प्रेरितां दे कम्म 18 - काँगड़ी

कुरिन्थुस सैहरे च

¹ इसते बाद पौलुस एथेंस सैहरे जो छड्डी करी कुरिन्थुस सैहरे च आया।

² तित्थु तिसियो अक्विला नांऐ दा इक्क यहूदी माणु मिल्ला, जिसदा जन्म पुन्तुस प्रदेसे च होएया था। सैह़ अपणिया लाड़िया प्रिसकिल्ला सौगी इटली देसे ते हाल ई च आया था, क्जोकि क्लौदियुस महाराजें सारेयां यहूदियां जो रोम ते निकल़ी जाणे दा हुक्म दित्या था। तिस हुक्मे दिया बज़ाह ते सैह़ तिन्हां अल्ल गेआ।

³ पौलुस तिन्हां जो दिक्खणा गेआ, क्जोकि तिसदा कने अक्विला दा इक्क ई बपार था; इसतांई सैह़ तिन्हां सौगी रेह्आ कने सैह़ तम्बू बणाणे दा कम्म करणा लग्गे।

⁴ पौलुस हर इक्क बिस्रामे आल़े दिन आराधनालय च बैंह्स बसाई करी नैं यहूदियां कने यूनानी माणुआं जो भी यीशु मसीह पर बसुआस करणे तांई समझांदा था।

⁵ जाह़लू सीलास कने तीमुथियुस मकिदुनिया प्रदेसे च आये, तां पौलुस वचन सणाणे दिया धुना च यहूदियां जो गवाही दैणा लग्गा कि यीशु ई मसीह ऐ।

⁶ अपर जाह़लू यहूदी बरोध कने पौलुस दी निंदा करणा लग्गे, तां तिन्हीं अपणे कपड़े झाड़ी करी तिन्हां नैं ग्लाणा लग्गा, “परमात्मे दे वचने जो नकारने तांई जेह्ड़ी मौत्ती दी सज़ा तुहां जो मिलगी, तिसादे जिम्मेवार तुहां ई हन, मैं बेकसूर ऐ। अज्जे ते मैं परमात्मे दा प्रचार करणे तांई होरनी जातिआं दे लोकां अल्ल जांगा।”

⁷ आराधनालय ते निकल़ी करी सैह़ तीतुस यूस्तुस नांऐ दे इक्की परमात्मे दे भक्ते दे घरैं सिक्षा दैणे तांई आया; जिसदा घर आराधनालय बक्खे ई था।

⁸ ताह़लू आराधनालय दे अधिकारियैं क्रिस्पुसे अपणे सारे परवारे सौगी प्रभु पर बसुआस कित्ता; कने बड़े भरी कुरिन्थवासियां सुणी करी बसुआस कित्ता कने बपतिस्मा लेआ।

⁹ प्रभुयैं इक्की राती दर्शन देई करी पौलुसे नैं ग्लाणा लग्गा, “मत डर अपर ग्लाई जा चुप मत रैह्;

¹⁰ क्जोकि मैं तिज्जो सौगी ऐ, कने कोई भी तिज्जो पर हमला करी नैं तेरा नकसान नीं करी सकदा, क्जोकि इस सैहरे च मेरे मते लोक हन, जेह्ड़े मिन्जो पर बसुआस करगे।”

¹¹ इसतांई पौलुस तित्थु परमात्मे दा वचन ढेड साल तिकर सखांदा रेह्आ।

¹² जाह़लू गल्लियो अखाया प्रदेसे दा हाकम था, तां यहूदी माणु इक्क होई करी पौलुसे जो पकड़णा आये, कने तिसियो अदालता च अंणी करी ग्लाणा लग्गे

¹³ “एह़ लोकां जो समझांदा कि परमात्मे दी अराधना इस तरीके नैं करा, जेह्ड़ा व्यबस्था दे उलट ऐ।”

¹⁴ जाह़लू पौलुस ग्लाणा लग्गा ई था, तां गल्लियो हाकम यहूदियां नैं ग्लाणा लग्गा, “हे यहूदियो, जे एह़ अन्याय या बुराईया दी गल्ल हुंदी, तां ठीक हुंदा कि मैं तुहां दी सुणदा।

