2 कुरिन्थियों 3 - काँगड़ी

नौये वादे दे सेवक

¹ क्या अहां दुवारी अपणी बड़ेयाई करणी सुरू करी दित्ती? या कुच्छ होरनी लोकां साइआं अहां जो भी तुहां ते या तुहां तांई सपारसां दियां चिठ्ठियां दी जरूरत ऐ?

² तुहां अप्पु ई चिठ्ठिया साइआं हन, जेह्ड़ी अहां तांई सपारस करदी ऐ, जेह्ड़ी अहां दे मनां पर लिखियो ऐ। अहां दे कम्म जेह्ड़े तुहां बिच्च कित्ते, तिन्हां दे जरिये तुहां दी बदलियो ज़िन्दगिया जो जेह्ड़ी चिठ्ठिया साइआं ऐ हर इक्क माणु पढ़ी कने जाणी सकदा ऐ।

³ एह़ प्रगट ऐ, कि तुहां मसीह दे पास्से ते इक्क चिठ्ठिया साइआं हन, एह़ चिठ्ठी अहां दी सेवकाईया दा नतीजा था। कने स्याईया नैं पत्थरे दी स्लेटा पर नीं, अपर जिन्दे परमात्मे दी पवित्र आत्मा नैं मने दी मांस रूपी पटियां पर लिखियो ऐ।

⁴ अहां मसीह दे जरिये परमात्मे पर ऐदेया ई भरोसा रखदे हन।

⁵ अहां एह़ नीं ग्लांदे कि अहां अल्ल अपणे आप्पे च कुच्छ करणे दा हुनर ऐ, अपर अहां दा हुनर तां परमात्मे दिया तरफा ते ऐ।

⁶ तिन्हीं अहां जो नौये वादे दे सेवक होणे दा हुनर दित्ता। मूसा दिया व्यबस्था दे सेवक नीं अपर पवित्र आत्मा दे हन। क्जोकि मूसा दिया व्यबस्था जो नीं मन्नणे दा नतीजा मौत्त ऐ, अपर पवित्र आत्मा सदा दी ज़िन्दगी दिंदा ऐ।

^7-8 जाह़लू मूसा दी व्यबस्था पत्थरां दियां स्लेटां पर लिखी गेई, तिस बग्त परमात्मे दी महिमा प्रगट होई। इस्राएले दे लोक मूसा दे मुँऐ जो बड़ी देर तिकर नीं दिक्खी सके, क्जोकि तिसदा मुँ बड़ा भरी चमका दा था, हलांकि सैह़ चमक जादा बग्ते तिकर नीं रेई। इसतांई जे सैह़ सेवा जेह्ड़ी मूसा दिया व्यबस्था मताबक ऐ मौत्ती दे पास्से लेई जांदी ऐ, जिस च सैह़ देहई महिमा थी। तां नौये वादे दे मताबक सैह़ सेवा जिसादी पवित्र आत्मा अगुआई करदा ऐ, तिसते भी जादा चमकदार हुंगी।

⁹ कने भिरी जाह़लू दोसी ठैहराणे आल़ी सेवा च इतणी चमक ऐ, तां तिसा सेवा च कितणी जादा चमक हुंगी, जेह्ड़ी धर्मी ठैहराणे आल़ी सेवा ऐ।

¹⁰ कने जेह्ड़ी चमक मूसा दिया व्यबस्था ते आईयो थी, सैह़ हुण बगैर चमका ते प्रगट हुंदी ऐ, क्जोकि सैह़ नौये वादे दे मकाबले जादा चमकीली नीं ऐ।

¹¹ क्जोकि जे मूसा दिया व्यबस्था च चमक थी जेह्ड़ी बिलकुल थोड़े बग्ते तांई रेई। तां नौये वादे च कितणी जादा चमक हुंगी, जेह्ड़ी हमेसा तांई बणी रैंह्दी ऐ।

¹² इसी आसा दिया बज़ाह ते अहां हिम्मता नैं ग्लांदे हन।

¹³ अहां मूसे साइआं नीं, जिन्हीं अपणे मुँऐ पर पड़दा लगाया था तांजे इस्राएली लोक तिसा घटणे आल़ी चमका जो नीं दिक्खन।

¹⁴ सच्ची च इस्राएली लोकां दे मन कठोर होईये हन, क्जोकि अज्ज तिकर पराणा नियम पढ़दे बग्त तिन्हां दे मनां पर सैई पड़दा पेआ रैंह्दा ऐ। अपर सैह़ पड़दा मसीह च बसुआस करणे दे जरिये हटाया जांदा ऐ।

¹⁵ अज्जे तिकर जाह़लू कदी मूसा दी कताब पढ़ी जांदी ऐ, तां तिन्हां दे मनां च पड़दा पेआ रैंह्दा ऐ। इसतांई सैह़ इसायो पूरे तरीके नैं नीं समझदे हन।

¹⁶ एह़ पड़दा तिस बग्त हटदा ऐ, जाह़लू कोई माणु प्रभु यीशु पर बसुआस करदा ऐ।

¹⁷ प्रभु कने पवित्र आत्मा इक्को ई हन, कने जित्थु कुत्थी प्रभु दा आत्मा ऐ तित्थु अजादी ऐ।

¹⁸ कने अहां, जेह्ड़े खुले चेहरे नैं प्रभु दी महिमा जो दिक्खदे हन, तिन्हां साइआं आस्ते-आस्ते बधदी होई महिमा सौगी बदलदे जा दे हन। एह़ महिमा प्रभु ते ऐ, कने तिसदी आत्मा अहां च कम्म करदी ऐ।