Zacarias 12 - Kalin Apo Dios

⁸ Kanan nan apo, “Isnan deey ay timpo et awnit salakniban nan apo nan mentetee id Jerusalem. Et olay nan kakapsotan ken daida et awnitda menbalin ay napigsa ay kaneg din si Ali David. Awnit ipangpangon nan ap-on din si David daida ay kaneg nan ikkan Apo Dios ya nan Anghelna.

⁹ Isnan deey ay timpo et awnitak dadaelen am-in ay kailiili ay mangpadas ay manggobat id Jerusalem.

¹⁰ Awnitak pabalinen nan ap-on din si David ya nan iJerusalem ay managseg-ang ya managlowalo. Dadat ilaen nan dinoy-okda dadat ilemet ay kaneg nan men-ilemetan di nateyan is bogbogtong ay anak. Pilmi nan ikkanda ay menbabawi ay kaneg nan ikkanda no matey nan damo ay anakda.”