1 कुरिन्थियों 1 - काँगड़ी

नमस्कार

¹ एह़ चिठ्ठी पौलुस कने अहां दे भाऊ सोस्थिनेसे दे पास्से ते ऐ। मैं पौलुस जेह्ड़ा परमात्मे दी इच्छा ते यीशु मसीह दा प्रेरित होणे तांई सद्देया ऐ।

² मैं एह़ चिठ्ठी परमात्मे दी तिसा कलीसिया दे नांऐ पर लिखा दा जेह्ड़े कुरिन्थुस सैहरे च रैंह्दे हन, मतलब तिन्हां दे नांऐ पर जेह्ड़े यीशु मसीह च पवित्र कित्ते गै, कने पवित्र होणे तांई सद्देयो हन; कने तिन्हां सारेयां दे नांऐ पर भी जेह्ड़े हर जगाह अहां दे कने अपणे प्रभु यीशु मसीह दे नांऐ नैं प्रार्थना करदे हन।

³ मैं प्रार्थना करदा ऐ, कि अहां दे पिता परमात्मा कने प्रभु यीशु मसीह दे पास्से ते तुहां जो अनुग्रह कने सांति मिलदी रैंह्।

मसीह च आसीषां

⁴ मैं तुहां दे बारे च अपणे परमात्मे दा धन्यावाद सदा करदा ऐ, क्जोकि यीशु मसीह दे जरिये परमात्मे दा एह़ अनुग्रह तुहां पर होएया ऐ।

⁵ तिसदे जरिये ई परमात्मे तुहां दिया कलीसिया जो हर गल्लां च अमीर बणाया ऐ, खास करी नैं तिन्हीं तुहां जो मते किस्मा दे आत्मिक वरदान दित्यो हन, तांजे तुहां दूयेयां लोकां जो परमात्मे दे वचन कने तिस ज्ञाने दे बारे च दस्सी सकन।

⁶ इसी तरीके नैं परमात्मा तुहां च इसा गल्ला जो साबित करदा ऐ, कि मसीह दा सुसमाचार सच्च ऐ।

⁷ ऐई बज़ाह ऐ कि जाह़लू तुहां अहां दे प्रभु यीशु मसीह दा बापस ओणे दा बेसबरिया नैं इन्तजार करा दे हन, तां हुण तुहां अल्ल सैह़ सारे आत्मिक वरदान हन, जिन्हां दी तुहां जो जरूरत ऐ।

⁸ परमात्मा तुहां जो आखरी तिकर बसुआसे च मजबूत भी करगा कि जाह़लू अहां दा प्रभु यीशु मसीह इस संसारे दुवारी बापस औयें तां तुहां बेकसूर पाये जान।

⁹ परमात्मा एह़ करगा, क्जोकि जेह्ड़ा सैह़ ग्लांदा ऐ, तिसियो करणे च ईमानदार ऐ, कने तिन्हीं तुहां जो अपणे पुत्तर अहां दे प्रभु यीशु मसीह दिया संगतिया च सद्देया ऐ।

¹⁰ हे प्यारे साथी बसुआसियो, मैं तुहां नैं अहां दे प्रभु यीशु मसीह दे नांऐ नैं विणती करदा ऐ कि तुहां सारे इक्की दूये नैं सेहमत होआ, तांजे तुहां च बैर नीं पोयैं, अपर अपणे मकसदां कने इरादेयां च इक्क मन होई नैं मिल्ली करी रेह्आ।

¹¹ क्जोकि हे मेरे साथी बसुआसियो, खलोये दे परवारे दे लोकां मिन्जो तुहां दे बारे च दस्सेया ऐ, कि तुहां च लड़ाई-झगड़े होआ दे हन।

¹² मेरे ग्लाणे दा मतलब एह़ ऐ कि तुहां च कोई तां अपणे आप्पे जो “पौलुसे दा,” कोई “अपुल्लोसे दा” कोई “कैफा दा” तां कोई “मसीह दा चेला” ग्लांदा ऐ।

¹³ इआं ग्लाणा खरा नीं ऐ, क्जोकि मसीह दूँ हिस्सेयां च नीं बंडूऐया, क्या पौलुस तुहां तांई सूल़िया पर टूंगेया, या तुहां जो पौलुसे दे नांऐ पर बपतिस्मा मिल्लेया?

