प्रेरितां दे कम्म 23 - काँगड़ी

¹ पौलुसैं महासभा दे पास्से टक लगाई करी दिख्या कने ग्लाया, “हे भाऊओ, मैं अज्जे तिकर परमात्मे दे तांई बिलकुल सच्चे मने सौगी ज़िन्दगी बिताई ऐ।”

² जेह्ड़ा पौलुसैं ग्लाया तिसा गल्ला सुणी करी हनन्याह महायाजकैं तिन्हां जो जेह्ड़े तिस अल्ल खड़ोत्यो थे, तिसदे मुँऐ च चपेड़ मारने दा हुक्म दित्ता।

³ ताह़लू चपेड़ खाणे ते बाद पौलुसैं तिस नैं ग्लाया, “हे चूना फेरियो दीवार मतलब हे पाखंडी, परमात्मा तिज्जो मारगा। तू व्यबस्था मताबक मेरा न्याय करणे जो बैठेया ऐ, कने भिरी क्या कानून दे खलाफ मिन्जो मारने दा हुक्म दिंदा ऐ?”

⁴ जेह्ड़े बक्खे खड़ोत्यो थे तिन्हां ग्लाया, “क्या तू परमात्मे दे महायाजके जो बुरा भला ग्लाई नैं बेज्जती करा दा ऐ?”

⁵ पौलुसैं ग्लाया, “हे भाऊओ, मैं नीं जाणदा था कि एह़ महायाजक ऐ; क्जोकि पवित्रशास्त्रे च लिख्या ऐ, ‘अपणेयां लोकां दे प्रधाने जो बुरा मत ग्ला।’ ”

⁶ ताह़लू पौलुसैं एह़ जाणी करी कि इक्क झुंड कुच्छ सदूकी कने दूआ फरीसी माणुआं दा ऐ, महासभा च जोरे नैं ग्लाणा लग्गा, “हे भाऊओ, मैं फरीसी कने फरीसी माणुआं दे खानदाने दा ऐ, मरेयां दी आस कने जरिये जिन्दे होणे दे बारे च मेरा मुकदमा होआ दा ऐ।”

⁷ जाह़लू तिन्हीं एह़ गल्ल ग्लाई तां फरीसी कने सदूकी माणुआं च लड़ाई होणा लग्गी; कने सभा च बैर पेई गेआ।

⁸ क्जोकि सदूकी माणु तां एह़ बसुआस ऐ, कि ना दुवारी जिन्दा होणा ऐ ना सुअर्गदूत कने ना पवित्र आत्मा ऐ; अपर फरीसी इन्हां सबना च बसुआस करदे हन।

⁹ ताह़लू बड़ा सोर सराबा होणा लग्गा कने कुच्छ सास्त्री जेह्ड़े फरीसी माणु थे, उठी करी खड़ोई गै कने एह़ ग्लाई करी लड़णा लग्गे, “अहां इस माणुये च कोई बुराई नीं पांदे, कने होई सकदा ऐ, कि सायद पवित्र आत्मा या अप्पु सुअर्गदूतैं इस नैं गल्लां कित्तियां होन।”

¹⁰ जाह़लू बड़ी लड़ाई होई, तां सपाईयां दे सरदारैं इस डरे नैं कि सैह़ पौलुसे दे टुकड़े-टुकड़े ना करी दैं, सपाईयां जो हुक्म दित्ता कि आई करी तिसियो तिन्हां दे बिच्चे ते जबरदस्ती कड्डी करी गढ़े जो लेई जा।

¹¹ तिसा ई राती प्रभु यीशुयैं पौलुसे अल्ल खड़ोई करी ग्लाया, “हे पौलुस, हौंसला रख; क्जोकि जिंआं तैं यरूशलेम सैहरे च मेरी गवाही दित्ती, तिंआं ई तिज्जो रोम सैहरे च भी मेरी गवाही दैणी पोणी ऐ।”

पौलुसे जो जान्नी ते मारने साजस

¹² जाह़लू भ्याग होई तां कुच्छ यहूदी माणुआं इक्क होई करी कसम खादी कि जाह़लू तिकर अहां पौलुसे जो मारी नीं दैन, ताह़लू तिकर ना कुच्छ खांगे कने ना कुच्छ पींगे।

¹³ जिन्हां अप्पु च एह़ कसम खादियो थी, सैह़ चाल़ियां माणुआं ते जादा थे।

¹⁴ तिन्हां प्रधान याजकां कने स्याणेयां अल्ल जाई करी ग्लाया, “अहां कसम खाई नैं एह़ ठाणी लेआ ऐ कि जाह़लू तिकर अहां पौलुसे जो मारी नीं दैन, ताह़लू तिकर ना कुच्छ खांगे कने ना कुच्छ पींगे।

¹⁵ इसतांई हुण महासभा सौगी सपाईयां दे सरदारे जो समझा कि पौलुसे जो तुहां अल्ल इआं लेई ओन, मन्नेया कि तुहां तिसदे इस मुद्दे जो बड़ी बरीकिया नैं छाणबीण करी नैं सुलझाणा चांह़दे हन; कने ऐत्थु अहां तिसदे पुज्जणे ते पैहल्लैं तिसियो मारने तांई त्यार रैंह्गे।”

¹⁶ अपर पौलुसे दे भांणजे सुणेया कि सैह़ इसियो मारने दे चक्करे च हन, तां गढ़े च जाई करी पौलुसे जो खबर दित्ती।

