प्रेरितां दे कम्म 15 - काँगड़ी

यरूशलेम सैहरे दी सभा

¹ भिरी कुच्छ यहूदी बसुआसी यहूदिया प्रदेसे ते आई करी बसुआसी भाऊआं जो सिक्षा दैणा लग्गे, “जे मूसा दी रीतिया पर तुहां दा खतणा ना होयैं तां तुहां उद्धार नीं पाई सकदे हन।”

² जाह़लू पौलुसे कने बरनबासे दी तिन्हां सौगी बड़ी लड़ाई कने बैंह्सबाजी होई तां एह़ ठैहराया गेआ कि पौलुस कने बरनबास कने तिन्हां ते कुच्छ माणु इन्हां गल्लां दे बारे च चर्चा करणे तांई प्रेरितां कने स्याणेयां अल्ल यरूशलेम सैहरे जो जान।

³ कलीसिया दे लोकां तिन्हां जो रस्ते च जाणे तांई कुच्छ पैसा कने खाणे दियां चीज्जां दित्तियां; ताह़लू सैह़ फीनीके प्रदेस कने सामरिया प्रदेसे च होई करी होरनी जातिआं दे लोकां जो मन बदलणे दा समाचार सणांदे गै, कने सारे बसुआसी भाऊ बड़े खुस होये।

⁴ जाह़लू सैह़ यरूशलेम सैहरे च पुज्जे, तां कलीसिया कने प्रेरित कने स्याणे तिन्हां नैं बड़िया खुसिया सौगी मिल्ले, कने पौलुस कने बरनबासें दस्सेया कि परमात्मैं तिन्हां सौगी होई करी कदेय-कदेय कम्म कित्यो हन।

⁵ अपर फरीसियां दी मंडल़िया ते जिन्हां बसुआस कित्या था, तिन्हां च कुच्छ लोक उठी करी ग्लाणा लग्गे, “होरनी जातिआं दे लोकां जो खतणा करवाणे कने मूसा दी व्यबस्था जो मन्नणे दा हुक्म दैणा चाइदा।”

⁶ ताह़लू प्रेरित कने स्याणे इन्हां गल्लां दे बारे च सलाह करणे तांई किठ्ठे होये।

⁷ ताह़लू पतरसैं नैं बड्डी बैंह्सबाजी होई जाणे दे बाद पतरस खड़ोई करी तिन्हां नैं ग्लाणा लग्गा, “हे भाऊओ, तुहां जाणदे हन कि बड़े दिन होये परमात्मैं तुहां ते मिन्जो चुणी लेआ कि मेरे जरिये होरनी जातिआं दे लोक परमात्मे दा वचन सुणी करी बसुआस करन।

⁸ मने जो परखणे आल़े परमात्मैं तिन्हां जो भी अहां साइआं पवित्र आत्मा देई करी, एह़ दस्सेया कि तिन्हीं तिन्हां जो अपणे लोक समझी करी अपनाई लेआ ऐ;

⁹ कने बसुआसे दिया बज़ाह ते तिन्हां दे मन साफ करी नैं अहां च कने तिन्हां च कोई भेत नीं रखेया,

¹⁰ तां हुण तुहां क्जो परमात्मे दी परीक्षा करदे हन कि चेलेयां दिया गर्दना पर ऐदेया जुंगल़ा रखा, जिसियो ना तां अहां दे स्याणे चुक्की सकदे थे कने ना तां अहां चुक्की सकदे हन।”

¹¹ हाँ, अहां दा एह़ बसुआस ऐ कि जिस तरीके नैं सैह़ प्रभु यीशुये दे अनुग्रह दे जरिये उद्धार पांगे; तिस तरीके नैं अहां भी पांगे।

¹² ताह़लू सारी सभा दे लोक चुपचाप बरनबास कने पौलुसे दी सुणना लग्गे, कि परमात्मैं तिन्हां दिया बज़ाह ते होरनी जातिआं दे लोकां च कदेय बड़े-बड़े चमत्कार, कने अनोखे कम्म दस्से हन।

