2 थिस्सलुनीकियों 3 - काँगड़ीप्रार्थना करणे दी जरूरत 1 आखर च हे मेरे प्यारे साथी बसुआसियो, अहां तांई प्रार्थना करदे रेह्आ, कि अहां प्रभु यीशु मसीह दा सुसमाचार हर जगाह तौल़ी-तौल़ी फैलाई सकन, कने सारे लोक तिस सुसमाचारे पर बसुआस करन, जिंआं तुहां कित्ता, 2 कने एह़ भी प्रार्थना करा, कि परमात्मा अहां जो टेढे कने बुरे लोकां ते बचाई करी रखैं। क्जोकि मते लोक यीशु मसीह दे सुसमाचारे पर बसुआस नीं करदे। 3 अपर तुहां प्रभु पर पूरा बसुआस करी सकदे हन; सैह़ तुहां जो आत्मिक रीतिया नैं मजबूत करगा कने तिस सैताने ते बचाई नैं रखगा। 4 कने अहां जो प्रभु च तुहां पर भरोसा ऐ कि जेह्ड़े हुक्म अहां तुहां जो दिंदे हन, तिन्हां जो तुहां मनदे हन, कने मनदे भी रैंह्गे। 5 अहां प्रार्थना करदे हन, कि प्रभु यीशु मसीह तुहां जो एह़ दस्सें, कि परमात्मा तुहां नैं कितणा प्यार करदा ऐ, कने मुसीबतां च किंआं मजबूत रैहणा ऐ, जिंआं यीशु मसीह था। कम्म करणे दी जिम्मेवारी 6 हे मेरे प्यारे साथी बसुआसियो, अहां तुहां जो अपणे प्रभु यीशु मसीह दे नांऐ ते हुक्म दिंदे हन कि तुहां हर इक्क ऐदेय बसुआसी भाऊये ते लग्ग रेह्आ, जेह्ड़ा अपणे आप्पे जो आलसी बणांदा ऐ कने जेह्ड़ी सिक्षा तिन्हीं अहां ते पाई तिसा मताबक नीं करदा ऐ। 7 क्जोकि तुहां जाणदे हन, कि तुहां जो ठीक तिसा रीतिया नैं ज़िन्दगी जीणा चाइदी, जिंआं अहां जीआ थे। क्जोकि जाह़लू अहां तुहां सौगी रैंह्दे थे, ताह़लू अहां आलसी नीं थे अपर कम्म करदे थे, 8 कने कुसी दी रोटी मुफ्त नीं खादी, अपर रात दिन मेहनत कने कष्टे नैं कम्म-धंधा करदे थे, तांजे तुहां च कुसी पर भी बोझ नीं बणन। 9 अहां कड़ी मेहनत कित्ती, इसतांई नीं कि अहां अल्ल कोई हक्क नीं था, कि अहां तुहां ते अपणिया जरूरता तांई मंगन। अपर इसतांई कि अपणे आप्पे जो तुहां तांई इक्क उदारण पेस करन कि तुहां अहां साइआं ज़िन्दगी जीआ। 10 क्जोकि जाह़लू अहां तुहां अल्ल थे, ताह़लू भी एह़ हुक्म तुहां जो दिंदे थे कि खाणे तांई कम्माणा जरूरी ऐ। 11 अहां सुणदे हन कि कुच्छ लोक तुहां बिच्च आलसी हन, कने कुच्छ कम्म नीं करदे अपर दूयेयां दे कम्मां च दखल अंदाजी करदे हन कने तिन्हां जो कम्म करणे ते रोकदे हन। 12 ऐदेयां जो अहां प्रभु यीशु मसीह दे नांऐ ते हुक्म दिंदे कने समझांदे हन कि सांतिया नैं अपणिया मेहनता दी रोटी खा करन। 13 हे मेरे प्यारे साथी बसुआसियो, तुहां जो कदी भी भलाई करणे च हिम्मत नीं छड्डणी चाइदी। 14 जे कोई अहां दिया इसा चिठ्ठिया दिया सिक्षा जो नीं मन्नैं तां तिस पर नजर रखा, कने तिसदी संगति मत करा, जिसते सैह़ सर्मिंदगी मसूस होयैं। 15 तमी तिसियो अपणा बैरी मत समझा अपर बसुआसी भाऊ समझी नैं चतौणी देआ। आखरी नमस्कार 16 मैं प्रार्थना करदा ऐ, कि प्रभु जेह्ड़ा सांति दा सोता ऐ, कने हर तरीके नैं तुहां जो लगातार सांति दिंदा रैंह्, कने तुहां सबना सौगी रैंह्। 17 मैं पौलुस, अपणे हत्थे नैं इसा चिठ्ठिया च तुहां जो नमस्कार लिखदा ऐ। मेरियां सारियां चिठ्ठियां आखरी च मेरा लिखणे दा ऐई तरीका ऐ। तांजे हर कोई एह़ जाणी लैं कि एह़ चिठ्ठी मेरिया तरफा ते ऐ। 18 मैं प्रार्थना करदा ऐ, कि अहां दे प्रभु यीशु मसीह दा अनुग्रह तुहां सबना पर हुंदा रैंह्। |
This work is licensed under Creative Commons Attribution-ShareAlike 4.0 License.