Salmo 92 - Kalin Apo Dios

¹ Gawigawis ay men-iyaman isnan apo ya menday-eng is pangdaydayaw ken sik-a apo ay kangatowan.

² Maipagtek nan adi menbalbaliw ay layadmo isnan winakgat ya nan kinamatalekmo isnan linabi

³ isnan men-amay ay kanta ay makotengtengan ya maitapi nan tapin di kotengteng.

⁴ Tay pagasingem sak-en apo isnan kaskasdaaw ay ik-ikkam et men-gasingak ay menday-eng.

⁵ Kapatgan nan am-in ay inik-ikkam, apo. Naligat ay maawatan nan nemnemmo.

⁶ Adi getken di tabbed ya adi maawatan di solagang

⁷ ay olay no tomobtobo ay kaneg logam nan makedse ya somika nan mang-ik-ikkan is ngawi ngem awnitda madadael ay eng-enggana.

⁸ Ngem sik-a apo et sik-a kayet nan kangatowan ay eng-enggana.

⁹ Awnit madosa nan mang-ap-apos ken sik-a et maabakda am-in ay mang-ik-ikkan is ngawi.

¹⁰ Ngem pinapigsam sak-en ay kaneg nan kapigsan di nowang ya nangbinbindisyonka.

¹¹ Inilak nan naabakan nan mang-ap-apos ken sak-en et gintekko nan nadosaanda ay makedse.

¹² Awnit gomawis nan biyag di nalinteg ay kaneg nan kaiw ay lomangto ya komnegda ay kaneg nan kaiw id Libano.

¹³ Owen, gomawisda ay kaneg nan kaiw ay nais-ek isnan pantew di Templon Apo Dios.

¹⁴ Olay no naeteetengda et menbengada kayet ya adi kamkammid nan pigsada

¹⁵ et siya nan mang-ipaila ay nalinteg nan apo. Siya nan salaknibko ya nalinteg nan am-in ay ik-ikkana.