¹⁷ पौलुसैं सूबेदारां ते इक्की सूबेदारे जो अप्पु अल्ल सद्दी करी ग्लाया, “इस जुआने जो सपाईयां दे सरदारे अल्ल लेई जा, एह़ तिस नैं कुच्छ ग्लाणा चांह़दा ऐ।”

¹⁸ इसतांई सूबेदार पौलुसे दे भांणजे तिसियो सपाईयां दे सरदारे अल्ल लेई गेआ कने ग्लाणा लग्गा, “कैदी पौलुसैं मिन्जो सद्दी करी विणती कित्ती कि एह़ जुआन सपाईयां दे सरदारे नैं कुच्छ ग्लाणा चांह़दा ऐ; इसियो तिस अल्ल लेई जा।”

¹⁹ सपाईयां दे सरदारैं तिसदा हत्थ पकड़ी करी, कने तिसियो लग्ग लेई जाई करी पुछया, “तू मिन्जो नैं क्या ग्लाणा चांह़दा ऐ।”

²⁰ तिन्हीं ग्लाया, “यहूदी अगुआं इक्क होई नैं साजस रची, कि तिज्जो नैं विणती करी नैं कि कल पौलुसे जो महासभा च अणन, मना कि तुहां तिसदे इस मुद्दे जो बड़ी बरीकिया नैं छाणबीण करणा चांह़दे हन।

²¹ अपर तिन्हां दी मत सुणदा, क्जोकि तिन्हां च चाल़ियां ते जादा माणु पौलुसे जो मारने दे चक्करे च हन, जिन्हां कसम खाई नैं एह़ ठाणी लेआ कि जाह़लू तिकर सैह़ पौलुसे जो मारी नीं दैन, ताह़लू तिकर ना तिन्हां खाणा ना पीणा। कने हुण सैह़ त्यार हन कने तेरे वचने दा इन्तजार करा दे हन।”

²² सैह़ ताह़लू सपाईयां दे सरदारे जुआने जो एह़ हुक्म देई करी घल्ली दित्ता, “कुस नैं मत ग्लांदा कि तैं मिन्जो एह़ गल्लां दस्सियां हन।”

पौलुसे जो फेलिक्स हाकमे अल्ल घल्लणा

²³ ताह़लू सपाईयां दे सरदारैं दूँ सूबेदारां जो सद्दी करी ग्लाया, “दो सौ सपाई, सत्तर घुड़सवार, कने दो सौ भाले आल़े, कैसरिया सैहरे जो जाणे तांई त्यार करी रखेयां, कने तू राती दे नौ बजे निकल़ेयां।

²⁴ कने पौलुसे दी सवारिया तांई घोड़े त्यार रखा, कि तिसियो फेलिक्स हाकमे अल्ल सम्भाल़ी करी पज्जाई दैन।”

²⁵ सपाईयां दे सरदारैं इस तरीके नैं चिठ्ठी भी लिखी,

²⁶ “महामहिम फेलिक्स हाकमे जो क्लौदियुस लूसियासे दा नमस्कार।

²⁷ इस माणुये जो यहूदियां पकड़ी करी मारणा चाया, अपर जाह़लू मिन्जो पता लगा कि सैह़ रोमी माणु ऐ, तां सपाईयां लेई करी छड़वाई अंदा।

²⁸ मैं जाणदा था कि सैह़ तिस पर कुस बज़ाह ते दोस लग्गा करदे हन, इसतांई तिसियो तिन्हां दिया महासभा च लेई गेआ।

²⁹ ताह़लू मैं जाणी गेआ कि सैह़ अपणी यहूदी व्यबस्था दे विवादां दे बारे च इस पर दोस लग्गा दे हन, अपर जान्नी ते मारी दैणे या बन्नी करी रखणे आल़ा तिस च कोई दोस नीं।

³⁰ जाह़लू मिन्जो दस्सेया कि इस माणुये जो मारने दे चक्करे हन, तां मैं इकदम तिज्जो अल्ल घल्ली दित्ता; कने दोस लगाणे आल़े यहूदियां जो भी हुक्म दित्ता कि तेरे सामणै तिस पर दोस लगान।”

³¹ तां जिंआं तिन्हां सपाईयां जो हुक्म दित्या था, तिंआं ई पौलुसे जो रातों-रात लेई करी अन्तिपत्रिस सैहरे च लेई आये।

³² दूये दिने सैह़ घुड़सवारां जो पौलुसे जो सौगी घल्ली करी सैह़ अपणे गढ़ यरूशलेम सैहरे जो बापस आई गै।

³³ तिन्हां कैसरिया सैहरे च पुज्जी करी हाकमे जो चिठ्ठी दित्ती; कने पौलुसे जो भी तिसदे सामणै खरेड़ी दित्ता।

³⁴ हाकमे चिठ्ठिया पढ़ी करी पुछया, “एह़ कुस देसे दा ऐ।”

³⁵ कने जाह़लू पता लग्गा कि एह़ किलिकिया प्रदेसे दा ऐ; तां तिस नैं ग्लाया, “जाह़लू तिज्जो पर दोस लगाणे आल़े यहूदी ओंगे, तां मैं तेरा फैसला करणा।” कने तिन्हीं पौलुसे जो हेरोदेस राजे दे किल्ले च पैहरे च रखणे दा हुक्म दित्ता।