Salmo 82 - Kalin Apo Dios

¹ Si Apo Dios nan kangatowan ay menbanag isnan madagopan nan mangipangpango isnan kaipoipogaw. Ibagana nan pangbanagna ken daida ay nadadagop.

² Kanana en, “Kaatna pay nan kabayag nan baken nalinteg ay men-ibanbanaganyo ya nan mang-ab-aboloyanyo isnan mangik-ikkan is ngawi?

³ Nan osto koma nan pangbanagyo isnan ngoso ya nan nababa dayopay salakniban nan kaseseg-ang ya nan maid kabaelanda.

⁴ Badanganyo nan nakapsot ya nan makasapol. Isalakanyo daida isnan kabaelan di makekedse.

⁵ Dakayo ay nadadagop, adi kayo od makaaw-awat ya maid getkenyo. Kaneg kayo mentetee isnan menbolinget isonga maid et kinalinteg isnan batawa.

⁶ Naay nan kanak ken dakayo, kanak en, ‘Kaneg kayo dios am-in ay anak di Kangangatowan.’

⁷ Ngem matey kayo met laeng ay kaneg. nan ipogaw. Owen, matey kayo ay kaneg nan tap-in di mentotolay ay wada gedan nan patenggan di biyagda.”

⁸ Apo Dios, omalika et banagen nan kaipoipogaw tay kowam nan batawa.