प्रेरितां दे कम्म 14 - काँगड़ी

इकुनियुम सैहरे च पौलुस कने बरनबास

¹ इकुनियुम सैहरे च इआं होएया कि सैह़ यहूदियां देयां आराधनालयां च सौगी-सौगी गै, कने इस तरीके नैं गल्लां कित्तियां कि मतेआं यहूदी माणुआं कने यूनानी माणुआं बसुआस कित्ता।

² अपर बसुआस नीं करणे आल़े यहूदियां होरनी जातिआं दे मन बसुआसी भाऊआं दे खलाफ भड़काये, कने नफरत पैदा करी दित्ती।

³ पौलुस कने बरनबास मतेआं दिनां तांई तित्थु रैह्, कने प्रभु दे भरोसे पर हिम्मता सौगी गल्लां करदे थे; कने सैह़ तिन्हां दे हत्थां ते चमत्कार कने अनोखे कम्म करवाई करी अपणे अनुग्रह दे वचनां पर गवाही दिंदा था।

⁴ अपर सैहरे देयां लोकां च बैर पेई गिया था, इसते कई माणु यहूदियां दे पास्से कने कई प्रेरितां पास्से होई गै।

⁵ जाह़लू होरनी जातिआं कने यहूदी तिन्हां दा अपमान कने तिन्हां पर पत्थर मारने तांई अपणे अधिकारियां सौगी तिन्हां पर दौड़े,

⁶ ताह़लू सैह़ इसा गल्ला जो जाणी गै, कने लुकाऊनिया प्रदेसे दे लुस्त्रा कने दिरबे सैहरां च, कने अक्खे-बक्खे देयां प्रदेसां च नठ्ठी गै

⁷ कने तित्थु सुसमाचार सणाणा लग्गे।

लुस्त्रा सैहरे च कने दिरबे सैहरे च

⁸ लुस्त्रा सैहरे च इक्क माणु बैठेया था, जेह्ड़ा पैरां दा कमजोर था। सैह़ जन्म ते ई लंगडा था कने कदी भी नीं चलेया था।

⁹ सैह़ पौलुसे जो गल्लां करदे सुणा दा था। पौलुसैं तिसदे पास्से टक्क लगाई करी दिख्या कि तिसियो खरे होणे दा बसुआस ऐ,

¹⁰ कने जोरे नैं ग्लाणा लग्गा, “अपणे पैरां दे भार सिध्धा खड़ा हो।” ताह़लू सैह़ उछल़ी करी चलणा फिरणा लग्गी पेआ।

¹¹ माणुआं पौलुसे दा एह़ कम्म दिक्खी करी लुकाऊनिया दी भासा च जोरे नैं ग्लाया, “अहां दे बिच्च माणु दा रूप धारण करी नैं देवता लौई आये हन।”

¹² कने तिन्हां बरनबासे जो ज्यूस, कने पौलुसे जो हिरमेस ग्लाया क्जोकि पौलुस गल्लां करणे च खास था।

¹³ ज्यूसे दे तिस मंदरे दा पुजारी जेह्ड़ा तिन्हां दे सैहरे सामणै था, दांद कने फूलां दे हार फाटके पर लगाई करी लोकां सौगी बलिदान करणा चांह़दा था।

¹⁴ अपर प्रेरित बरनबासें कने पौलुसैं जाह़लू एह़ सुणेया, तां सैह़ बड़े भरी दुखी होये, कने तिन्हां अपणे कपड़े फाड़े, कने भीड़ा च मिल्ली गै, कने जोरे नैं ग्लाणा लग्गे,

¹⁵ “हे लोको, तुहां क्या करदे हन, अहां भी तां तुहां साइआं सुख-दुख भोगणे आल़े माणु हन, कने तुहां जो सुसमाचार सणांदे हन, कि तुहां इन्हां बेकार चीज्जां ते लग्ग होई करी जिन्दे परमात्मे अल्ल ओआ, जिन्हीं सुअर्ग कने धरती कने समुंदर कने जेह्ड़ा कुच्छ तिन्हां च ऐ बणाया।

¹⁶ तिन्हीं बीते बग्तां च सारियां जातिआं दे लोकां जो अपणे-अपणे रस्ते च चलणा दित्ता।

¹⁷ भिरी भी सैह़ भलाई दे कम्म करी नैं अपणे बारे च गवाही दिंदा रेह्आ; कने सैह़ तुहां तांई अम्बरे ते बरखा कने फल़वन्त मौसम देई करी तुहां जो खाणे नैं कने तुहां दे मनां जो खुसिया नैं भरदा रेह्आ।”

¹⁸ एह़ ग्लाई करी भी तिन्हीं लोकां जो बड़िया मुस्कला नैं रोकेया कि तिन्हां तांई बलिदान नीं करन।

¹⁹ अपर कुच्छ यहूदियां अन्ताकिया कने इकुनियुम सैहरां ते आई करी लोकां जो अपणे बक्खे करी लेआ, कने पौलुसे पर पत्थर मारे, कने मरेया समझी करी तिसियो सैहरे दे बाहर घसीटी करी लेई गै।

²⁰ अपर जाह़लू चेले तिसदे चौंन्नी पास्से आई खड़ोते, तां सैह़ उठी करी सैहरे च गेआ कने दूँये दिने बरनबासे सौगी दिरबे सैहरे जो चली गेआ।

सीरिया प्रदेस ते अन्ताकिया सैहरे जो बापस औणां

²¹ पौलुस कने बरनबास तिस सैहरे दे लोकां जो सुसमाचार सणाई करी, कने मते चेले बणाई करी, लुस्त्रा, इकुनियुम कने अन्ताकिया सैहरे जो बापस चली आये,

²² कने हर इक्की सैहरे च चेलेयां दे मना जो मजबूत करदे रैह् कने एह़ सिक्षा दिंदे थे कि बसुआसे च बणी रेह्आ; कने एह़ ग्लांदे थे, “अहां जो मते दुख झेली करी परमात्मे दे राज्जे च प्रवेश करणा पोणा।”

²³ कने तिन्हां हर इक्की कलीसिया च तिन्हां तांई स्याणे ठैहराये, कने ब्रते सौगी प्रार्थना करी नैं तिन्हां जो प्रभु दे हुआले करी दित्ता, जिस पर तिन्हां बसुआस कित्या था।

²⁴ ताह़लू पिसिदिया प्रदेसे ते होई करी सैह़ पन्फूलिया प्रदेसे च पुज्जे;

²⁵ भिरी पीरगा सैहरे च वचन सणाई करी अत्तलिया सैहरे च आये,

²⁶ कने तित्थु ते सैह़ समुंदरी जाह्जे पर अन्ताकिया सैहरे जो गै, जित्थु ते तिन्हां जो परमात्मे दे अनुग्रह च सौंपी करी तिस कम्मे तांई घल्लेया था, जिसियो सैह़ हुण पूरा करी नैं बापस आई गै।

²⁷ कने अन्ताकिया सैहरे पुज्जी करी तिन्हां कलीसिया किठ्ठी कित्ती कने दस्सेया, कि परमात्मैं तिन्हां सौगी रेई करी कदेय बड़े-बड़े कम्म कित्ते, कने होरनी जाति दे लोकां जो किंआं परमात्मैं यीशु मसीह पर बसुआस करणे जोग्गा बणाया।

²⁸ कने पौलुस कने बरनबास चेलेयां सौगी मते दिनां तिकर रैह्।