Salmo 90 - Kalin Apo Dios

Maikap-at ay Liblo

¹ Sik-a apo nan ninkamkamanganmi isnan am-in ay tew-en.

² Esapay maboliw nan bilbilig wenno nan nangboliwam isnan batawa et nawawadaka et ay Dios ay maid logina ya maid kombosna.

³ Maisagongmo nan ipogaw isnan lota dakapay kanan en, “Somagong kayo isnan lota ay sigod ay nagapowanyo.”

⁴ Nan sinlibo ay tew-en ken sik-a et kaneg esa ay agew ay siasiawyan. Kanegna nan kaap-aptik di sinpangngapa.

⁵ Siawyan et kedeng nan biyag di ipogaw ay kaneg iitaw. Kanegna nan logam ay tomotobo isnan wakgat.

⁶ Masiken ya mataba isnan wakgat dat malaylay ya maango isnan labi.

⁷ Mangpos kami gapo isnan dadama ay ligetmo. Omegyat kami isnan mensesese ay songetmo.

⁸ Gegetkem nan kinakedsemi is ken sik-a. Mailam pay nan adi kaila ay basolmi.

⁹ Omap-aptik nan katatagowanmi gapo isnan ligetmo. Menpatengga et nan biyagmi ay kaneg agasaas.

¹⁰ Pitompoo ay tew-en et kedeng nan matatagowanmi wenno waompoo no napigsa kami. Ngem isnan deeyday tew-en et ligat ya seg-ang nan wada ken dakami dat menpatengga nan biyag et mamaid kami.

¹¹ Sinoy makagtek isnan kabaelan di ligetmo? Sinoy makalikna isnan egyat ay idyan nan ligetmo?

¹² Isonga ipanemnemmo ngalod ken dakami nan kaap-aptik di biyagmi tapno somilib kami.

¹³ Ay mabayag pay laeng apo nan mangliligtam ken dakami? Seg-angam koma nan babaam.

¹⁴ Sapay koma ta winakgat ay penekem dakami isnan adi menbalbaliw ay layadmo tapno men-gasing ya nalagsak kami isnan matatagowanmi.

¹⁵ Paadowem nan lagsakmi ay kaneg nan kaadon nan ligatmi isnan katew-etew-en ay ninligligatanmi.

¹⁶ Ipailam isnan babaam nan kaskasdaaw ay ik-ikkam ya ipailam gedan isnan an-akda nan panakabalinmo.

¹⁷ apo ay Diosmi, takdowem koma dakami. Pangabakem dakami isnan am-in ay ik-ikkanmi.