Salmo 96 - Kalin Apo Dios

¹ Ikantaanyo nan apo is balo ay kanta. Ikantaanyo nan apo, dakayo am-in isnan batawa.

² Ikantaanyo nan apo ta maidayawana dayopay ipagtek ay inagew nan damag di nin-isalsalakanana.

³ Ipagtekyo nan dayawna isnan kailiili ya nan kaskasdaaw ay inik-ikkana isnan am-in ay ipogaw.

⁴ Tay napateg nan apo et lebbengna ay maidaydayaw. Wedweda siya is maiyegyat mo nan am-in ay didios.

⁵ Tay nan daydayawen di kailiili ay diosda et nan sinangdidios ngem nan apo et siya nan nangboliw isnan daya.

⁶ Wada nan kinangato ya kinapateg isnan kad-ana ya maila nan kabaelan ya begewna isnan Templona.

⁷ Dakayo am-in ay ipogaw, idayawyo nan apo ay nadayaw ya manakabalin.

⁸ Owen, idayawyo nan apo tay kalebbengana. Omikawit kayo is maigasing dakayot songgep isnan pantew di Templona.

⁹ Dayawenyo nan apo isnan mangipail-ana isnan kinadiosna. Pomayegpeg kayo isnan sagangna, dakayo am-in ay kaipoipogaw.

¹⁰ Ibagayo isnan kailiili en, “Mentolay et nan apo. Pinegnadana ay gawis nan batawa isonga adi polos mawedwed. Maid paam-amdena no banagena nan kaipoipogaw.”

¹¹ Men-gasing kayo, dakayo ay wada isnan daya ya nan batawa, nan baybay ya nan am-in ay wada isnan baybay.

¹² Menlagsak nan paypayew ya nan am-in ay wada ken daida. Nan kak-aiw pay isnan pagpag et kanegda menday-eng is gasingda

¹³ isnan apo tay omal-ali et ay mang-okom isnan batawa. Nalinteg ya maid paam-amdena isnan men-okomana isnan am-in ay ipogaw isnan batawa.