1 कुरिन्थियों 9 - काँगड़ी

प्रेरितां दे हक्क कने कम्म

¹ जेह्ड़ा कुच्छ मैं चुणदा ऐ, क्या मैं तिसियो खाणे तांई अजाद नीं ऐ? क्या मैं प्रेरित नीं ऐ? क्या मैं यीशुये जो जेह्ड़ा अहां दा प्रभु ऐ, नीं दिख्या ऐ? क्या तुहां प्रभु च मेरिया सेवा दा प्रतिफल़ नीं हन।

² जे दूये लोक मिन्जो प्रभु यीशु मसीह दा प्रेरित नीं समझन, अपर तुहां बसुआसी भाऊआं जो जरूर समझणा चाइदा, कि मैंई ऐ जिन्हीं तुहां जो यीशु मसीह दा सुसमाचार सणाया, क्जोकि प्रभु यीशु मसीह च तुहां दा बसुआस एह़ दस्सदा ऐ, कि मैं सच्ची च तिसदा प्रेरित ऐ।

³ एह़ मेरा तिन्हां लोकां तांई जवाब ऐ, जेह्ड़े मेरे इक्क प्रेरित होणे दे हक्के पर सवाल करदे हन।

⁴ क्या बरनबास कने मिन्जो प्रेरित होणे दे नाते एह़ हक्क नीं ऐ, कि अहां तुहां ते अपणे कम्मे तांई पैसेयां दी मदत लेई सकन?

⁵ क्या दूयेयां प्रेरितां, याकूब कने यहूदा कने पतरसे साइआं अहां जो भी अप्पु सौगी यात्रा च अपणिया बसुआसी लाड़िया जो लेई करी जाणे दा हक्क नीं ऐ।

⁶ मिन्जो कने बरनबासे जो भी अपणी ज़िन्दगी जीणे तांई तुहां लोकां ते पैसेयां दी मदत लैणे दा हक्क ऐ, जिंआं यीशु मसीह दे दूयेयां प्रेरितां मदत लेई ऐ, कने अप्पु तांई अहां जो कम्म करणे दी कोई जरूरत नीं ऐ।

⁷ कुण सपाई ऐदेया ऐ, जेह्ड़ा सेना च सेवा करी नैं अपणा खर्च अप्पु भुगतान करदा ऐ? कुण ऐ, जेह्ड़ा अंगूरा दे बागे जो लगांदा तां ऐ, अपर अप्पु तिसदा फल़ नीं खांदा? या कुण ऐदेया गुआल़ा ऐ, जेह्ड़ा भेड्डां दी रखवाल़ी करी नैं तिन्हां दा दुद नीं पींदा?

⁸ क्या मैं एह़ गल्लां लोकां दिया सलायीं पर ग्लांदा ऐ? मूसा दी व्यबस्था भी ऐई ग्लांदी ऐ।

⁹ क्जोकि मूसा दिया व्यबस्था च एह़ लिख्या ऐ, कि “गाणी गांदे बग्त दांदे दा मुँ नीं बन्नणा।” क्या तुहां एह़ समझदे हन कि परमात्मा सिर्फ दांदा दी ई फिकर करदा ऐ? नीं कदी भी नीं।

¹⁰ सैह़ खास करी नैं अहां दे बारे च ग्लादा था। हाँ, एह़ अहां तांई पवित्रशास्त्रे च लिख्या ऐ, कि “सारे जेह्ड़े हल़ चलांदे कने दाणेयां पींदे हन, सैह़ फसला ते ई अपणा हिस्सा पाणे दी आसा करगे।”

¹¹ जे अहां तुहां च आत्मिक बीई बाये, तां क्या एह़ कोई बड़ी बड्डी गल्ल ऐ कि अहां तुहां ते अपणियां जरूरतां दी फसल बड्डन।

¹² जे तुहां पर दूयेयां दा हक्क ऐ, तां क्या तुहां पर अहां दा हक्क तिन्हां ते जादा नीं ऐ? भिरी अहां इस हक्के दा इस्तेमाल नीं कित्ता; अपर अहां सबर रखी करी सब कुच्छ झेलदे रैह् कि अहां दे जरिये मसीह दे सुसमाचारे दे प्रचारे च कोई बाधा नीं औयें।

¹³ क्या तुहां नीं जाणदे कि मंदरे च सेवा करणे आल़ेआं दा गुजारा मंदरे ते ई हुंदा ऐ; कने जेह्ड़ी बल़ि वेदिया च चढ़ाई जांदी ऐ, सैह़ तिसा बल़िया ते अपणा हिस्सा पांदे हन।

¹⁴ इस तरीके नैं प्रभु दा एह़ हुक्म ऐ कि सैह़ जेह्ड़े सुसमाचार सणांदे हन, तिसदे जरिये सैह़ अपणी रोजी रोटी कम्मान।

