Salmo 83 - Kalin Apo Dios

¹ Apo Dios, adim aped igiginek. Nenemnemem koma dakami ya adim aped ikikin-e.

² Naay men-golo nan mangbosboso ken sik-a. Lomastog pay nan mangliliget ken sik-a.

³ Wada nan ngawi ay panggepda isnan ipogawmo dadapay mentotolag is ikkanda isnan ipogaw ay salsalaknibam.

⁴ Kananda en, “Entako dadaelen daida ta maidet manemnemneman nan am-in ay Israelita.”

⁵ Nintotolagda ay maeesada ay mang-apos ken sik-a,

⁶ daida nan iyEdom, nan ap-on din, si Ismael, nan iMoab, nan Agareno,

⁷ nan iGebal, nan iyAmmon, nan Amalec, nan Filistia ya nan iTiro.

⁸ Naitapi pay ken daida nan iyAsiria ta badanganda nan iMoab ya iyAmmon ay nan ap-on din si Lot.

⁹ Ipaliknam ken daida nan inpaliknam isnan Madianita, ken da Sisera ya ken Jabin isnan ginawang ay Kison

¹⁰ isdin nang-abakam ken daida id Endor et aped nadonot nan aw-awakda isnan lota.

¹¹ Ikkam isnan ap-apon di mang-ap-apos ken sik-a nan kaneg san inikkam ken da Oreb ken Zeeb. Abakem am-in nan mentotolay isnan mangliliget ken sik-a ay kaneg din nang-abakam ken da Zeba ken Salmunna.

¹² Owen, abakem daida ay nangwani en, “Gowaden tako ta kowaen tako nan daga ay kad-an di madaydayawan Apo Dios.”

¹³ Apo Dios, iwakatmo daida ta kanegda nan tapok ya pabalinem daida ay kaneg taep ay nalaka ay itayaw di dagem ta mamidda et.

¹⁴ Kaneg nan apoy ay mangpoo isnan pagpag ya mangpoo isnan bilbilig

¹⁵ nan ikkam ay mangpaligat ken daida ya paegyatem daida ta tomagtagda et maabakda.

¹⁶ apo, bainam ya pababaem daida ta menpalintomengda ken sik-a.

¹⁷ Maabak ya mabainanda et koma ay eng-enggana. Mateyda koma isnan dadama ay bainda.

¹⁸ Ipagtekmo koma ken daida ay kedkedengka is apo ay Kangangatowan ay mentolay isnan batawa.