2 तीमुथियुस 3 - काँगड़ी

आखरी दे दिनां च बुरे कम्म

¹ तीमुथियुस जेह्ड़ी गल्ल मैं हुण तिज्जो नैं ग्लांगा, तिसा जो ध्याने नैं सुण कि आखरी दिनां च अहां पर यीशु मसीह दे बापस ओणे ते पैहल्ले बड़ा बुरा बग्त ओंगा।

² क्जोकि माणु मतलबी, धन-दौलता दा लालची, डींगमार, घमंडी, निंदा करणे आल़ा, माँऊ-बुढ़े दा हुक्म नीं मन्नणे आल़ा, एहसान फरामोस, अपवित्र,

³ बेरैहम, माफ नीं करणे आल़ा, दोस लगाणे आल़े, अप्पु पर काबू नीं रखणे आल़ा, जालिम, खरे नैं बैर रखणे आल़ा,

⁴ ढीठ, घमंडी, परमात्मे नैं प्यार रखणे आल़े नीं कने बसुआसे जोग्गे नीं अपर सरीरे दियां इच्छां नैं प्यार रखणे आल़े हुंगे।

⁵ सैह़ एह़ दखावा करगे कि सैह़ परमात्मे दी भक्ति करदे हन, अपर सैह़ परमात्मे दिया सामर्थी जो नीं मनगे। ऐदेयां लोकां सौगी मेल-जोल मत रखा।

⁶ क्जोकि इन्हां च कुच्छ लोक ऐदेय भी हन जेह्ड़े लोकां दे घरां च गुप चुप जाई नैं मूर्ख जणासां जो बसे च करी लैंदे हन, जिन्हां दे मन पापां दे थल्लैं दबोयो हन कने हर किस्मां दियां इच्छां दे बसे च हन।

⁷ कने एह़ जणासां हमेसा नौईआं गल्लां सिखदियां हन अपर मसीह दिया सच्चाईया जो कदी नीं समझी सकदियां।

⁸ कने एह़ झूठे सिक्षक मसीह दी सच्चाईया दा बरोध करदे हन, ठीक तिंआं ई जिंआं ई यन्नेस कने यम्ब्रेसे मूसा दा बरोध कित्या था, इन्हां लोकां दी अक्ल भरष्ठ होई गियो, कने सैह़ सच्च बिच्च मसीह पर बसुआस नीं करदे हन।

⁹ अपर तिन्हां दिया मूर्खता तिन्हां जो जादा देर तिकर नीं बचाणा, क्जोकि जिंआं लोकां यन्नेस कने यम्ब्रेसे दिया मूर्खता जो जाणी लेआ, तिंआं ई हर कोई जाणी लैंगा कि एह़ भी मूर्ख हन।

तीमुथियुसे जो खास दिसा-निर्देस

¹⁰ अपर तीमुथियुस तैं मेरिया सिक्षा, चाल-चलण, मकसद, बसुआस, सेहनसक्ति, प्यार, सबर, कने जुल्म होणे पर कने दुखां च मेरा साथ दित्ता।

¹¹ कने तुहां जाणदे हन, कि अन्ताकिया, इकुनियुम कने लुस्त्रा सैहरे च मिन्जो पर लोकां कितणा जुल्म कित्ता, कने किंआं मैं तित्थु तिन्हां जुल्मां जो झेलेया; अपर प्रभुयैं मिन्जो तिन्हां सारेयां ते छड्डाई लेआ।

¹² एह़ गल्ल सच्च ऐ कि जेह्ड़े यीशु मसीह च सच्चाईया दी ज़िन्दगिया जीणे दा फैसला करदे हन, तिन्हां सारेयां पर जुल्म हुंगे;

¹³ अपर दुष्ट कने धोखा दैणे आल़े लोक होर भी जादा बुरे कम्म करगे, सैह़ दूये लोकां जो धोखा दिंगे, कने सैह़ अप्पु भी दूयेयां ते धोखा खांगे।

¹⁴ अपर तीमुथियुस इन्हां गल्लां पर जेह्ड़ियां तैं सिखियां हन, कने जिन्हां पर बसुआस कित्या ऐ, तू लगातार इन्हां गल्लां पर बसुआसे नैं अमल करदा रैह्; क्जोकि तू जाणदा ऐ, कि एह़ सच्चाई तिज्जो कुणी दस्सियो ऐ,

¹⁵ कने तू बचपणे ते ई पवित्रशास्त्रे जो जाणदा ऐ। कने एह़ तिज्जो तिस उद्धारे दा ज्ञान देई सकदा ऐ, जेह्ड़ा तिज्जो यीशु मसीह च बसुआस करणे दे जरिये मिलदा ऐ।

¹⁶ पवित्रशास्त्रे च लिखियो हर इक्क गल्ल परमात्मे दे पास्से ते ऐ, कने एह़ सिक्षा दैणे तांई, समझाणे तांई, सधारणे तांई, कने धार्मिकता दी सिक्षा दैणे तांई अहां दी मदत करदा ऐ,

¹⁷ तांजे परमात्मे दा जण हर इक्क खरे कम्मे जो करणे तांई त्यार होई जां।