¹⁵ अपर मैं इन्हां च कुसी भी हक्के दा इस्तेमाल नीं कित्ता, कने मैं एह़ गल्लां इसतांई नीं लिखा दा ऐ, कि मिन्जो तांई कुच्छ कित्ता जां। क्जोकि इसदे बजाये कि कोई मेरे इस घमंडे जो बेकार समझे, तां मेरा मरना ई खरा ऐ।

¹⁶ जे मैं सुसमाचार सणां, तां इस च मिन्जो तांई कोई घमंडे दी गल्ल नीं; क्जोकि एह़ तां मिन्जो तांई जरूरी ऐ। जे मैं सुसमाचार नीं सणां, तां मिन्जो तांई कितणा बुरा हुंगा।

¹⁷ क्जोकि जे मैं अपणिया इच्छा ते सुसमाचार प्रचार करदा ऐ, तां मिन्जो तिसदा प्रतिफल़ जरूर मिलदा ऐ, अपर जे मैं बगैर इच्छा ते प्रचार करदा ऐ, तां एह़ सिर्फ जिम्मेवारिया जो पूरा करणा ई होएया ऐ।

¹⁸ तां भिरी क्या ऐ मेरा प्रतिफल़? ऐई कि मैं यीशु मसीह दा सुसमाचारे दा प्रचार मुफ्ते च करदा रैंह्, कने इसते जुड़ेयां अपणे सारे हक्कां दा इस्तेमाल नीं करैं।

¹⁹ इसदा मतलब एह़ ऐ मैं कुसी दा भी गुलाम नीं ऐ, भिरी भी मैं अपणे आप्पे जो सारेयां दा गुलाम बणाई दित्या ऐ कि जादा ते जादा लोकां जो यीशु मसीह दे बसुआसे च लेई औयें।

²⁰ मैं यहूदी लोकां तांई यहूदी बणी गेआ, क्जोकि यहूदी लोकां जो यीशु मसीह दे बसुआसे च लेई औयें। व्यबस्था दे गुलाम लोकां तांई मैं व्यबस्था दा गुलाम नीं होणे पर भी व्यबस्था दा गुलाम बणी गेआ, क्जोकि तिन्हां लोकां जो जेह्ड़े व्यबस्था दे गुलाम हन यीशु मसीह दे बसुआसे च लेई औयें।

²¹ जेह्ड़े लोक व्यबस्था दे गुलाम नीं हन, मैं तिन्हां साइआं बणी गेआ, हलांकि मैं अप्पु परमात्मे दिया व्यबस्था ते अजाद नीं ऐ, मसीह दिया व्यबस्था दा गुलाम ऐ क्जोकि मैं तिन्हां लोकां जो जेह्ड़े व्यबस्था दे गुलाम नीं हन यीशु मसीह दे बसुआसे च लेई औयें।

²² मैं कमजोर लोकां तांई कमजोर बणी गेआ कि मैं कमजोर लोकां जो यीशु मसीह दे बसुआसे च लेई औयें। मैं हर इक्क माणुये तांई तिन्हां साइआं बणी गेआ, कि मैं कुसी नैं कुसी तरीके नैं कुच्छ लोकां दा उद्धार कराई सकैं।

²³ मैं एह़ सब कुच्छ यीशु मसीह दे सुसमाचारे तांई करदा ऐ, तांजे तिन्हां आसीषां दा हिस्सा मिन्जो भी मिल्ली जां, जिसदा वादा सुसमाचारे च कित्या ऐ।

मसीही दौड़

²⁴ क्या तुहां नीं जाणदे कि दौड़ा च सारे हिस्सा लैंदे हन, अपर इनाम इक्क ई जीत्ती करी लेई जांदा ऐ, तुहां तिंआं ई दौड़ा कि जीत्ती सकन।

²⁵ हर इक्क पैहलवाण जेह्ड़ा कुश्तिया च हिस्सा लैंदा ऐ; सैह़ सबर रखदा ऐ। सैह़ तां नास होणे आल़े मुकटे जो हासल करणे तांई एह़ सब कुच्छ करदा ऐ, अपर अहां तां तिस मुकटे जो हासल करणे तांई करदे हन जेह्ड़ा नास नीं हुंदा ऐ।

²⁶ जिंआं इक्क दौड़ा च दौड़णे आल़ा अपणिया दिसा च दौड़ा दा ऐ, तिंआं ई मैं भी अपणिया मसीह ज़िन्दगिया जो मसीह दी दिसा च जीआ दा ऐ। जिंआं इक्क पैहलवाण अपणे मुक्के पर काबू रखदा ऐ, तिंआं ई मैं भी अपणिया मसीह ज़िन्दगिया जो मसीह च काबू रखदा ऐ।

²⁷ मैं अपणे सरीरे पर काबू रखदा ऐ, तांजे मैं बुरिआं इच्छां पर नीं चल्लैं, इआं ना होयैं कि मैं दूयेयां लोकां जो सुसमाचारे दा प्रचार करी नैं अप्पु ई कुसी गल्ला च नकम्मा बणी जां।