¹⁴ मैं परमात्मे दा धन्यावाद करदा ऐ, कि क्रिस्पुस कने गयुसे भाऊआं जो छड्डी नैं मैं तुहां च कुसी जो भी बपतिस्मा नीं दित्ता।

¹⁵ कुत्थी इआं ना होयैं कि कोई ग्लां कि तुहां जो मेरे नांऐ पर बपतिस्मा मिल्लेया।

¹⁶ कने हाँ, हुण मिन्जो याद ओआ दी ऐ कि मैं स्तिफनास दे परवारे जो भी बपतिस्मा दित्ता; इन्हां जो छड्डी नैं मैं नीं जाणदा कि मैं होर कुसी जो बपतिस्मा दित्या।

¹⁷ क्जोकि मसीयैं मिन्जो बपतिस्मा दैणे जो नीं, अपर सुसमाचार सणाणे तांई घल्लेया ऐ, कने जाह़लू मैं सुसमाचार सणांदा, तां मैं अपणिया काबलियता दे मताबक नीं सणांदा, नीं तां लोक सिर्फ मेरी काबलियता पर ई बसुआस करदे, कने सैह़ यीशु मसीह दिया मौत्ती दिया सामर्थी जो नीं जाणदे, जेह्ड़ी सूल़िया पर होईयो थी।

मसीह परमात्मे दा ज्ञान कने सामर्थ ऐ

¹⁸ क्जोकि जेह्ड़े लोक परमात्मे दिया सज़ा तांई तिसते लग्ग कित्ते जांगे, तिन्हां तांई सूल़िया दा सुसमाचार कोई मायने नीं रखदा, अपर अहां उद्धार पाणे आल़ेआं तांई एह़ परमात्मे दी सामर्थ ऐ।

¹⁹ क्जोकि पवित्रशास्त्रे च परमात्मा एह़ ग्लांदा ऐ, “मैं तिन्हां सारेयां दियां अक्ला जो नास करगा, जेह्ड़े अक्लमंद होणे दा दावा करदे हन।”

²⁰ कतांह हन ज्ञानी? कतांह हन सास्त्री? कने कतांह हन बैंह्सबाजी करणे आल़े, क्जोकि परमात्मे सामणै इस संसारे दे ज्ञाने दी कोई कीमत नीं ऐ।

²¹ क्जोकि परमात्मे अपणे ज्ञाने मताबक एह़ दिख्या ऐ, कि एह़ संसार माणुये दे ज्ञाने दे जरिये तिसियो नीं जाणी सकदा, तिन्हीं अहां दे सुसमाचारे दे प्रचारे जो तिन्हां लोकां दे उद्धारे तांई इस्तेमाल कित्ता, जेह्ड़े बसुआस करदे हन, हलांकि कुच्छ इसियो मूर्खता दी गल्ल समझदे हन।

²² एह़ यहूदी लोकां जो मूर्खता दी गल्ल लगदी ऐ, क्जोकि सैह़ इसा सच्चाईया जो साबित करणे तांई सुअर्गे ते नसाण चांह़दे हन, कने होरनी जातिआं आल़े लोक भी जेह्ड़े माणुआं दे ज्ञाने दिया तोपा च हन,

²³ अपर अहां एह़ प्रचार करदे हन कि मसीह सूल़िया पर टूंगेया गेआ, कने मते यहूदी लोकां जो इसा गल्ला ते दिक्कत थी, कने होरनी जातिआं दे लोकां तांई एह़ मूर्खता दी गल्ल ऐ;

²⁴ अहां दा सुसमाचारे दा प्रचार तिन्हां यहूदी लोकां कने होरनी जातिआं दे लोकां तांई जेह्ड़े चुणेयो हन, मसीह कने परमात्मे दी सामर्थ कने ज्ञान ऐ।

²⁵ क्जोकि परमात्मे दी मूर्खता माणुआं दे ज्ञाने ते भी ज्ञानवान ऐ, कने परमात्मे दी कमजोरी माणुआं दिया ताकता ते बड़ी ताकतवर ऐ।

²⁶ हे प्यारे साथी बसुआसियो, जरा सोचा कि जाह़लू परमात्मे तुहां जो सद्देया, ताह़लू तुहां कदेय थे, तुहां माणुआं दिया नजरा च ना तां अक्लमंद, ना तां ताकतवर, कने ना तां समाजे च तुहां दा बड़ा रुतबा था।

²⁷ अपर परमात्मैं संसारे दे मूर्ख लोकां जो चुणी लेआ ऐ कि समझदार लोकां जो सर्मिंदा करन, कने परमात्मैं संसारे दे कमजोर लोकां जो चुणी लेआ ऐ कि ताकतवर लोकां जो सर्मिंदा करन।

²⁸ कने परमात्मैं संसारे दे नीच कने बेकार लोकां जो, अपर जेह्ड़े लोक गिणतियां च भी नीं हन, तिन्हां जो भी चुणी लेआ कि तिन्हां जो जेह्ड़े बड़े रुतबे आल़े हन, सर्मिंदा करी सकैं।

²⁹ परमात्मे एह़ तां कित्ता, कि कोई भी माणु तिसदे सामणै घमंड नीं करी सकैं।

³⁰ अपर परमात्मे दे पास्से ते तुहां यीशु मसीह च हन, जेह्ड़े परमात्मे दे पास्से ते अहां तांई ज्ञान, मतलब धार्मिकता, पवित्रता कने छुटकारा दैणे आल़ा बणेया;

³¹ तांजे जिंआं पवित्रशास्त्रे च लिख्या ऐ, तिंआं ई होयैं, “जेह्ड़ा घमंड करदा ऐ, सैह़ प्रभु च घमंड करैं।”