¹⁵ अपर जे एह़ बैंह्स बसाई दे सब्दां च, कने नां दे बारे च कने तुहां दिया व्यबस्था दे बारे च ऐ, तां तुहां ई जाणन; क्जोकि मैं इन्हां गल्लां दा न्यायी नीं बणना चांह़दा।”

¹⁶ कने गल्लियो हाकमे तिन्हां जो न्याय आसणे दे सामणै ते कड्डी दित्ता।

¹⁷ ताह़लू सारेयां लोकां आराधनालय दे अधिकारिये सोस्थिनेस जो पकड़ी करी न्याय आसण दे सामणै मारेया। अपर गल्लियो इन्हां गल्लां दी जरा भी फिकर नीं कित्ती।

अन्ताकिया सैहरे जो बापस औणां

¹⁸ पौलुस बड़े दिन तिकर कुरिन्थुस सैहरे रेह्आ। भिरी बसुआसी भाऊआं ते विदा लेई करी किंख्रिया सैहरे च इसतांई सिर मुंडाया, क्जोकि तिन्हीं मन्नत मंगियो थी कने समुंदरी जाह्जे च सीरिया प्रदेस जो चली पेआ कने तिस सौगी दोयो लाड़ा लाड़ी प्रिसकिल्ला कने अक्विला थे।

¹⁹ तिन्हीं इफिसुस सैहरे च पुज्जी करी प्रिसकिल्ला कने अक्विला जो तित्थु छड्डी दित्ता, कने अप्पु आराधनालय च जाई करी यहूदियां नैं वाद-विवाद करणा लग्गा।

²⁰ जाह़लू लोकां तिस नैं विणती कित्ती, “अहां सौगी होर कुच्छ दिन रैह्।” तां तिन्हीं स्वकार नीं कित्ता;

²¹ अपर एह़ ग्लाई करी तिन्हां ते विदा होई करी चली गेआ, “जे परमात्मे चाया तां मैं तुहां अल्ल भिरी ओंगा।” ताह़लू सैह़ इफिसुस सैहरे ते समुंदरी जाह्जे पर बेई नैं चली पेआ;

²² कने कैसरिया सैहरे च आई करी यरूशलेम सैहरे जो गेआ कने कलीसिया जो नमस्कार करी नैं अन्ताकिया सैहरे च आया

पौलुसे दी त्री प्रचार - यात्रा

²³ भिरी कुच्छ दिन रेई करी अन्ताकिया सैहरे ते चली गेआ, कने इक्की पास्से गलातिया कने फ्रूगिया प्रदेसां च सारे चेलेयां जो मजबूत करदा रेह्आ।

इफिसुस सैहरे च अपुल्लोस

²⁴ अपुल्लोस नांऐ दा इक्क यहूदी, जिसदा जन्म सिकन्दरिया सैहरे च होएया था, जेह्ड़ा बड़ा ग्लांणे आल़ा (विद्वान) मरद था, कने पवित्रशास्त्र जो अच्छी तरांह ते जाणदा था इफिसुस सैहरे च आया।

²⁵ तिन्हीं प्रभु दे रस्ते दी सिक्षा पाईयो थी, कने मन लगाई करी यीशुये दे बारे च ठीक -ठीक सणांदा कने सखांदा था, अपर सैह़ सिर्फ यूहन्ने दे बपतिस्मे दी गल्ल जाणदा था।

²⁶ अपुल्लोस आराधनालय च निडर होई करी ग्लाणा लग्गा। अपर प्रिसकिल्ला कने अक्विला तिसदियां गल्लां सुणी करी तिसियो अपणे घरे जो लेई गै, कने तिन्हां तिसियो परमात्मे दा रस्ता होर जादा बारिकिया नैं समझाया।

²⁷ जाह़लू तिन्हीं फैसला कित्ता नदी पार करी नैं अखाया प्रदेसे जो जां तां बसुआसी भाऊआं तिसियो हिम्मत देई करी चेलेयां जो लिख्या कि सैह़ तिस नैं ढंगे नैं मिल्ले; कने तिन्हीं तित्थु पुज्जी करी तिन्हां लोकां दी बड़ी मदत कित्ती जिन्हां अनुग्रह दी बज़ाह ते बसुआस कित्या था।

²⁸ क्जोकि सैह़ पवित्रशास्त्र ते सबूत देई-करी कि यीशु ई मसीह ऐ, बड़े जोशे सौगी यहूदियां जो सारेयां सामणै लगातार मजबूत करदा रेह्आ।