऐ, कने एह़ इक्क नासरियां दे झूठिया धार्मिकता दा मुखिया भी ऐ।

⁶ इन्हीं मंदरे जो असुद्ध करणा चाया, अपर अहां तिसियो पकड़ी लेआ। अहां तिसियो अपणे कानूने मताबक सज़ा दित्तियो हुंदी;

⁷ अपर सपाईयां दे अधिकारियैं लुसियासें जबरदस्ती अहां दे हत्थे ते खोई लेआ,

⁸ कने मुकदमे तांई तेरे सामणै ओणे दा हुक्म दित्ता। इन्हां सारियां गल्लां जो जिन्हां दे बारे च अहां तिस पर दोस लगांदे हन, तू अप्पु ई तिसियो परखी करी सच्चाईया जो जाणी लैंगा।”

⁹ यहूदियां भी तिसदा साथ देई करी ग्लाया, एह़ सब गल्लां सच्च हन।

पौलुसे दा बचाब

¹⁰ जाह़लू हाकमे पौलुसे जो ग्लाणे दा इसारा कित्ता, तां तिन्हीं जवाब दित्ता, “मैं एह़ जाणी करी कि तू मते साल्लां ते इस देसे दे लोकां दा न्याय करा दा ऐ, कने इसतांई खुसिया नैं अपणा बचाब पेस करदा ऐ।

¹¹ तू अप्पु जाणी सकदा ऐ कि जाह़लू ते मैं यरूशलेम सैहरे च अराधना करणे जो मंदरे च आया, मिन्जो बारा दिन ते जादा नीं होये हन।

¹² तिन्हां ना मिन्जो मंदरे च ना आराधनालय च, ना सैहरे च कुसी सौगी बैंह्सदे या भीड़ लगांदे दिख्या;

¹³ कने ना तां सैह़ तिन्हां गल्लां जो, जिन्हां दा सैह़ मिन्जो पर दोस लगांदे हन, तिज्जो सामणै सच्च साबित करी सकदे हन।

¹⁴ अपर मैं तेरे सामणै एह़ मन्नी लैंदा ऐ कि जिसा धार्मिकता जो सैह़ झूठी धार्मिकता ग्लांदे हन, कि मैं अपणे पूर्वजां दे परमात्मे दी अराधना करदा ऐ, कने जेह्ड़ियां गल्लां मूसा दिया व्यबस्था कने भविष्यवक्ता दियां कताबा च लिखियां हन, तिन्हां सबना पर बसुआस करदा ऐ।

¹⁵ कने परमात्मे ते आस रखदा ऐ, कि जेह्ड़ी सैह़ अप्पु भी रखदे हन, कि धर्मी अधर्मी दून्नी जो परमात्मा मरेयां ते दुवारी जिन्दा करगा।

¹⁶ इसते मैं अप्पु भी कोसस करदा ऐ कि परमात्मे दे, कने माणुआं दे पास्से ते मेरा मन हमेसा बेकसूर रैंह्।

¹⁷ “मतेआं साल्लां बाद मैं अपणे गरीब लोकां जो दान दैणा, कने परमात्मे जो भेंट चढ़ाणा यरूशलेम सैहरे च आया था।

¹⁸ तिसी बग्त इन्हां मंदरे च मिन्जो सुद्ध होणे दिया रीतिया जो पूरिया करदे दिख्या, कने तित्थु ना तां कोई भीड़ थी ना कोई सोर सराबा था,

¹⁹ अपर तित्थु आसिया प्रदेसे दे कुच्छ यहूदी माणु थे, जिन्हां ऐत्थु तुहां सामणै हाजर होणा ठीक था, जे मेरे बरोधे च तिन्हां दी कोई गल्ल होयैं तां ऐत्थु तेरे सामणै आई करी मिन्जो पर दोस लगांदे हन।

²⁰ या एह़ अप्पु ई दस्सन कि जाह़लू मैं महासभा दे सामणै खड़ोत्या था, तां तिन्हां मिन्जो च कुण देहया दोस पाया?

²¹ इसा इक्की गल्ला जो छड्डी करी जेह्ड़ी मैं तिन्हां बिच्च खड़ोई करी जोरे नैं ग्लाईयो थी, ‘मरेयां दे दुवारी जिन्दे होणे दे बारे च अज्ज मेरा तुहां दे सामणै मुकदमा होआ दा ऐ’।”

²² फेलिक्स जेह्ड़ा यीशु मसीह दियां सिक्षां जाणदा था, तिन्हां जेह्ड़ा एह़ ग्लाई करी टाल़ी दित्ता, “जाह़लू सपाईयां दा सरदार लूसियास ओंगा, तां तुहां दियां गल्लां दा फैसला करगा।”

²³ कने सूबेदारे जो हुक्म दित्ता कि पौलुस दा पैहरा करदा रेह्आं, अपर तिसदेयां साथियां च कुसी जो भी सेवा करणे ते मत रोकदा।

फेलिक्स हाकम कने द्रुसिल्ला दे सामणै पौलुस

²⁴ कुच्छ दिनां बाद फेलिक्स हाकम अपणिया लाड़िया द्रुसिल्ला जो, जेह्ड़ी यहूदनी थी, सौगी लेई करी कैसरिया सैहरे च आई रेह्आ कने पौलुसे जो सदवाई करी तिसियो बसुआसे दे बारे च जेह्ड़ा प्रभु यीशु मसीह पर ऐ, तिसते सुणेया।

²⁵ जाह़लू पौलुस धार्मिकता कने सांति, कने ओणे आल़े न्याय दी चर्चा करा दा था, तां फेलिक्से डरी करी जवाब दित्ता, “हुण तां तू जा; जाह़लू मिन्जो अल्ल बग्त हुंगा, मैं तिज्जो अप्पु सद्दी लैंगा।”

²⁶ तिसियो पौलुसे ते कुच्छ धन-दौलत मिलणे दी आस थी, इसतांई होर भी सद्दी-सद्दी करी तिस नैं गल्लां करा करदा था।

²⁷ अपर जाह़लू दो साल होई गै, तां फेलिक्स हाकमे दिया जगाह पर पुरकियुस फेस्तुस हाकम बणेया; कने फेलिक्स यहूदियां जो खुस करणे दी इच्छा ते पौलुसे जो जेला च ई रैहणा दित्ता।