प्रेरितां दे कम्म 16 - काँगड़ी

पौलुसे कने तीमुथियुस

¹ भिरी सैह़ दिरबे कने लुस्त्रा सैहरे च भी गेआ। तित्थु तीमुथियुस नांऐ दा इक्क चेला था, जेह्ड़ा बसुआसी यहूदनी जणासा दा जागत था, अपर तिसदा बुढ़ा यूनानी था।

² सैह़ लुस्त्रा कने इकुनियुम सैहरे देयां बसुआसी भाऊआं च अच्छा बोल चाल था।

³ पौलुसे दी इच्छा थी कि सैह़ तिस सौगी चल्लैं; कने जेह्ड़े यहूदी माणु तिन्हां जगांह च थे तिन्हां दिया बज़ाह ते तिसदा खतणा कित्ता, क्जोकि सैह़ सारे जाणदे थे, कि तिसदा बुढ़ा यूनानी था।

⁴ पौलुस कने तिसदे साथी सैहरे-सैहरे च जांदे-जांदे सैह़ तिन्हां विधियां जो यरूशलेम सैहरे दे प्रेरितां कने स्याणेयां ठैहराईयां थियां, मन्नणे तांई बसुआसी भाऊआं जो पज्जांदे जांदे थे।

⁵ इस तरांह कलीसिया बसुआसे च पक्की हुंदी गेई कने गिणती च भी बधदी गेई।

⁶ सैह़ फ्रूगिया कने गलातिया प्रदेसां च होई करी गै, क्जोकि पवित्र आत्मा तिन्हां जो आसिया प्रदेसे च वचन सणाणे जो मना कित्ता।

⁷ कने तिन्हां मुसिया प्रदेसे अल्ल पुज्जी करी, बितुनिया प्रदेसे च जाणे दी सोची; अपर यीशु दिया पवित्र आत्मा तिन्हां जो जाणा नीं दित्ता।

⁸ तां सैह़ मुसिया प्रदेसे ते होई करी त्रोआस सैहरे च आये।

⁹ तित्थु पौलुसैं राती जो इक्क दर्शन दिख्या कि इक्क मकिदुनिया प्रदेसे दा रैहणे आल़ा माणु खड़ोई करी तिस नैं विणती करी नैं ग्लाणा लग्गा कि, “समुंदरे दे पारले कनारें मकिदुनिया प्रदेसे च आ, कने अहां दी मदत कर।”

¹⁰ तिसदे एह़ दर्शन दिक्खदे ई अहां इकदम मकिदुनिया प्रदेसे जाणे दी सोची, एह़ समझी करी परमात्मैं अहां जो सुसमाचार सणाणे तांई सद्देया ऐ।

फिलिप्पी च लुदिया दा मन बदलणा

¹¹ इसतांई त्रोआस सैहरे ते समुंदरी जाह्जे च बेई करी अहां सिध्धे सुमात्राके टापू ते होई करी दूये दिने नियापुलिस सैहरे च आये।

¹² तित्थु ते अहां फिलिप्पी सैहरे पुज्जे, जेह्ड़ा मकिदुनिया प्रदेसे दा खास सैहर, कने रोमियां दी बस्ती ऐ; कने अहां तिस सैहरे च कुच्छ दिन तिकर रैह्।

¹³ बिस्रामे आल़े दिन अहां सैहरे दे फाटके दे बाहर नदियां कनारे एह़ समझी करी गै, कि तित्थु प्रार्थना करणे दी जगाह हुंगी; कने बेई करी तिन्हां जणासा जो जेह्ड़ियां कठ्ठियां होईयां थियां, गल्लां करणा लग्गे।

¹⁴ लुदिया नांऐ दी इक्क थुआतीरा सैहरे दी बैजनी कपड़ेयां बेचणे आल़ी इक्क जणांस जेह्ड़ी परमात्मे दी भक्तणी थी। परमात्मे तिसादा मन खोलेया कि सैह़ पौलुसैं दियां गल्लां पर मन लगां।

¹⁵ जाह़लू तिन्नै अपणे परवारे सौगी बपतिस्मा लेआ, तां तिन्नै अहां नैं विणती कित्ती, जे तुहां मिन्जो प्रभु दी बसुआसणी समझदे हन, तां चली करी मेरे घरैं रेह्आ, “कने सैह़ अहां जो मनाई करी लेई गेई।”

पौलुस कने सीलास जेला च

¹⁶ जाह़लू अहां प्रार्थना करणे दिया जगाह जो चलेयो थे, ताह़लू अहां जो इक्क दासी मिल्ली जिसा च इक्क ऐदई दुष्टआत्मा थी, जिसादे जरिये लोकां दा भाग्य दस्सी करी अपणे मालकां जो बड़ी धन-दौलत कम्माई करी दिंदी थी।

¹⁷ सैह़ पौलुस कने अहां दे पचांह़ आई करी जोरे नैं डड्डणा लग्गी, “एह़ माणु परम प्रधान परमात्मे दे दास हन, जेह्ड़े अहां जो उद्धारे दे रस्ते दा संदेस सणांदे हन।”

¹⁸ सैह़ बड़े दिन तिकर इआं ई करदी रेई, अपर पौलुस दुखी होएया, कने मुड़ी करी तिसा दुष्टआत्मा नैं ग्लाणा लग्गा, “मैं तिज्जो यीशु मसीह दे नांऐ ते हुक्म दिंदा ऐ कि इसा ते निकल़ी जा।” कने दुष्टआत्मा तिसी बग्त निकल़ी गेई।

