Salmo 86 - Kalin Apo Dios

¹ Dengngem sak-en apo ta songbatam sak-en tay nababa ya kaseseg-angak.

² Isalakanmo sak-en isnan tetey tay adiyak dokdokogan sik-a. Owen, isalakanmo nan baam ay mentaltalek ken sik-a.

³ apo, sik-a nan Diosko isonga seg-angam sak-en tay sin-agew ay menlol-owalowak ken sik-a.

⁴ Pagasingem koma sak-en ay baam tay sik-a nan menlol-owalowak.

⁵ apo, gawigawis ya managpakawanka. Dadama pay nan adi menbalbaliw ay layadmo isnan am-in ay mendawat ken sik-a.

⁶ Dengngem kad nan lowalok. Dengngem nan mensegseg-angak ay mendawat is badangmo.

⁷ Mendawatak ken sik-a isnan madadanagak tay sik-a nan mangsongbat isnan lowalok.

⁸ apo, maid dios is kankanegmo ya maid makaikkan isnan ik-ikkam.

⁹ Awnit omali ken sik-a nan am-in ay kaipoipogaw ay binoliwmo et menlokbobda isnan sagangmo dadapay daydayawen sik-a

¹⁰ tay manakabalinka ya kedkedengka is makaikkan isnan kaskasdaaw. Sik-a kedkedeng nan Dios.

¹¹ apo, isolom sak-en isnan laydem ay ikkak et tongtongpalek nan katet-ewan nan magapgapo ken sik-a. Isolom sak-en ta adiyak mendowadowa ay mangdaydayaw ken sik-a.

¹² apo ay Diosko, daydayawek sik-a isnan am-in ay kabaelak ya ipagpagtekko nan kinangatom ay eng-enggana

¹³ tay dadama nan adi menbalbaliw ay layadmo ken sak-en ya insalakanmo sak-en isnan kad-an di natnatey.

¹⁴ Apo Dios, mangsape nan nalastog ya nan makedse ay ipogaw. Daida ay mang-adi ken sik-a et kaytenda ay mangpatey.

¹⁵ Ngem sik-a apo nan Dios ay managseg-ang ya managlayad. Bakenka pay nalaka ay makaliget ya itoltoloy nan adi menbalbaliw ay layad ya talekmo.

¹⁶ Sagongem sak-en ya mangseg-angka. Papigsaem ya isalakanmo sak-en ta mensilbiyak ken sik-a ay kaneg din inikkan ina.

¹⁷ apo, agtam kad sak-en is mailaan nan kinagawismo ta siyay mabainan nan mangliliget ken sak-en tay sik-a nan mangliwliwaliw ya mangbadbadang ken sak-en.