Salmo 91 - Kalin Apo Dios

¹ Nan mentee isnan kad-an nan kangatowan ay apo ya isnan salaknibna ay manakabalin

² et awnitna kanan ken siya en, “Sik-a nan menkamkamangak ya salaknibko. Sik-a nan Diosko ay mentaltalkak.”

³ Tay awnit ipaaddawin nan apo sik-a isnan adi kaila ay kaeegyat ya isnan makapatey ay sakit.

⁴ Salaknibana sik-a ay kaneg nan ikkan di manok ay mangsakoko isnan piyekna. Badbadangana danapay ay-ayowanan sik-a isnan kamatalekna.

⁵ Awnit maid iyegyatmo isnan maiyeegyat isnan labi ya olay nan kompolni ay ommat isnan kag-aw.

⁶ Adim iyegyat nan lemam ay domteng isnan menbolinget wenno nan ligat ay makapatey isnan kag-aw.

⁷ Maid om-ommat ken sik-a ay olay no sinlibo nan matey isnan sag-enmo ya simpooy libo isnan naliliwes.

⁸ Et awnitmo ilaen nan kadosaan nan mang-ik-ikkan is ngawi.

⁹ Tay nan menkamkamangam et nan apo ya nan salaknibmo et nan kangatowan ay apo

¹⁰ isonga maid et ngawi is om-ommat ken sik-a ya maid ligat is domatdateng isnan menteteam.

¹¹ Tay awnit ibaan nan Dios nan aanghelna ay mang-ayowan ken sik-a tapno kawanana sik-a isnan olay into ay omayam.

¹² Awnit tatapayaenda sik-a ta adi kasogat nan sikim isnan bato.

¹³ Awnitmo pay idaytak nan layon ya nan oweg. Owen, idaytakmo nan makedse ay layon ya nan menkedet ay oweg et maid ommat ken sik-a.

¹⁴ Kanan nan apo en, “Awnitko isalakan nan manglayad ken sak-en dakpay salakniban nan mangtek ken sak-en.

¹⁵ Nan mendawat ken sak-en et idngek. Wadaak ken siya isnan madadanagana dakpay isalakan ya patgen siya.

¹⁶ Paan-andowek nan biyagna engganay mapnek siya danat liknaen nan mang-isalakanak ken siya.”