2 थिस्सलुनीकियों 2 - काँगड़ी

पाप दा मरद मतलब विनाश दा पुत्तर

¹ हे प्यारे साथी बसुआसियो, अहां प्रभु यीशु मसीह दे बापस ओणे, कने तिस बग्ते दे बारे च जाह़लू अहां तिस सौगी किठ्ठे मिलगे, तुहां नैं ग्लांदे हन।

² तुहां चाणचक अपणिया होसा जो कुसी भी आत्मा, वचन, चिठ्ठी दिया बज़ाह ते मत गुआंदे, जेह्ड़ी लगदी ऐ कि अहां लिखियो ऐ। कने जिसा च एह़ लिख्या होयैं कि प्रभु दा दिन आई पुज्जया ऐ; तां तुहां दा मन चाणचक घबराई नीं जां।

³ कुसी भी तरीके नैं कुसी दे धोखे च नीं औणां, क्जोकि सैह़ दिन ताह़लू तिकर नीं ओंगा, जाह़लू तिकर लोक परमात्मे दे खलाफ बगाबत नीं करगे, कने ताह़लू दुष्ट माणु सामणै ओंगा, कने परमात्मा जरूर तिसियो नरके दिया अग्गी च नास करगा।

⁴ सैह़ परमात्मे दा कने तिन्हां सारियां चीज्जां दा बरोध करगा जिन्हां दी लोक अराधना करदे हन, कने सैह़ एह़ दावा करदा ऐ कि सैह़ तिन्हां सारेयां ते खास ऐ। ऐत्थु तिकर कि सैह़ दुष्ट माणु परमात्मे दे मंदरे च बेई नैं अपणे आप्पे जो परमात्मा दस्सदा ऐ।

⁵ क्या तुहां जो याद नीं कि जाह़लू मैं तुहां सौगी था, तां तुहां जो इन्हां गल्लां दे बारे च दस्सदा था?

⁶ तुहां जाणदे हन, कि सैह़ कुण चीज्ज ऐ जेह्ड़ी इस दुष्ट माणुये जो रोका दी ऐ। क्जोकि तिन्हीं सिर्फ ताह़लू ई सामणै औणां जाह़लू परमात्मे दा ठीक बग्त ओंगा।

⁷ क्जोकि तिस दुष्ट माणुये दी ताकत पैहल्ले ते ई इस संसारे च चुपचाप कम्म करा दी ऐ, अपर कोई इक्क ऐ जेह्ड़ा तिसदिया ताकता जो रोका दा ऐ, कने सैह़ लगातार तिसियो ताह़लू तिकर रोकदा रैंह्गा, जाह़लू तिकर सैह़ दूर नीं होई जां।

⁸ ताह़लू सैह़ दुष्ट माणुये सामणै ओंगा, जिसियो प्रभु यीशु अपणे इक्की हुक्मे नैं मारी दिंगा, कने अपणे ओणे दे तेजे नैं भस्म करगा।

⁹ सैह़ दुष्ट माणु सैताने दिया ताकता सौगी ओंगा, कने सैह़ हर किस्मां दे झूठे चमत्कार कने अनोखे कम्म करगा, जिसते माणु सोचगे कि ऐई परमात्मा ऐ,

¹⁰ कने सैह़ हर किस्मां दे बुरे कम्म करगा, कने तिन्हां जो धोखा दिंगा, जेह्ड़े परमात्मे दे जरिये नास कित्ते जांगे। क्जोकि तिन्हां सच्चाईया जो ग्रहण कने प्यार नीं कित्ता, जिसते तिन्हां दा उद्धार हुंदा ऐ।

¹¹ कने इसा बज़ाह ते परमात्मा तिन्हां जो सच्चाईया ते भटकाणे आल़ी ताकता जो घल्लगा, तांजे सैह़ तिस झूठ पर बसुआस करन, जेह्ड़ा सैह़ दुष्ट माणु तिन्हां जो ग्लांगा।

¹² कने इसदा नतीजा एह़ होणा ऐ, कि जितणे लोक सच्चाईया दा बसुआस नीं करदे, अपर बुरे कम्मां नैं खुस हुंदे हन, परमात्मा तिन्हां सारेयां जो सज़ा दिंगा।

मजबूत बणी रेह्आ

¹³ हे प्यारे साथी बसुआसियो, अहां जो हमेसा परमात्मे दा धन्यावाद करणा चाइदा, क्जोकि प्रभु तुहां नैं प्यार करदा ऐ। तुहां जो परमात्मैं सुरू ते ई चुणी लेआ कि आत्मा दे जरिये पवित्र बणी करी, कने सच्चाईया दा बसुआस करी नैं उद्धार पा।

¹⁴ जिस तांई तिन्हीं तुहां जो अहां दे सुसमाचारे दे जरिये सद्देया, कि तुहां अहां दे प्रभु यीशु मसीह दी महिमा जो हासल करी लैन।

¹⁵ इसतांई हे प्यारे साथी बसुआसियो, मजबूत रेह्आ। कने जेह्ड़ी सिक्षा तुहां अहां दे वचने कने चिठ्ठिया जरिये हासल कित्ती ऐ, तिसा च लगातार बणी रेह्आ।

¹⁶ अहां अपणे प्रभु यीशु मसीह नैं कने पिता परमात्मे नैं जिन्हीं अहां नैं प्यार कित्ता विणती करदे हन, जिन्हीं अहां जो अपणे अनुग्रह दे जरिये सदा तांई हौंसला कने पक्की आसा दित्ती ऐ।

¹⁷ मैं प्रार्थना करदा ऐ, कि परमात्मा तुहां दे मनां जो हौंसले नैं भरैं, कने हमेसा तुहां जो खरा ग्लाणे च कने खरे कम्मां च मजबूत करैं।