Salmo 97 - Kalin Apo Dios

¹ Mentolay et nan apo. Menlagsak koma nan batawa ya nan am-in ay mentetee. Owen, men-gasing am-in nan solsolin di batawa.

² Liliwesen pay di liboo et mabobolingetan siya. Kinalinteg ya kinaosto nan pegnad di mentolayana.

³ Omon-on-ona nan apoy ken siya ay mangpoo isnan mang-ap-apos ken siya.

⁴ Silawan nan kimatna nan batawa dat mawedwed et omegyat nan wada isnan batawa.

⁵ Malonag nan bilbilig ay kaneg kandila isnan sagang nan apo. Owen, isnan sagang nan apo di batawa.

⁶ Ipagtek nan daya nan kinalinteg nan apo et mailan nan am-in ay ipogaw nan dayawna.

⁷ Mabainan am-in ay mendaydayaw isnan tinagtago ay mangit-it-ek isnan maid silbina ay sinangdidios. Menpalintomeng am-in nan didios isnan sagang nan apo.

⁸ Dinngen nan iSion dana dadat men-gasgasing. Menlagsak gedan nan omili id Juda gapo isnan panagbanbanag Apo Dios.

⁹ Tay sik-a apo nan kangatowan isnan batawa et kapapatganka isnan am-in ay dios.

¹⁰ Laylayden nan apo nan mang-adi isnan ngawi. Bantayana nan adi mangdokdokog ken siya ya isalakana daida isnan kabaelan di makedse.

¹¹ Bindisyonana nan nalinteg et menlagsak nan gawis ay ipogaw.

¹² Dakayo ay nalinteg, men-gasing kayo isnan apo dakayot men-iyaman tay nan apo et maid polos kangawina.