2 कुरिन्थियों 10 - काँगड़ी

पौलुसे दा हक्क

¹ मैं सैई पौलुस जेह्ड़ा तुहां सामणै दीन ऐ, अपर पिठ्ठी पचांह़ तुहां दे पास्से हिम्मत करदा ऐ। तुहां जो मसीह दी नम्रता कने कोमलता दिया बज़ाह ते मेरियां गल्लां सुणने तांई विणती करदा ऐ।

² मैं एह़ विणती करदा ऐ, जाह़लू मैं तित्थु औयें तां मिन्जो तिन्हां तांई जेह्ड़े एह़ सोचदे हन, कि जीणे दा ढंग संसारे दे लोकां साइआं ऐ, सैह़ सकत्याई दस्सणा नीं पोयैं जिसदी मिन्जो ते आस कित्ती जांदी ऐ।

³ हलांकि अहां संसारे च रैंह्दे हन, अपर अहां अपणे दुश्मणा सौगी नीं लड़दे, जिंआं इस संसारे दे लोक लड़दे हन।

⁴ क्जोकि अहां दे हत्थयार जिन्हां नैं अहां लड़दे हन, सैह़ संसारिक नीं हन, अपर दुश्मणा दे गढ़ां जो ढाई दैणे तांई परमात्मे दे ताकतवर हत्थयार हन।

⁵ इसदे जरिये अहां तिस हर इक्क बरोधे जो कने तिस हर इक्क घमंड करणे आल़े जो, जेह्ड़ा परमात्मे दे ज्ञाने दे खलाफ सिरे चुकदा ऐ, निठ्ठा करी दिंदे हन, कने हर इक्क इच्छा जो काबू करी नैं मसीह दा आज्ञाकारी बणाई दिंदे हन,

⁶ तुहां दा हुक्म मन्नणे कने सच्चाई साबित होई जाणे पर अहां सारे जेह्ड़े हुक्म नीं मनदे तिन्हां जो सज़ा दैणे तांई त्यार हन।

⁷ तुहां तिन्हां दियां गल्लां जो दिक्खा, जेह्ड़ियां अखीं सामणै हन। जे कुसी जो अपणे ऊपर एह़ भरोसा ऐ, कि मैं मसीह दा ऐ, तां सैह़ एह़ भी जाणी लैं कि जिंआं सैह़ मसीह दा ऐ तिंआं ई अहां भी मसीह दे हन।

⁸ क्जोकि जे मैं तिस हक्के दे बारे च होर भी घमंड दस्सें, जेह्ड़ा प्रभुयैं तुहां दे बसुआसे जो नास करणे तांई नीं अपर बधणे तांई अहां जो दित्या ऐ, तां सर्मिंदा नीं हुंगा।

⁹ मैं नीं चांह़दा ऐ, कि तुहां जो एह़ मसूस होयैं कि मैं तुहां जो डराणे दे मकसदे ते एह़ चिठ्ठी लिखा दा ऐ।

¹⁰ क्जोकि कुच्छ लोक ग्लांदे हन, “तिसदी चिठ्ठियां तां दमदार कने असरदार हन। अपर जाह़लू सैह़ सामणै हुंदा ऐ, तां ग्लांदे हन, सैह़ तां कमजोर माणु ऐ, कने तिसदियां गल्लां-बातां च दम नीं ऐ।”

¹¹ जेह्ड़े लोक इआं ग्लांदे हन, सैह़ एह़ समझी लैन कि जिंआं पिठ्ठी पचांह़ चिठ्ठियां च अहां दे वचन हन, तिंआं ई तुहां दे सामणै अहां दे कम्म भी हुंगे।

¹² क्जोकि अहां जो एह़ हिम्मत नीं कि अहां अप्पु जो तिन्हां सौगी गिणन, या तिन्हां नैं अप्पु जो मिल्लान, जेह्ड़े अपणी बड़ेयाई करदे हन, कने अपणे आप्पे जो अप्पु च नाप तौल करी नैं इक्की दूये सौगी बराबरी करी नैं मूर्ख बणदे हन।

¹³ अहां तां परमात्मे दे कम्म जेह्ड़े तिन्हीं अहां दित्यो हन तिन्हां ते बाहर अहां घमंड कदी नीं करगे, अपर तिसा हदी तिकर जेह्ड़े परमात्मैं अहां तांई ठैहरायो हन, कने तिस च तुहां भी आईयो हन, कने तिसदे मताबक घमंड भी करगे।

¹⁴ अहां अपणी हद पार नीं करा दे मन्ना अहां तित्थु तिकर पुज्जे ई नीं, जित्थु इस बग्त तुहां हन, क्जोकि अहां ई सबते पैहल्ले तुहां बिच्च मसीह दा सुसमाचार प्रचार कित्ता।

¹⁵ कने अहां अपणिया हदी ते बाहर दूयेयां दी मेहनता पर घमंड नीं करदे; अपर अहां जो उम्मीद ऐ, कि जिंआं-जिंआं तुहां दा बसुआस बधदा जांगा, तिंआं-तिंआं अहां अपणिया हदा मताबक तुहां दिया बज़ाह ते होर भी बधदे जांगे,

¹⁶ तांजे अहां तुहां दिया हदी ते बाहर दूर-दूर लाक्केयां च भी सुसमाचार सणान। क्जोकि एह़ नीं कि अहां दूयेयां दे लाक्केयां च बणे-बणायो कम्मां पर घमंड करन।

¹⁷ अपर जिंआं पवित्रशास्त्रे च लिख्या ऐ, “जेह्ड़े घमंड करन, सैह़ प्रभु पर घमंड करन।”

¹⁸ क्जोकि जेह्ड़ा अपणी बड़ेयाई करदा ऐ, सैह़ नीं, अपर जिसदी बड़ेयाई प्रभु करदा ऐ, सैई ग्रहण कित्ता जांदा ऐ।