Salmo 87 - Kalin Apo Dios

¹ Pinakeneg nan apo nan ilina isnan napateg ay biligna.

² Am-amed nan pananglayad nan apo isnan ili ay Sion mo nan tap-in di ili ay mentetean nan ap-on din si Jacob

³ et gawigawis nan makmakwani isnan naay ilin Apo Dios.

⁴ Tay kanan nan apo en, “Wadada nan naiyanak id Egipto ya Babilonia ay mamati ken sak-en. Wadada gedan ay naiyanak id Filistia, Tiro ya Etiopia ngem ibilangko ay naiyanakda id Sion ay ilik.”

⁵ Owen, nan am-in ay mamati ken Apo Dios et maibilangda ay naiyanak id Sion et nan Kangangatowan ay mismo nan mangipakneg isnan naay ili.

⁶ Isnan insolat nan apo ay ngadngadan di kaipoipogaw et daida ay naiyanak id Sion nan patgena.

⁷ Nan mensala ya nan menkanta is gasingda et kananda en, “Id Sion nan magapowan nan am-in ay bindisyon tako.”