प्रेरितां दे कम्म 10 - काँगड़ी

कुरनेलियुसे दा पतरसे जो सदणा

¹ कैसरिया सैहरे च कुरनेलियुस नांऐ दा इक्क माणु था, जेह्ड़ा इतालियानी नांऐ दी सेना दा सूबेदार था।

² सैह़ परमात्मे दा भक्त था, कने अपणे सारे घराने सौगी परमात्मे ते डरदा था, कने यहूदी गरीब लोकां जो बड़ा दान दिंदा, कने बराबर परमात्मे नैं प्रार्थना करदा था।

³ इक्क दिन दोपैरा बाद तिन्हीं दर्शन च स्पष्ट रूपे नैं दिख्या कि परमात्मे दा इक्क सुअर्गदूत तिस अल्ल अंदर आई करी ग्लाया, “हे कुरनेलियुस।”

⁴ तिन्हीं तिसियो ध्याने नैं दिख्या कने डरी करी ग्लाया, “हे प्रभु, क्या ऐ?” तिन्हीं तिस नैं ग्लाया, “तेरी प्रार्थना सुणी लेई ऐ कने तेरे दान परमात्मे सामणै याद कित्ते गै हन।

⁵ कने हुण याफा सैहरे च माणु घल्ली करी शमौने जो, जेह्ड़ा पतरस नांऐ ते जाणेया जांदा ऐ, सद्दी लै।

⁶ सैह़ शमौन, चमड़े दा कम्म करणे आल़े दे घरैं परोणा बणी करी रैह् दा ऐ, जिसदा घर समुंदरे कनारे ऐ।”

⁷ जाह़लू सैह़ सुअर्गदूत जिन्हीं तिस नैं गल्लां कित्तियां थियां चली गेआ, तां तिन्हीं दो सेवक, कने जेह्ड़े तिसदे सामणै हाजर रैंह्दे थे तिन्हां च इक्क परमात्मे दा भक्त सपाईये जो सद्देया,

⁸ कने तिन्हां जो सारियां गल्लां दस्सी करी पतरसे जो लेयोणे तांई याफा सैहरे जो घल्लेया।

पतरसे दा दर्शन

⁹ दूये दिने जाह़लू सैह़ चलदे-चलदे सैहरे अल्ल पुज्जे, तां दोपैरा दे बग्त पतरस छत्ती पर प्रार्थना करणा गेआ।

¹⁰ तिसियो भुख लग्गी कने कुच्छ खाणा चांह़दा था, अपर जाह़लू सैह़ खाणा बणा दे थे तां सैह़ बेहोसी दिया हालता च होई गेआ;

¹¹ कने ताह़लू पतरसैं इक्क दर्शन दिख्या, कि अम्बर खुली गेआ; कने इक्क बड़ी चादर थाल़े साइआं चौंन्नी कुणेयां ते लटकदी होई, अम्बरे ते लौई करी मिन्जो अल्ल धरती पर आई।

¹² जिस च धरतिया दे सब तरांह दियां चिड़ियां कने रैंगणे आल़े जानवर कने अम्बरे दे पंछी थे।

¹³ तिसियो इक्क ऐदई उआज़ सुम्मी, “हे पतरस उठ, मार कने खा।”

¹⁴ अपर पतरसैं ग्लाया, “नीं प्रभु कदी भी नीं; क्जोकि मैं कोई भी अपवित्र या बुरी चीज्ज नीं खाई ऐ।”

¹⁵ भिरी दूई बरी तिसियो उआज़ सुम्मी, “जेह्ड़ा कुच्छ परमात्मैं सुद्ध करी दित्या ऐ, तिसियो तू असुद्ध मत ग्ला।”

¹⁶ त्री बरी भिरी इआं ई होएया; ताह़लू सैह़ थाल़ अम्बरे पर चुक्की लेआ।

कुरनेलियुस दे घरैं पतरस

¹⁷ जाह़लू पतरस अपणे मने च सोचा ई करदा था, कि एह़ दर्शन जेह्ड़ा मैं दिख्या, इसदा क्या मतलब होई सकदा ऐ, तां दिक्खा, सैह़ माणु जिन्हां जो कुरनेलियुसें घल्लेया था, शमौने दे घरे दा पता पुछदे-पुछदे तिसदे ई घरैं आई रैह्,

¹⁸ कने हक्कां पाई करी पुछणा लग्गे, “क्या शमौन जिसियो पतरस भी ग्लांदे हन, परोणा ऐत्थु ई ऐ?”

