Salmo 88 - Kalin Apo Dios

¹ apo ay Diosko ay mangisalsalakan ken sak-en, inagew ya linabi ay menlowalowak ken sik-a.

² Omdan koma ken sik-a nan lowalok ya dengngem koma nan mendawatak is badangmo.

³ Dadama nan ligatko et matmateyak et id wani

⁴ ya naibilangak et isnan natey. Maidet pay pigsak

⁵ ya kanegak nabaybay-an isnan kad-an di natnatey ay kaneg gedan nan aped napatpatey ay kinalingkingam ya adim et mabadangan.

⁶ Inonogmo sak-en isnan tekaw ay menbololinget ya adaadaem.

⁷ Dadama ay mendagsen ken sak-en nan ligetmo ya itoltoloy nan ligatko ay kaneg nan dalloyon.

⁸ Inyaddawim nan gagayyemko ken sak-en et ken daida et kadodogisak. Kanegak pay balod ay adi makabala.

⁹ Gapo isnan menbabababawiyak et kinmapsot nan matak. apo, inagew ay mendawatak ken sik-a. Owen, ingatok nan ledengko daket menlowalo.

¹⁰ Ay men-ipailaka is kaskasdaaw isnan natey? Aykeda makabangon ay mangdayaw ken sik-a?

¹¹ Ay ibagada isnan naikaobanda nan adi menbalbaliw ay layadmo wenno ay ibagada nan talekmo isnan kad-an di natnatey?

¹² Ayke maila nan kaskasdaaw ay ik-ikkam isnan menbolinget? Ayke maila nan kinagawismo isnan kad-an di natnatey?

¹³ Ngem sak-en apo et mendawatak ay menpabadang ken sik-a ya menlowalowak ken sik-a ay winakgat.

¹⁴ apo, damen adi ikaskaso sak-en? Ayta dakan itabonan sak-en?

¹⁵ Kaseseg-ang ya matmateyak et enggana isdin kaongak et intoltoledko nan kaeegyat ay ligat ya nakapsotak et.

¹⁶ Itoltoloymo nan ligetmo ken sak-en et nan kaeegyat ay ligat et nadadaelak.

¹⁷ Inagew ay itoltoloy nan ligatko ay kaneg nan layos ay manglin-eb ken sak-en.

¹⁸ Inyaddawim ken sak-en nan gagayyemko ya sagsagogongko et kedeng et nan bolinget is kadwak.