Salmo 94 - Kalin Apo Dios

¹ Sik-a apo ay Dios ay mendosa et ipailam nan men-ibaesam.

² Ipagtekmo ay sik-a nan mang-okom isnan am-in ay ipogaw. Idyam nan maibagay ay dosan nan menlaslastog.

³ apo, kaatna pay nan kabayag nan menpapangatowan di makekedse? Kaat pay nan kabayagna?

⁴ ltoltoloyda ay menlaslastog dadapay it-it-ek nan ngawi ay ik-ikkanda.

⁵ Paligaligatenda nan ipogawmo apo dadapay iyaamis daida ay pinilim.

⁶ Pateyenda nan balo ay bababai ya nan ngoso ya olay nan sasangaili

⁷ dadapay kanan en, “Adi mailan nan apo dakami. Adi mailan nan Dios di Israel nan ik-ikkanmi.”

⁸ Aye pay nan kinatabbedyo ay ipogaw. Tongona pay di mennemnemanyo?

⁹ Ay adi makadnge nan nangsapo isnan inga? Ay adi gedan makaila nan nangsapo isnan mata?

¹⁰ Nan mangbagbaga isnan ipogaw, ay adina ngata dosaen daida? Nan mang-isolsolo isnan ipogaw

¹¹ et nan apo ay mangtek isnan nemnem di ipogaw. Getkena nan kaap-aptik di panagnemnemnemda.

¹² Nagasat nan ipogaw ay bagbagaan nan apo ya isolsolowana isnan lintegna.

¹³ Palamninena nan nemnem di madadanagan enggana ay makaoban nan adaadaem ay lengaw ay pala isnan makedse.

¹⁴ Adi polos baybay-an nan apo nan ipogawna ya adina taytaynan daida ay pinilina.

¹⁵ Tay maisagong kasin nan kinaosto et siya nan soloten nan am-in ay nalinteg.

¹⁶ Sino nan mangsalaknib ken sak-en isnan makedse? Sino nan mang-itakdeg ken sak-en isnan managbasol?

¹⁷ No egay nangbadang nan apo et waay adi mabayag et wadaak isnan kad-an di natey.

¹⁸ Kinwanik en, “Naay matokangak.” Ngem nan adi menbalbaliw ay layadmo Ago, nan nangtapaya ken sak-en.

¹⁹ Isnan madadanagak ya maliligatak et sik-a nan mangliwliwaliw ya mangpalagsak ken sak-en.

²⁰ Apo, ayke mabalin ay maitapi nan makedse ay makitolay ken sik-a dapay daida nan mangsapsapo is baken osto ay linteg?

²¹ Maaam-inda ay mang-am-amis isnan nalinteg ay ipogaw dadapay ipabanag ta matey nan maid basolna.

²² Ngem nan apo nan salaknibko. Owen, nan Diosko nan menkamangak.

²³ Maibagay nan pangdosana isnan basolda ya dadaelena daida gapo isnan kinangawida. Owen, nan apo ay Dios tako nan mangdadael ken daida.