¹⁹ पतरस तां तिस दर्शने दे बारे च सोचा दा ई था, कि पवित्र आत्मा तिस नैं ग्लाणा लग्गा, “दिक्ख त्रै माणु तिज्जो तोपा दे हन।

²⁰ कने उठी करी थल्लै जा, कने बेझिझक तिन्हां सौगी चली जा; क्जोकि मैंई तिन्हां जो घल्लेया ऐ।”

²¹ ताह़लू पतरसैं लौई करी तिन्हां माणुआं नैं ग्लाया, “दिक्खा, जिसियो तुहां तोपा दे हन, सैह़ मैंई ऐ तुहां दे ओणे दी क्या बज़ाह ऐ?”

²² तिन्हां ग्लाया, “कुरनेलियुस सूबेदार जेह्ड़ा धर्मी कने परमात्मे ते डरणे आल़े कने सारी यहूदी जाति च नेक माणु ऐ, तिन्हीं इक्क पवित्र सुअर्गदूते दा दर्शन पाया ऐ कि तिज्जो अपणे घरैं सद्दी करी तिज्जो ते वचन सुणे।”

²³ ताह़लू तिन्हीं तिन्हां जो अंदर सद्दी करी तिन्हां जो रैहणे दी जगाह दित्ती। त्रीये दिने सैह़ तिन्हां सौगी गेआ, कने याफा सैहरे दे कुच्छ बसुआसी भाऊ तिस सौगी चली पै।

²⁴ दूये दिने सैह़ कैसरिया सैहरे च पुज्जे, कने कुरनेलियुसें अपणे परवारे जो कने प्यारे साथियां जो किठ्ठा करी नैं तिन्हां दा इन्तजार करदा रेह्आ था।

²⁵ जाह़लू पतरस अंदरेयो औणां लगेया था, कुरनेलियुस तिस नैं मिल्ला कने तिसदे पैरां पर पेई करी प्रणांम कित्ता;

²⁶ अपर पतरस तिसियो ठुआल़ी करी ग्लाणा लग्गा, “खड़ोई जा, मैं भी तां माणु ऐ।”

²⁷ कने तिस सौगी गल्लबात करदा-करदा अंदर गेआ, कने मते लोकां जो किठ्ठे दिक्खी करी

²⁸ पतरसैं तिन्हां नैं ग्लाया, “तुहां जाणदे हन कि होरनी जाति दी संगति करणा या तिस अल्ल जाणा अहां यहूदियां तांई अहां दे कानूना दे खलाफ ऐ, अपर परमात्मैं मिन्जो दस्सेया ऐ कि कुसी भी माणुये जो अपवित्र या बुरा मत ग्ला।

²⁹ इसतांई मैं जाह़लू सद्देया तां बगैर ग्लाणे ते ई चली आया। हुण मैं पुछदा ऐ कि मिन्जो कुस कम्मे तांई सद्देया ऐ।”

³⁰ कुरनेलियुस ग्लाणा लग्गा, “चार दिन पैहल्ले इसी बग्त, मैं अपणे घरैं दोपैरा बाद प्रार्थना करा दा था; तां दिक्खा परमात्मे दा इक्क सुअर्गदूत चमकदे कपड़े लगाई नैं, मिन्जो सामणै आई खड़ोता।

³¹ कने ग्लाणा लग्गा, ‘हे कुरनेलियुस, तेरी प्रार्थना सुणी लेई ऐ कने तेरे दान परमात्मे सामणै याद कित्ते गै हन।

³² इसतांई कुसी जो याफा सैहरे च घल्ली करी शमौने जो जिसियो पतरस भी ग्लांदे हन, सद्दी घल्ल। समुंदरे कनारे शमौन, चमड़े दा कम्म करणे आल़े दा परोणा ऐ।’

³³ ताह़लू मैं झट तिज्जो अल्ल माणु घल्ले, कने तैं खरा कित्ता जेह्ड़ा तू आई गेआ। हुण अहां सारे ऐत्थु परमात्मे दे सामणै हन, तांजे जेह्ड़ा कुच्छ परमात्मैं तिज्जो नैं ग्लाया ऐ, तिसियो सुणा।”

