Salmo 9 - Kalin Apo Dios

¹ apo, daydayawek sik-a isnan am-in ay kabaelak. Ipagtekko nan am-in ay kaskasdaaw ay inik-ikkam.

² Men-gasgasing ya menlagsakak gapo ken sik-a dakpay ikanta nan mangdaydayawak ken sik-a ay kangatowan.

³ Mensanod nan mangbosboso no menpailaka. Matokangda dadat matey

⁴ tay ostoosto nan ikkam ay menbanbanag et nalintegak isnan pangbanagmo.

⁵ Dinadaelmo nan kailiili dakapay dosaen nan makedse et awnitda makalingkingan et ay eng-enggana.

⁶ Owen, nammid et nan dinosam ay mangbosboso ken dakami ya naalado ay naeskan nan binakasmo ay il-ilida. Maid et polos nabay-an is kanemnemnemanda.

⁷ Ngem nan apo et Ali ay eng-enggana ya nakasagana ay men-okom.

⁸ Nalinteg nan mentolayana isnan batawa tay maid paam-amdena isnan men-okomana.

⁹ Nan maaamis et nan apo nan kamangda ya isnan timpon di ligat et siya nan salidada.

¹⁰ Nan mangtek ken sik-a, apo, et talkenda sik-a tay sik-a, apo, et maid polos binaybay-am isnan menkamkamang ken sik-a.

¹¹ Ikantayo nan pangdayawyo isnan apo ay mentolay id Sion. Ipagtekyo isnan kaipoipogaw nan inik-ikkana

¹² tay adi kalkalingkingan Apo Dios nan maligligatan danapay dengngen nan men-adawaganda ta dosaena nan mang-aamis ken daida.

¹³ apo, mangseg-angka. Ilam pod nan mangpalpaligatan di mang-aamis ken sak-en isonga someg-angka ta isalakanmo sak-en isnan segpan di tetey

¹⁴ tapno maibagak isnan iJerusalem nan kaidaydayawam daket menlagsak tay nang-isalakanka.

¹⁵ Nan adi mamati et daida met laeng nan nabitowan isnan bitoda. Daida nan nasilowan isnan silo ay inpakatda.

¹⁶ Naipagtek nan apo isnan nalinteg ay men-ok-okomana isonga nasilowan nan managbasol isnan ngawi ay ik-ikkanda.

¹⁷ Tetey nan mentongpalan nan am-in ay managbasol, daida ay mang-adi ken Apo Dios.

¹⁸ Ngem awnit adi mabaybay-an nan kodokdo ya adi kamkammid nan namnaman nan mapapaligatan.

¹⁹ Omalika, apo. Adim ipalobos ay mangabak nan makedse nodi sik-a koma nan mang-okom ken daida.

²⁰ Paegyatem pay kitdin koma daida, apo, tapno mangtekanda ay apedda ipogaw et kedeng ay maid kabaelanda.