Salmo 84 - Kalin Apo Dios

¹ apo ay manakabalin, napatepateg ken sak-en nan kad-an di maidaydayawam.

² Kakakayatko ya maiiliwak isnan pantew nan kad-an nan apo. Owen, mailiwak ngem men-gasingak kayet isnan matatago ay Dios.

³ Olay nan koykoyat et bomaeyda isdi dadapay omset is omokda ay mentean nan an-akda isnan sag-en di altarmo. Owen, isnan altar nan apo ay manakabalin ay Ali ya Diosko.

⁴ Nagasat nan mentetee isnan baeymo ay kanayon ay menkankanta ay mangdaydayaw ken sik-a.

⁵ Nagasat nan ipogaw ay sik-a nan menkamkamanganda ay mangkaykayat ay om-omey mendaydayaw isnan bilig ay Sion.

⁶ Isnan menbab-aatanda isnan naaango ay tanap di Baca et dadama ay naligatanda ngem kaneg pinabalan Apo Dios nan danom isnan balaan ya kaneg waday nasapa is odan ay naolnong is danom isnan napopokong

⁷ isonga am-amedda bomikas et awnitda menpalang ken Apo Dios id Sion.

⁸ apo ay Dios ay manakabalin, dengngem koma nan lowalok. Owen, dengngem koma, sik-a ay Dios din si Jacob.

⁹ Apo Dios ay mangsalsalaknib ken dakami, badangam koma nan pinilim.

¹⁰ Gag-awis nan esay agew ay kawad-ak isnan Templom mo nan sinlibo ay agew isnan teken ay logal. Mas kaykaytek ay menbantay isnan segpan nan baey di Diosko mo nan mentetee isnan baey di makedse.

¹¹ Tay nan apo ay Dios nan mangtangtanggew isnan nemnemko ya siya nan mangsalsalaknib ken sak-en. Idyana gedan nan badang ya nan kaidayawan ya adina iyimot nan gawis ken daida ay nalinteg nan ik-ikkanda.

¹² apo ay manakabalin, nagasat nan ipogaw ay mentalek ken sik-a.