याकूबे दा फैसला

¹³ जाह़लू पौलुस कने बरनबास ग्लाई बैठे, तां याकूब ग्लाणा लग्गा, “हे भाऊओ, मेरी सुणा।

¹⁴ शमौन पतरसैं समझाया, कि परमात्मैं होरनी जाति ते कुच्छ लोकां जो अपणी सेवा तांई चुणी करी, सबते पैहल्ले किंआं तिन्हां पर दया कित्ती।

¹⁵ “कने इसते भविष्यवक्तां दियां गल्लां भी मिलदियां हन, जिंआं कि पवित्रशास्त्रे च लिख्या ऐ,

¹⁶ ‘इसते बाद मैं भिरी आई करी दाऊदे दा राज्ज पैहल्ले साइआं करी दिंगा, जेह्ड़ा तिसदे दुश्मणा दे जरिये नास कित्या था, कने तिसदे खण्डरां जो भिरी सवारगा, कने तिसियो बणांगा,

¹⁷ इसतांई बाक्कि लोक, मतलब सारे होरनी जातिआं दे लोकां जिन्हां जो मैं चुणेया ऐ, प्रभु जो तोपा,

¹⁸ एह़ सैई प्रभु ग्लांदा ऐ जेह्ड़ा संसारे दी सृष्टिया ते इन्हां गल्लां दा समाचार दिंदा आया ऐ।’

¹⁹ “इसतांई मेरी सोच एह़ ऐ कि दूईआं जातिआं च जेह्ड़े लोक परमात्मे अल्ल ओंदे हन, अहां तिन्हां जो दुख ना दैन;

²⁰ अपर तिन्हां जो चिठ्ठी लिखी घल्लन, कि सैह़ मूर्तियां दे सामणै चढ़ाईयां चीज्जां ते, ब्यभिचार, गल़ा घोटी करी मारेयो जानवरां दे मासे ते कने खूने ते दूर रैह़न।

²¹ क्जोकि पराणे जमाने ते सैहरे-सैहरे च मूसा दी व्यबस्था दा प्रचार करणे आल़े पाये जांदे हन, कने मूसा दी व्यबस्था हर बिस्रामे आल़े दिन आराधनालय च पढ़ी जांदी ऐ।”

होरनी जातिआं दे बसुआसियां जो चिठ्ठी

²² ताह़लू यरूशलेम सैहरे दी सारी कलीसिया सौगी प्रेरितां कने स्याणेयां जो खरा लग्गा, कि अपणे माणुआं च कुच्छ माणु चुणन, क्जोकि यहूदा जिसियो बरसब्बा भी ग्लांदे हन, कने सीलासे जो जेह्ड़ा बसुआसी भाऊआं च बड़े भरी इज्जतदार अगुऐ थे; कने तिन्हां जो पौलुसे कने बरनबासे सौगी अन्ताकिया सैहरे दिया कलीसिया जो घल्लन।

²³ तिन्हां पौलुस कने बरनबासे दे हत्थे एह़ लिखी घल्लेया, “अन्ताकिया सैहरे कने सीरिया, किलिकिया प्रदेसे च रैहणे आल़ेआं बसुआसी भाऊआं जो जेह्ड़े होरनी जातिआं ते हन, प्रेरितां कने स्याणे भाऊआं दा नमस्कार।

²⁴ “अहां सुणेया ऐ, कि अहां च कुच्छ लोक तित्थु जाई करी, तुहां जो अपणियां गल्लां नैं डराई दित्ता; कने तुहां दे मन बदली दित्ते हन अपर अहां तिन्हां जो कोई हुक्म नीं दित्या था।

²⁵ इसतांई अहां इक्क मन होई करी ठीक समझेया कि चुणेयां माणुआं जो अपणे प्यारे बरनबासे कने पौलुसे सौगी तुहां अल्ल घल्लन।

