2 कुरिन्थियों 9 - काँगड़ी

साथी - मसीह लोकां तांई मदत

¹ हुण यरूशलेमे दिया कलीसिया जो दान दैणे दी सेवा दे बारे च जेह्ड़ी परमात्मे दे लोकां तांई कित्ती जांदी ऐ, मिन्जो तुहां जो लिखणा जरूरी नीं ऐ।

² क्जोकि मैं तुहां दे मने दी त्यारियां जो जाणदा ऐ, जिसदिया बज़ाह ते मैं तुहां दे बारे च मकिदुनिया प्रदेसे दे बसुआसियां दे सामणै घमंड दस्सदा ऐ, कि तुहां कुरिन्थी लोक अखाया प्रदेसे च इक्की साल्ले ते त्यार होएयो हन, कने तुहां दे हौंसले होर भी मतेआं जो उकसाया ऐ।

³ अपर मैं तिन्हां त्रै बसुआसी भाऊआं जो इसतांई घल्लेया ऐ कि अहां जेह्ड़ा घमंड तुहां दे बारे च दस्सेया, सैह़ इसा गल्ला च बेकार नीं होएया। अपर जिंआं मैं ग्लाया तिंआं ई तुहां यरूशलेमे दे बसुआसियां जो दान घल्लणे तांई त्यार रेह्आ,

⁴ इआं नीं होणा चाइदा कि जे कोई मिन्जो सौगी मकिदुनिया प्रदेसे ते कुच्छ बसुआसी आये, कने तुहां जो दाने सौगी त्यार नीं दिक्खन, तां होई सकदा ऐ, कि इस भरोसे दिया बज़ाह ते अहां दी बेइज्जती होयैं, अपर तुहां दी इसते भी जादा बेइज्जती हुंगी।

⁵ इसतांई मैं बसुआसी भाऊआं नैं एह़ विणती करणा जरूरी समझेया कि सैह़ पैहल्ले ते तुहां अल्ल जान, कने तुहां दिया दिलेरिया दा फल़ जिसदे बारे च पैहल्ले ते वचन दित्या था, त्यार करी नैं रखन, कि एह़ दबाबे नैं नीं पर दिलेरिया दे फल़े साइआं त्यार होन।

दान किंआं दैणा चाइदा

⁶ अपर गल्ल एह़ ऐ, जेह्ड़ा थोड़ा बांदा ऐ, सैह़ थोड़ा बड्डगा भी; जेह्ड़ा मता बांदा ऐ, सैह़ मता बड्डगा।

⁷ हर इक्क माणु जिंआं मने च ठाणी लैं तिंआं ई दान करैं; ना कुढ़-कुढ़ करी नैं कने ना जबरदस्तिया नैं, क्जोकि परमात्मा खुसिया नैं दैणे आल़े नैं प्यार रखदा ऐ।

⁸ परमात्मा तुहां जो हर किस्मां दा अनुग्रह मता सारा दिंदा ऐ। जिसते हर गल्ला च कने हर बग्त च, सब कुच्छ, जेह्ड़ा तुहां जो जरूरी ऐ, तुहां अल्ल रैंह्, कने हर इक्क खरे कम्मे तांई तुहां अल्ल बड़ा कुच्छ होणा चाइदा।

⁹ जिंआं पवित्रशास्त्रे च लिख्या ऐ, “परमात्मा जरूरतमंद लोकां जो खुले दिले नैं दिंदा ऐ, तिन्हीं गरीबां जो दान दित्ता, तिसदी धार्मिकता सदा बणी रैंह्गी।”

¹⁰ एह़ परमात्मा ई ऐ, जेह्ड़ा बाणे आल़े जो बीई कने खाणे तांई रोटी दिंदा ऐ, सैह़ तुहां जो बीई दिंगा, कने तिसियो फल़वन्त करगा, कने तुहां दे धार्मिकता दे फल़ां जो बधांगा।

¹¹ तुहां जो हर किस्मां दी आसीष मिलगी, तांजे तुहां हमेसा दिलेरिया नैं दान देई सकन। जाह़लू अहां तुहां दे दाने जो गरीब लोकां अल्ल लेई नैं जांगे, तां सैह़ लोक परमात्मे दा धन्यावाद करगे।

¹² क्जोकि इसा सेवा दे पूरा करणे ते ना सिर्फ परमात्मे दे लोकां दी जरूरतां पूरियां हुंदियां हन, अपर लोकां दिया तरफा ते परमात्मे दा भी बड़ा धन्यावाद हुंदा ऐ।

¹³ क्जोकि इसा सेवा दा सबूत मन्नी करी सैह़ परमात्मे दी महिमा जो प्रगट करदे हन, कि तुहां यीशु मसीह दे सुसमाचारे जो मन्नी नैं तिसदे अधीन रैंह्दे हन, कने जरूरतमंद बसुआसियां दी मदत करणे च दिलेरी दस्सदे रैंह्दे हन।

¹⁴ कने सैह़ तुहां तांई प्रार्थना करदे हन। इसतांई कि तुहां पर परमात्मे दा बड़ा ई अनुग्रह ऐ, कने तुहां नैं मिलणे दी आसा करदे रैंह्दे हन।

¹⁵ परमात्मे दा, तिसदे दान तांई जेह्ड़ा बखान करणे ते बाहर ऐ, तिसदा धन्यावाद होयैं।