Salmo 89 - Kalin Apo Dios

¹ apo, maid patenggan nan mang-idayday-engak isnan adi menbalbaliw ay layadmo. Ipagtekko nan kinamatalekmo isnan aap-o is kasin enggana is komasin.

² Tay getkek ay nan layadmo ay wawawawada ay eng-enggana ya nan kinamatalekmo et adi kamkammid ay kaneg nan kawadan nan daya.

³ Kinwanim en, “Nakitolagak ken David ay pinilik ay baak et insapatak ken siya en,

⁴ ‘Ipatolayko nan aap-om ay men-ali ay eng-enggana. Owen, paknegek ta maid patenggan nan mentolayam.’ ”

⁵ apo, idayaw nan wada id daya nan kaskasdaaw ay inik-ikkam ya nan kinamatalekmo isnan madagopanda.

⁶ Tay sino ngen pay id daya nan makaiso isnan Apo? Sino ngata ken daida nan is-ison nan Apo?

⁷ Iyeegyatda si Apo Dios isnan madagdagopan nan mangdaydayaw ken siya ay kapatgan ya manakabalin isnan am-in.

⁸ apo ay Dios ay manakabalin, sino ngen di kanegmo is manakabalin ay adi menbalbaliw isnan kinamatalek?

⁹ Mentolayka olay isnan mendaldalloyon ay baybay et pakin-eem nan napigsa ay dalloyona.

¹⁰ Inabakmo nan kaeegyat ay Rahab tay pinateymo siya ya inwakatmo nan mang-ap-apos ken sik-a isnan kabaelam.

¹¹ Kowam nan daya ya nan batawa. Binoliwmo nan batawa ya nan am-in ay wada isdi.

¹² Winadam nan am-in ay solsolin di batawa. Ikantaan gedan nan bilig ay Tabor sik-a ya nan bilig ay Hermon gapo isnan gasingda.

¹³ Manakabalinka ya dadama nan kabaelam.

¹⁴ Kinalinteg ya kinaosto nan pegnad di mentolayam isonga layad ya kinamatalek nan ipailan nan am-in ay ik-ikkam.

¹⁵ Apo, nagasat nan mangdaydayaw ken sik-a ay daida ay tatakdowem nan biyagda.

¹⁶ lnagew ay men-gasgasingda gapo ken sik-a ya idaydayaw daka isnan kinalintegmo.

¹⁷ Sik-a mismo nan nagapowan di kabaelanda ya kedkedengka is mang-ipangabak ken daida

¹⁸ tay sik-a apo nan salidami. Sik-a ay maid polos kangawina ay Dios di Israel nan mentolay ken dakami.

¹⁹ Id kasin nin-ipagtekka isnan matalek ay baam et kinwanim en, “Dinotokak nan esay makabael ay mentolay. Owen, pinategko nan esay pinilik isnan kaipoipogaw.

²⁰ Nan baak ay si David nan pinilik ay mentolay. Dinotokak siya isnan nalanaan nan olona ay mangipaila ay nadotokan siya.

²¹ Et wawawawada ken siya nan badangko ya awnit pomigsa isnan panakabalinko.

²² Adi makaabak nan mang-ap-apos ken siya ya adi makaipababa nan makedse.

²³ Sak-en ay mismo nan mang-abak isnan mangboso ken siya daket pateyen nan mangliliget ken siya.

²⁴ Adi kakak-aan nan layadko ya kinamatalekko ken siya ya gapo ken sak-en et mangabak siya.

²⁵ Paan-anawaek nan mentoltolayana menlogi isnan baybay ay Mediterranean enggana isnan ginawang ay Eufrates.

²⁶ Awnitna kanan ken sak-en en, ‘Sik-a nan amak. Sik-a nan Diosko ay mangsalaknib ya mang-isalakan ken sak-en.’

²⁷ Awnit idyak ken siya nan kalintegana ay iyon-a ay anakko et menbalinek siya ay kapapatgan isnan am-in ay ali isnan batawa.

²⁸ Adi kakak-aan nan layadko ken siya ya mentoltoloy nan nakitolagak ken siya.

²⁹ Awnit wawawawada nan polina ay mentolay et mentoltoloy nan mentolayanda engganay mamaid nan daya.

³⁰ Ngem no adyan nan an-ak ya ap-ona nan lintegko ta adida tongpalen nan bilinko

³¹ ya no adida wanden nan lintegko ya idnge nan bilbilinko

³² et dosaek daida gapo isnan basolda. Owen, pilmi nan ikkak ay mangdosa ken daida.

³³ Ngem adi kakak-aan nan layadko ken David ya adiyak kalkalingkingan nan inkalik ken siya.

³⁴ Tongpalek nan nakitolagak ken siya ya adiyak soksokatan nan epdasko inkali.

³⁵ Adiyak polos menkamkampot ken David. Isnan kinadiosko et namingpingsan ay insapatak

³⁶ ay awnit wawawawada nan mentolay ay anakna et mentoltoloy nan mentolayanda engganay mamaid nan agew.

³⁷ Makneg nan mentolayanda engganay mamaid nan bowan. Owen, maid patenggana ay kaneg nan kawawadan nan daya.”

³⁸ Ngem nakaligetka isnan pinilim ay ali dakapay baybay-an siya.

³⁹ Linaksigmo nan nakitolagam isnan baam ya pinabainam nan mentotolayana.

⁴⁰ Tinokangmo nan baked nan ilina et dinadaelmo nan salidan nan ili.

⁴¹ Akewen nan am-in ay lomaos nan kokwana ya am-ammengan nan am-in ay sagogongna.

⁴² Pinangabakmo nan mangbosboso ken siya et pinagasingmo nan mang-ap-apos ken siya.

⁴³ Pinakapsotmo siya ay makigobat ya binaybay-am ay maabak isnan paggobatan.

⁴⁴ Kinaanmo nan kinangaton nan mentolayana. Dakapay pabainan nan mentotolayana.

⁴⁵ Pinaam-amam siya isdin timpo ay kapigpigsaana ya pinabaibainam siya.

⁴⁶ apo, ay kaatna pay nan kabayag di adim mangbadangan ken sak-en? Kaat nan kabayag nan mensesese ay ligetmo?

⁴⁷ Nenemnemem apo ay aptiaptik nan biyagko. Owen, kaneg maid paay nan biyag di ipogaw tay siawyan dat matey.

⁴⁸ Ayke waday ipogaw is adi matey? Ngan ngen di ikkana tapno adi maikaob?

⁴⁹ apo, into pay obpay san adi menbalbaliw ay layadmo ay din inkalim ken David isnan kamatalekmo?

⁵⁰ Adim koma kalkalingkingan nan mangbab-ainan di kaipoipogaw ken sak-en ay baam. Madadagsenanak pay isnan mang-iiyawanda.

⁵¹ Owen, nan mangbosboso ken sik-a et am-ammenganda sak-en ay pinilim ay ali dadapay mang-iiyaw ay olay into nan omayak.

⁵² Madaydayaw ay eng-enggana nan apo. Sapay koma.