Salmo 85 - Kalin Apo Dios

¹ Apo, binadangam id kasin nan ipogawmo et pinagawismo daida ay ap-on din si Jacob.

² Pinakawanmo nan basol nan ipogawmo. Owen, pinakawanmo din kinakedseda.

³ Nabaew et nan ligetmo ken daida.

⁴ Apo Dios ay mangisalsalakan, isagongmo kad dakami isnan sigod ay kababalinmi ya kalingkingam nan ligetmo ken dakami.

⁵ Ay liligtem dakami ay eng-enggana? Ay itoltoloy nan ligetmo isnan ipogawmo is kasin enggana is komasin?

⁶ Papigsaem koma kasin dakami ay ipogawmo et awnit idaydayawmi sik-a.

⁷ apo, ipailam ken dakami nan adi-menbalbaliw ay layadmo ya isalakanmo dakami.

⁸ Dedengngek koma nan kankanan nan apo ay Dios tay inkalina nan talna ken datako ay ipogawna no adi tako kasin ik-ikkan nan ngawi ay ik-ikkan tako.

⁹ Tet-ewa ay nakasagana ay mang-isalakan isnan mendaydayaw ken siya tapno wawawawada nan dayawna isnan daga tako.

¹⁰ Ipailan nan apo nan adi menbalbaliw ay layad ya talekna isnan ipogawna ya ipailana gedan nan kinalintegna danapay palamlamninen nan ipogawna.

¹¹ Pomigsa nan pammatin di ipogaw isnan batawa dapay abes ipailan nan apo ay wada id daya nan kinalintegna isnan batawa.

¹² Tet-ewa ay idyan nan apo nan gawis ken datako et omado nan apit isnan daga tako.

¹³ Awnit maipaila omon-ona nan kinalinteg isnan maisaganaan nan daanen nan apo.