पतरसे दी सिक्षा

³⁴ ताह़लू पतरस ग्लाणा लग्गा, “हुण मिन्जो बसुआस होई गेआ कि परमात्मा कुसी दा भेदभाव नीं करदा।

³⁵ अपर हर जातिया च जेह्ड़ा परमात्मे ते डरदा कने धार्मिकता दे कम्म करदा ऐ, सैह़ तिसियो अपनांदा ऐ।

³⁶ “जेह्ड़ा वचन तिन्हीं इस्राएली लोकां अल्ल घल्लेया, जाह़लू कि तिन्हीं यीशु मसीह दिया बज़ाह ते (जेह्ड़ा सबना दा प्रभु ऐ) सांति दा सुसमाचार सणाया,

³⁷ एह़ वचन तुहां जाणदे हन, जेह्ड़ा यूहन्ना दे बपतिस्मे दे प्रचारे ते बाद गलील प्रदेसे ते सुरू होई करी सारे यहूदिया प्रदेसे च फैली गेआ:

³⁸ परमात्मैं जिस तरीके नैं यीशु नासरिये जो पवित्र आत्मा कने सामर्थी नैं अभिषेक कित्ता; सैह़ भलाई करदा कने सबना जो जेह्ड़े सैताने दे सतायो हन, खरा करी दिंदा, क्जोकि परमात्मा तिस सौगी था।

³⁹ “अहां तिन्हां सारे कम्मां दे गवाह हन; जेह्ड़े तिन्हीं यहूदिया प्रदेस च कने यरूशलेम सैहरे च भी कित्ते, कने यहूदी अगुआं तिसियो सूल़िया पर टुंगी करी मारी दित्ता।

⁴⁰ अपर तिसियो परमात्मैं त्रीये दिने भिरी दुवारी मरेयां ते जिन्दा कित्ता, कने प्रगट भी करी दित्ता;

⁴¹ सारेयां लोकां पर नीं अपर तिन्हां गवाहां पर जिन्हां जो परमात्मैं पैहल्ले ते ई चुणी लेआ था, मतलब अहां पर जिन्हां तिसदे मरेयां ते जिन्दे होणे ते बाद तिन्हां सौगी खादा पीता;

⁴² कने तिन्हीं अहां जो हुक्म दित्ता, कि सारे लोकां च प्रचार करा कने गवाही देआ, कि एह़ सैई यीशु ऐ जिसियो परमात्मैं जिन्देया कने मरेयां दा न्यायी ठैहराया ऐ।

⁴³ तिसदी सारे भविष्यवक्ता गवाही दिंदे हन कि जेह्ड़ा कोई तिस पर बसुआस करगा, तिसियो तिस नांऐ दे जरिये पापां दी माफी मिलगी।”

होरनी जातिआं पर पवित्र आत्मा लौणा

⁴⁴ पतरस एह़ गल्लां ग्ला दा ई था कि सारे वचन सुणने आल़ेआं पर पवित्र आत्मा लौई आया।

⁴⁵ कने जितणे खतणा कित्यो यहूदी बसुआसी पतरसे सौगी आएयो थे, एह़ सारे हरान होई गै कि होरनी जातिआं पर भी पवित्र आत्मा दा दान दित्ता गेआ ऐ।

⁴⁶ क्जोकि तिन्हां-तिन्हां जो हर किस्मां दी भासा ग्लांदे कने परमात्मे दी महिमा करदे सुणेया। इसा गल्ला पर पतरसैं ग्लाया,

⁴⁷ “क्या कोई पाणी जो रोकी करी रखी सकदा ऐ कि एह़ बपतिस्मा नीं पान, जिन्हां अहां साइआं परमात्मे ते पवित्र आत्मा जो पाया ऐ?”

⁴⁸ कने पतरसैं हुक्म दित्ता कि तिन्हां जो यीशु मसीह दे नांऐ पर बपतिस्मा दित्ता जां। ताह़लू तिन्हां तिस नैं विणती कित्ती, कि सैह़ कुच्छ दिन होर अहां सौगी रैह्।