²⁶ एह़ सैह़ माणु हन, जिन्हां अहां दे प्रभु यीशु मसीह दे नांऐ तांई अपणे प्राण मुसीबता च पाएयो हन।

²⁷ “इसतांई अहां यहूदा जो कने सीलासे जो घल्लेया ऐ, जेह्ड़े अपणे मुँऐ ते इन्हां सारियां गल्लां जो दस्सी दिंगे।

²⁸ पवित्र आत्मा जो कने अहां जो ठीक पता लग्गा ऐ कि इन्हां जरूरी गल्लां जो छड्डी करी, तिज्जो पर होर भार ना पान;

²⁹ कि तुहां मूर्तियां दे सामणै चढ़ाईयां चीज्जां ते, ब्यभिचार, गल़ा घोटी करी मारेयो जानवरां दे मासे ते कने खूने ते दूर रेह्आ। जे तुहां अपणे आप्पे जो इन्हां गल्लां ते बचाई रखा तां तुहां दा भला हुंगा। अच्छा हुण अहां जो विदा करा।”

³⁰ इस तरांह तिन्हां जो विदा करी दित्ता भिरी सैह़ अन्ताकिया सैहरे च पुज्जे, कने सभा जो किठ्ठा करी नैं सैह़ चिठ्ठी तिन्हां जो देई दित्ती।

³¹ सैह़ चिठ्ठी पढी करी तिसा सिक्षा दियां गल्लां ते बड़े खुस होये।

³² यहूदैं कने सीलासें जेह्ड़े अप्पु भी भविष्यवक्ता थे, मतिआं गल्लां नैं बसुआसी भाऊआं जो सिक्षा देई करी मजबूत कित्ता।

³³ यहूदा कने सीलास कुच्छ दिन रैह्, कने ताह़लू बसुआसी भाऊआं तिन्हां जो सांतिया नैं विदा करी नैं यरूशलेम दी कलीसिया च बापस घल्ली दित्ता।

³⁴ अपर सीलासे जो तित्थु रैहणा खरा लग्गा।

³⁵ कने पौलुस कने बरनबास अन्ताकिया सैहरे च रेई पै, कने होर मते माणुआं सौगी प्रभु यीशुये दे वचने दी सिक्षा दिंदे कने सुसमाचार सणांदे रैह्।

पौलुसे दी दूई प्रचार यात्रा - पौलुसे च कने बरनबासे च बैर

³⁶ कुच्छ दिनां बाद पौलुसैं बरनबासे नैं ग्लाया, “जिन्हां-जिन्हां सैहरां च अहां प्रभु दा वचन सणाया था, ओआ, भिरी तिन्हां च चली करी अपणेयां बसुआसी भाऊआं जो दिक्खी ओंदे कि सैह़ कदेय हन।”

³⁷ ताह़लू बरनबासें यूहन्ने जो जिसियो मरकुस भी ग्लांदे हन, सौगी नीणे दा ख्याल कित्ता।

³⁸ अपर पौलुसैं तिसियो सौगी नीणा खरा नीं समझेया, क्जोकि सैह़ पन्फूलिया प्रदेसे च तिन्हां ते लग्ग होई गेआ, कने कम्मे पर तिन्हां सौगी नीं गेआ था।

³⁹ कने बड़ी बैंह्स होई कि पौलुस कने बरनबास इक्की दूये ते लग्ग होई गै; कने बरनबास, मरकुसे जो लेई करी समुंदरी जाह्जे पर बेई करी साइप्रस टापूये जो चली गेआ;

⁴⁰ अपर पौलुसैं सीलासे जो चुणी लेआ, कने बसुआसी भाऊआं जो परमात्मे दे अनुग्रह च सौंपी करी अन्ताकिया सैहरे ते भी चली गेआ;

⁴¹ कने पौलुस कने सीलास कलीसियां जो बसुआसे च मजबूत करदे-करदे सीरिया कने किलिकिया प्रदेसे ते होई नैं निकल़े।