Sofonias 1 - Kalin Apo Dios

1:1

¹ Naay nan ipabagan nan apo ay inpagtekna is ken Sofonias isdin si Josias ay anak Amon nan mentotolay id Juda. Si Sofonias et anak din si Cusi ya apon da Gedalias, Amarias ya din si Ali Hezakias.

Nan Agew Ay Menbanagan Nan apo 1:7 , 12-18

⁷ Nganngani et nan agew ay men-okoman nan apo isonga adiyo itoltoltoloy ay menlillili isnan kawad-ana. Mensagsagana nan apo ay mang-ipapatey isnan ipogawna isonga intolokna nan mang-aamis ken daida ay mangpatey ya mangdadael id Juda.

¹² Kanan nan apo en, “Isnan deey ay timpo et awnitak tanggewan id Jerusalem ta anapek nan mamapnek ya mangtaltalek et kedeng isnan aw-awakda ta dosaek daida. Daida ay mangmangwani en, ‘Maid polos ikkan nan Dios is ngawi wenno gawis.’

¹³ Awnit maakew nan kinabaknangda ya mabakas nan bab-aeyda. Awnitda adi polos makatee isnan bab-aeyda ay sapsapowenda ya adida makainom is basi ay magapo isnan molmolada.

¹⁴ Nganngani et nan napateg ay agew nan apo. Owen, nganngani et ay omdan. Aye, awnit kaeegyat nan deey ay agew et olay nan katoledan ay soldado et awnit men-adawag.

¹⁵ Isnan deey ay agew et pilmi nan ligat ya danag. Owen, agew di panagdadael ya kasasadot dapay menbolinget tay menngitit nan liboo.

¹⁶ Isnan agew ay deey et nan mamadnge et kedeng et nan ngalawngaw di tanggoyob di gobat ya nan bogaw di sosoldado ay manggobgobat isnan mamakneg ay il-ili ya ninkangangato ay baey di gowaldiya.”

¹⁷ Kanan nan apo en, “Awnitak omipaila is pilmi ay kaeegyat isnan kaipoipogaw enggana ay kanegda nakowap ay menkapkapokap. Gapo tay ninbasbasolda ken sak-en et awnit maipakbo ay kaneg danom nan basada dapay nan aw-awak di natey et adi maikaob isonga madondonot ya maiwakat isnan lota.”

¹⁸ Isnan agew ay mangipailaan nan apo isnan ligetna et awnit adi maisalakan nan pilak ya balitokda daida ay managbasol. Tay awnit madadael nan batawa isnan mensessese ay ligetna. Owen, awnit golpi nan mangkewasana isnan am-in ay mentetee isnan batawa.