Salmo 99 - Kalin Apo Dios

¹ Mentolay et nan apo, pomayegpeg koma nan kaipoipogaw. Tomokdo ay mentolay isnan ngangatowen di baan Apo Dios ay makwani en kerubim. Menyegyeg koma gedan nan batawa.

² Napateg nan apo id Sion. Siya nan mentolay isnan am-in ay ipogaw.

³ Sapay koma ta dayawenda sik-a ay napateg ya manakabalin. Nan apo et maid polos kangawina.

⁴ Manakabalinka ay Ali ay mangkaykayat isnan ostoosto ya maid paam-amdem. Sik-a nan nang-iyali isnan kinaosto ya kinalinteg isnan Israelita.

⁵ Ipangato tako nan apo ay Dios tako. Mendaydayaw tako isnan sagang nan apo ay maid polos kangawina.

⁶ Din da Moses ken Aaron nan dowa isnan papadina ya din si Samuel gedan nan nangdaydayaw ken siya. Nindawatda isnan apo et dinngena daida.

⁷ Isnan napoponok ay liboo nan ninkaliyana isnan ipogawna. Tinongpalda nan isolsolona ya tinongpalda nan linteg ay inidyana ken daida.

⁸ Sik-a apo ay Diosmi et dinngem nan ipogawmo. Inpailam ay Dioska ay managpakawan ngem dinosam nan nakabasol.

⁹ Ipangato tako nan apo ay Dios tako. Mendaydayaw tako isnan napateg ay biligna tay nan apo ay Dios tako et maid polos kangawina.