¹⁹ जाह़लू तिसादे मालकां दिख्या, कि अहां दी कमाईया दी आसा पर पाणी फिरी गेआ ऐ, तां पौलुसे जो कने सीलासे जो पकड़ी करी चौके दे प्रधानां अल्ल घसीटदे लेई गै;

²⁰ कने तिन्हां जो हाकमां अल्ल लेई गै कने ग्लाणा लग्गे, “एह़ माणु जेह्ड़े यहूदी हन, अहां दे सैहरे च बड़ी हलचल मचाणा लगेयो हन;

²¹ कने ऐदिआं रीतियां दस्सा दे हन, जिन्हां जो ग्रहण करणा कने मन्नणा अहां रोमी माणुआं तांई खरा नीं ऐ।”

²² ताह़लू भीड़ा दे लोक पौलुस कने सीलासे दे खलाफ किठ्ठे होई करी चढ़ी आये, कने हाकमां तिन्हां दे कपड़े फाड़ी दित्ते, कने तिन्हां जो बैंत मारने दा हुक्म दित्ता।

²³ मते बैंत लगाई करी हाकमां तिन्हां जो जेला च पाई दित्ता कने जेलरे जो हुक्म दित्ता कि तिन्हां जो कड़े पैहरे च रखा।

²⁴ जेलरैं एह़ हुक्म सुणी करी तिन्हां जो जेला दी कोठरिया च रखेया कने तिन्हां देयां पैरां जो लकड़िया दिया कढ़िया दे खाँचेया च ठोकी करी कसी दित्ते।

पौलुस कने सीलास दी जेला ते मुक्ति

²⁵ अधिया राती पौलुस कने सीलास प्रार्थना करदे-करदे परमात्मे देयां भजना गा दे थे, कने कैदी तिन्हां दी सुणा दे थे।

²⁶ इतणे च इकदम हिल्लण होणा लग्गा, ऐत्थु तिकर कि जेला दी नीई तिकर हिल्ली गेई, कने इकदम जेला दे दरवाजे खुली गै, कने सारे बंधन खुली गै।

²⁷ जेलर जागी पेआ, कने जेला दे दरवाजे खुले दिक्खी करी समझेया कि कैदी नठ्ठी गै हन, तां तिन्हीं तलवारा कड्डी करी अपणे आप्पे जो मारणा लग्गा।

²⁸ अपर पौलुस जोरे नैं ग्लाणा लग्गा, “अपणे आप्पे जो कुच्छ नकसान मत कर, क्जोकि अहां सारे ऐत्थु ई हन।”

²⁹ ताह़लू तिन्हीं दीय्या मंगवाया कने झट अंदर गेआ, कने कम्मदा-कम्मदा पौलुसे कने सीलासे दे पैरां पेई गेआ;

³⁰ कने तिन्हां जो बाहर अंणी करी ग्लाणा लग्गा, “हे सज्जणो, उद्धार पाणे तांई मैं क्या करैं।”

³¹ तिन्हां ग्लाया, “प्रभु यीशु मसीह पर बसुआस कर, तां तू कने तेरा घराना उद्धार पांगा।”

³² पौलुस कने सीलासें तिसियो कने तिसदे परवारे दे सारे माणुआं जो प्रभु दा वचन सणाया।

³³ कने राती तिसी बग्त जेलरैं तिन्हां जो अंणी करी तिन्हां दे जख्म साफ कित्ते, कने तिन्हीं अपणे परवारे दे सारे माणुआं सौगी बपतिस्मा लेआ।

³⁴ ताह़लू जेलर पौलुस कने सीलासे जो अपणे घरेयो लेईआ कने तिन्हां जो खाणे जो दित्ता, कने पूरे परवारे सौगी परमात्मे पर बसुआस करी नैं बड़े खुस थे।

³⁵ जाह़लू भ्याग होई तां हाकमे सपाईयां दे हत्थ संदेसा घल्लेया कि तिन्हां माणुआं जो छड्डी देआ।

³⁶ जेलरैं एह़ गल्लां पौलुसे नैं ग्लाईयां, “हाकमे तुहां जो छड्डी दैणे दा हुक्म घल्ली दित्ता ऐ। इसतांई हुण निकल़ी नैं खुस होई करी चली जा।”

³⁷ अपर पौलुस तिन्हां नैं ग्लाणा लग्गा, “तिन्हां अहां जो बगैर मुकदमे ते सबना लोकां सामणै मारेया, जाह़लू कि अहां रोमी माणु हन, भिरी भी अहां जो जेला च पाई दित्ता। कने हुण सैह़ अहां जो चुपचाप बाहर कड्डणा चांह़दे हन! बिलकुल नीं! अप्पु तिन्हां जो ऐत्थु औणां देआ, सैई अहां जो ऐत्थु ते बाहर छड्डी दिंगे।”

³⁸ सपाईयां एह़ गल्लां हाकमा नैं ग्लाईयां, कने सैह़ एह़ सुणी करी कि रोमी माणु हन, डरी गै,

³⁹ कने आई करी तिन्हां ते माफी मंगी, कने बाहर लेई जाई करी विणती कित्ती कि सैहरे ते चली जा।

⁴⁰ सैह़ जेला ते निकल़ी करी लुदिया नांऐ दिया जणासा दे घरेयो गै, कने बसुआसी भाऊआं नैं मिल्ली करी तिन्हां जो सांति दित्ती, कने चली गै।