Salmo 95 - Kalin Apo Dios

¹ Menday-eng tako isnan apo. Ibiyad tako nan pangdayaw tako ken siya ay mangsalsalaknib ya mangisalsalakan ken datako.

² Omey tako isnan sagangna ay men-iyaman. Ibiyad tako nan kanta tako ay men-gasgasing isnan maidaydayaw ken siya.

³ Tay nan apo et manakabalin ay Dios. Kapapatgan ay Ali isnan am-in ay dios.

⁴ Mentolay isnan am-in ay batawa ay menlogi isnan kaadaeman ay liyang enggana isnan kangatowan ay bilig.

⁵ Kowana nan baybay tay sinapona ya nan lota gedan ay sinapona.

⁶ Am-in tako et menpalintomeng tako datakopay mendaydayaw ken siya. Menlokbob tako isnan apo ay nangboliw ken datako

⁷ tay siya nan Dios tako et datako nan ipogawna ay kanegna kalnilo ay kawkawanana. Idngeyo koma id wani nan ibagana.

⁸ “Adiyo ikekedse ay kaneg din kap-owanyo id Meriba isdin agew ay kawad-anda isnan pondag id Masa.

⁹ Pinadasda sak-en isdi olay no inilada nan inikkak pala ken daida.

¹⁰ Epatpoo ay tew-en ay maid lagsakko ken daida et kinwanik en, ‘Menkenteg nan toktok nan naayda ay ipogaw tay adida tongpalen nan bilinko.’

¹¹ Isonga gapo isnan ligetko et insapatak ay adida makaey isnan daga ay inkalik en idyak ken daida.”