2 कुरिन्थियों 2 - काँगड़ी

¹ मैं अपणे मने च ऐई ठाणी लेआ था कि भिरी तुहां अल्ल आई नैं तुहां जो दुख ना दैं।

² क्जोकि जे मैं तुहां जो दुखी करैं, तां मिन्जो खुसी दैणे आल़ा कुण हुंगा, सिर्फ सैई जिन्हां जो मैं दुखी कित्या?

³ मैं तुहां जो इसी मकसद नैं चिठ्ठी लिखा दा था कि जाह़लू मैं तित्थु औयें तां सैई लोक मेरे दुखे दी बज़ाह ना होई जान। जिन्हां ते मिन्जो खुसी मिलदी ऐ, कने मिन्जो भरोसा ऐ कि मेरी खुसी तुहां सबना दी खुसी ऐ।

⁴ मने दे दुख कने मुसीबता दिया बज़ाह ते रोई-रोई करी मैं तुहां जो सैह़ चिठ्ठी लिखियो थी, इसतांई नीं कि तुहां जो दुखी करैं, अपर इसतांई कि तुहां तिस बड़े प्यारे जो जाणी लेआ, जेह्ड़ा मिन्जो तुहां नैं ऐ।

पापियां जो माफी

⁵ कने जे कुणी मिन्जो दुखी कित्या ऐ, तां तिन्हीं मिन्जो ई नीं, अपर कुसी नीं कुसी तरीके नैं तुहां सबना जो दुखी कित्या ऐ, मैं इसदे बारे च इसते जादा होर कुच्छ नीं ग्लाणा चांह़दा।

⁶ तुहां च मतेआं बसुआसियां जेह्ड़ी सज़ा तिसियो दित्तियो ऐ, सैह़ काफी ऐ।

⁷ इसतांई इसते खरा एह़ ऐ कि तिसदा अपराध माफ करा, कने हौंसला देआ, इआं ना होयैं कि सैह़ माणु बड़ा दुखी होई जां।

⁸ इसा बज़ाह ते मैं तुहां नैं विणती करदा ऐ, कि तिसियो अपणे प्यारे दा सबूत देआ।

⁹ क्जोकि मैं सैह़ चिठ्ठी इसतांई लिखियो थी, कि तुहां जो परखी लैं कि तुहां मेरियां सारियां गल्लां मन्नणे तांई त्यार हन कि नीं।

¹⁰ जिसियो तुहां कुसी गल्ला च माफ करदे हन, तिसियो मैं भी माफ करदा ऐ। जिसा गल्ला च मैं माफ कित्या ऐ, जे सैह़ सच्ची च माफ करणे जोग्गा था। तिसियो मैं मसीह जो सामणै जाणी करी तुहां तांई माफ कित्ता ऐ,

¹¹ तांजे सैतान अहां दा कुसी भी गल्ला च फायदा ना लेई सकैं। क्जोकि अहां तिसदियां योजनां जो जाणदे हन।

त्रोआस सैहरे च पौलुसे दी फिकर

¹² जाह़लू मैं मसीह दा सुसमाचार सणाणे जो त्रोआस सैहरे च आया, तां तित्थु प्रभुयैं मिन्जो सुसमाचार सणाणे दा मौका दित्ता।

¹³ मैं अपणे बसुआसी भाऊ तीतुसे जो तित्थु नीं दिख्या तां मेरे मने जो चैन नीं मिल्ला। इसतांई मैं त्रोआस सैहरे दे बसुआसियां ते विदा होई नैं मकिदुनिया प्रदेसे जो बापस आई गेआ।

मसीह च जीत्ता दा त्योहार

¹⁴ अपर परमात्मे दा धन्यावाद होयैं, क्जोकि मसीह च अहां दी एकता दिया बज़ाह ते सैह़ अहां जो हमेसा अप्पु सौगी चलांदा ऐ, कने अहां जो जीत्त दिंदा ऐ। कने परमात्मा मसीह दे ज्ञाने जो इक्क मिठ्ठी खुसबुया साइआं अहां दे जरिये हर जगाह फैलांदा ऐ।

¹⁵ अहां ई परमात्मे तांई मसीह दी मिठ्ठी खुसबु हन, तिन्हां सबना च जेह्ड़े उद्धार पांदे जा दे हन, कने तिन्हां सबना च भी जेह्ड़े नास हुंदे जा दे हन।

¹⁶ जेह्ड़े नास होआ दे हन, तिन्हां च अहां मौत्ती दी गंदी मुस्क, कने उद्धार पाणे आल़े माणुआं च ज़िन्दगी दैणे आल़ी खुसबु हन। सच्ची च, कोई भी अपणे आप्पे च इस जोग्गा नीं ऐ जेह्ड़ा मसीह दे ज्ञाने दी मिठ्ठी खुसबुया जो फैलाई सकैं।

¹⁷ क्जोकि अहां तिन्हां मतेआं साइआं नीं हन, जेह्ड़े परमात्मे दे वचने जो अपणे फायदे तांई प्रचार करदे हन। अपर अहां परमात्मे दे वचने जो सच्चाईया नैं कने मसीह दे हक्के नैं प्रचार करदे हन, एह़ जाणदे होये कि परमात्मा अहां जो दिक्खा दा ऐ।